ধেমাজিত বন্যাৰ্তৰ পথ অৱৰোধ কাৰ্যসূচী : আৱদ্ধ শ শ বাহন

ডিজিটেল সংবাদ,ধেমাজি : ধেমাজি জিলাৰ বানাক্ৰান্ত ৰাইজে জীয়াঢল নৈয়ে সৃষ্টি কৰা বানপানী সমস্যা স্থায়ী সমাধান কৰাৰ দাবী জনায়। এই দাবীৰে ভজো গাঁৱৰ ভুক্তভোগীসকলে শনিবাৰে ১৫ নং ৰাষ্ট্ৰীয় ঘাইপথত পথ অৱৰোধ কাৰ্যসূচী ৰূপায়ণ কৰে।

উল্লেখযোগ্য যে বছৰ বছৰ ধৰি অঞ্চলবাসী ৰাইজে ইয়াৰ পৰিত্ৰাণ বিচাৰি বাৰম্বাৰ চৰকাৰ আৰু জিলা প্ৰশাসনক অৱগত কৰি আহিছে যদিও ইয়াৰ প্ৰতি জিলা প্ৰশাসন তথা চৰকাৰৰ কোনো ভ্ৰূক্ষেপ নাই ৷ জানিবলৈ দিয়া মতে, বৰ্তমানেও গাঁৱখনৰ ১৫ নং ৰাষ্ট্ৰীয় ঘাইপথৰ ওপৰেৰে জীয়াঢলৰ বাঢ়নী পানী বাগৰিয়ে আছে ৷

উল্লেখ্য যে শনিবাৰে বিয়লিলৈ বাঢ়নী পানীৰ পৰিমাণ কিছু হ্ৰাস পাইছে যদিও কাষৰীয়া বহু লোকৰ ঘৰ বৰ্ত্তমানেও বানত ডুব গৈ আছে ৷ জিলা প্ৰশাসন,ৰাজহচক্ৰ বিষয়া আৰু লাট মণ্ডৰ একমাত্ৰ হেমাহিৰ বাবেই ভজো গাঁৱবাসীয়ে বানত দুৰ্ভোগ ভুগিব লগা হৈছে বুলি অভিযোগ একাংশৰ।

এই অভিযোগেৰে ঘাইপথছোৱাৰ দাঁতিকাষৰীয়া ৰাইজে শনিবাৰে যাতায়ত বন্ধ কৰি প্ৰতিবাদী পথ অৱৰোধ কাৰ্যসূচী ৰূপায়ণ কৰে ৷ ৰাইজৰ এনে ৰণচণ্ডী ৰূপ দেখি জিলাখনৰ বিষয়া-কৰ্মচাৰী আৰু লাটমণ্ডলৰ হাহাকাৰ অৱস্থা হৈছে ৷ প্ৰতিবাদৰ ফলত ৰাষ্ট্ৰীয় ঘাইপথটোৰ পথচোৱাৰ যাতায়ত বন্ধ হৈ যোৱাৰ লগতে ৰাষ্ট্ৰীয় ঘাইপথটোৰ ওপৰত আৱদ্ধ হৈ পৰে শ শ যান-বাহন ।

Also Read: ঢকুৱাখনাৰ খহনীয়া এলেকা পৰিদর্শন মন্ত্ৰী পীযুষ হাজৰীকাৰ