ডিজিটেল সংবাদ, মঙলদৈঃ বিগত কিছুদিন ধৰি ৰাজ্যখনত প্ৰচণ্ড গ্ৰীষ্মপ্ৰৱাহ চলি আছে। শনিবাৰে গুৱাহাটী মহানগৰীত তাপমাত্ৰা ৪০ডিগ্ৰী চেলচিয়াছ অতিক্ৰম কৰিছে । ৰাজ্যজুৰি প্ৰচণ্ড তাপমাত্ৰা হৈ থকাৰ পৰিপ্ৰেক্ষিতত শিক্ষানুষ্ঠানসমূহত ছাত্ৰ-ছাত্ৰীসকলে পাঠগ্ৰহণ কৰাত ভীষণ অসুবিধাৰ সন্মুখীন হৈছে।
এনে পৰিস্থিতিৰ মাজতে দৰং জিলা শিক্ষা বিভাগে ছাত্ৰ-ছাত্ৰীসকলৰ সুবিধাৰ্থে জিলাখনৰ শিক্ষানুষ্ঠানসমূহৰ পাঠদানৰ সময়ৰ কিছু সালসলনি কৰিছে। সম্প্ৰতি চলি থকা প্ৰচণ্ড গ্ৰীষ্মপ্ৰৱাহৰ বাবে দৰং জিলাৰ শিক্ষা বিভাগৰ চৰকাৰী-বেচৰকাৰী সকলো শিক্ষানুষ্ঠানৰ পাঠদানৰ সময়ৰ সালসলনি কৰিছে।
সেই অনুসৰি জিলাখনৰ শিক্ষা বিভাগৰ অধীনৰ সকলো প্ৰাথমিক বিদ্যালয়ৰ পাঠদান ৰাতিপুৱা ৭-৩০ বজাৰ পৰা ১১-৩০ বজালৈ, উচ্চ প্ৰাথমিক বিদ্যালয়ৰ পাঠদান ৰাতিপুৱা ৭-৩০ বজাৰ পৰা ১২ বজালৈ আৰু উচ্চ মাধ্যমিক, উচ্চতৰ মাধ্যমিক বিদ্যালয়ৰ পাঠদানৰ সময় ৰাতিপুৱা ৭-৩০ বজাৰ পৰা ১২-৩০ বজালৈ নিৰ্ধাৰণ কৰা হৈছে। জিলা সৰ্বশিক্ষা মিছন সমন্বয়ক স্বাক্ষৰিত এই আদেশ অহা ২৭ মে'ৰ পৰা কাৰ্যকৰী হব বুলি নিৰ্দেশনাত উল্লেখ কৰা হৈছে।
