ডিজিটেল সংবাদ, মঙলদৈ: দৰং জিলা সাহিত্য সভাৰ সোণালী জয়ন্তী বৰ্ষীয় কাৰ্যসূচী "প্ৰয়াত প্ৰাক্তন পদাধিকাৰ মণ্ডলীৰ স্মাৰক বক্তৃতা অনুষ্ঠান" আয়োজন কৰা হৈছে। বৰমপুৰ শাখা সাহিত্য সভাৰ উদ্যোগত অহা ৮ এপ্ৰিলত বৰমপুৰ জাতীয় বিদ্যালয় প্ৰাঙ্গণত অনুষ্ঠিত হ'ব এই অনুষ্ঠান।
সোণালী জয়ন্তী উদযাপন সমিতিৰ কাৰ্যকৰী সভাপতি ডঃ ৰামচন্দ্ৰ ডেকাৰ সঞ্চালনাত অনুষ্ঠিততব্য বক্তৃতানুষ্ঠান উদ্বোধন কৰিব দৰং জিলা সাহিত্য সভাৰ সভাপতি ৰজনীকান্ত নাথে। অনুষ্ঠানত প্ৰয়াত প্ৰতিষ্ঠাপক সভাপতি ৰত্নেশ্বৰ শৰ্মা, অতুল চন্দ্ৰ বৰুৱা, ৰেৱণ চন্দ্ৰ নাথ, মঙ্গলচণ্ডী ব্ৰহ্ম, খৰ্গেশ্বৰ বৰুৱা, গজেন্দ্ৰ নাথ চহৰীয়া আৰু প্ৰয়াত প্ৰতিষ্ঠাপক উপ সভাপতি সুৰেন্দ্ৰ প্ৰসাদ বৰদলৈৰ জীৱন আৰু সাহিত্য কৃতি শীৰ্ষক বক্তৃতা প্ৰদান কৰা হ'ব।
উক্ত বক্তৃতা প্ৰদান কৰিব ক্ৰমে দিপীলা চিনিয়ৰ চেকেণ্ডাৰী স্কুলৰ স্নাতকোত্তৰ শিক্ষক অখিল ৰঞ্জন ভট্ট, বাইহাটা চাৰিআলিস্থিত ৰেঙনি একাডেমীৰ শিক্ষয়িত্ৰী কমৰূন জান্নাত, নিয়মীয়া বাৰ্তা কাকতৰ ছিপাঝাৰৰ সংবাদদাতা ৰঞ্জিত কুমাৰ নাথ, দৰং জিলা সাহিত্য সভাৰ প্ৰাক্তন সভাপতি চহিৰ ভূঞা, হাজৰিকাপাৰা সাহিত্য সভাৰ সম্পাদক কল্যাণ কুমাৰ গোস্বামী, দৰঙী কলা-কৃষ্টি উন্নয়ন সংঘৰ সম্পাদক নৱ কুমাৰ শইকীয়া আৰু শোণিতপুৰজিলা সাহিত্য সভাৰ প্ৰাক্তন সম্পাদক মৃদুল কুমাৰ চহৰীয়াই।
উল্লেখ্য যে, জিলা সাহিত্য সভাৰ সোণালী জয়ন্তী বৰ্ষীয় এই কাৰ্যসূচীত অংশগ্ৰহণ কৰিবলৈ সম্পাদক গৌতমানন্দ গোস্বামীয়ে পত্ৰ যোগে অনুৰোধ জনায়।
