মণিপুৰৰ শান্তিৰ কামনাৰে কোকৰাঝাৰত সহস্ৰাধিক মহিলাৰ প্ৰাৰ্থনা

ডিজিটেল সংবাদ,কোকৰাঝাৰ : অগ্নিগৰ্ভা মণিপুৰত হিংসাত্মক ঘটনাৰ অৱসান ঘটাই স্থায়ী শান্তি প্ৰতিষ্ঠা কামনাৰে কোকৰাঝাৰত "লৱাৰ আছাম আন্তঃগীৰ্জা মহিলা শান্তি সমিতি"ৰ উদ্যোগত সমূহীয়া প্ৰাৰ্থনা আৰু মমবাতি প্ৰজ্বলণ কাৰ্যসূচী ৰূপায়ণ কৰা হয় ৷ এই উপলক্ষে বুধবাৰে বিয়লি কোকৰাঝাৰ চৰকাৰী উচ্চতৰ মাধ্যমিক আৰু বহুমুখী বিদ্যালয়ৰ খেলপথাৰত হোৱা অনুষ্ঠানত সহস্ৰাধিক মহিলাই অংশ লয়।

কোকৰাঝাৰ ,চিৰাং, বাগছা ,ওদালগুৰী আৰু বঙাইগাঁও জিলাৰ সহস্ৰাধিক খ্ৰীষ্টান ধৰ্মাৱলম্বীৰ মহিলা উপস্থিত থাকি মণিপুৰৰ হিংসাত্মক ঘটনাৰ অৱসান বিচাৰি মণিপুৰৱাসীক শান্তি প্ৰতিষ্ঠাৰ বাবে আহ্বান জনায় ৷ উল্লেখ্য যে , মণিপুৰৰ অগ্নিগৰ্ভা পৰিস্থিতিৰ শান্তিৰ আহ্বানৰে আজিৰ লৱাৰ আছাম আন্তঃ গীৰ্জা মহিলা শান্তি সমিতিৰ উদ্যোগত খ্ৰীষ্টান ধৰ্মাৱলম্বীৰ মহিলাসকলে নীৰৱ প্ৰাৰ্থনা, শৃংখল প্ৰাৰ্থনা, গণ প্ৰাৰ্থনা আৰু মমবাতি প্ৰজ্বলন কাৰ্যসূচী ৰূপায়ন কৰে ৷

অনুষ্ঠানত আমন্ত্ৰিত অতিথি হিচাপে কোকৰাঝাৰৰ বিধায়ক লৰেঞ্চ ইছলাৰী আৰু আমন্ত্ৰিত বক্তা হিচাপে বঙাইগাও কেথলিক গীৰ্জাৰ ৰেভাৰেন্ট বিছপ বসুমতাৰী, চি এন আইৰ ৰৈমালী মুছাহাৰী, এন ই এল চি সোনামনি মূৰ্মূ আৰু নামনি অসমৰ গীৰ্জাৰ ফাদাৰ,ৰেভাৰেন্ট, চিষ্টাৰ আৰু বিলিভাৰসমূহ উপস্থিত থাকি অনুষ্ঠানৰ সৌষ্ঠৱ বৃদ্ধি কৰে ৷ ইপিনে অনুষ্ঠানত আদৰণি ভাষণ আগবঢ়াই লৱাৰ আছাম আন্তঃগীৰ্জা মহিলা শান্তি সমিতিৰ আহ্বায়ক ৰেণু বসুমতাৰীয়ে ৷

বসুমতাৰীয়ে অশান্ত মণিপুৰত দুই মহিলাক বিৱস্ত্ৰা কৰা নিৰ্লজ্জ ঘটনাক পলমকৈ হ'লেও গৰিহণা দি বিশ্ববাসীৰ ওচৰত লজ্জানত কৰা মণিপুৰ ঘটনাৰ পৰিসমাপ্তি ঘটাই অঞ্চলটোত স্থায়ী শান্তি বৰ্তাই ৰখাৰ সকলো পক্ষকে আহ্বান জনায় ৷ আনহাতে সংবাদমাধ্যমৰ আগত বিধায়ক লৰেঞ্চ ইছলাৰীয়ে মণিপুৰৰ ঘটনাক দুৰ্ভাগ্যজনক আখ্যা দি দুয়োপক্ষকে হিংসা পৰিহাৰ কৰি শান্তিৰ বাতাবৰণ গঢ়ি তুলিবলৈ আহ্বান জনায়।

হিংসাই কোনো সমস্যাৰ সমাধান নকৰে বুলি মন্তব্য কৰি বিধায়ক লৰেঞ্চ ইছলাৰীয়ে মানৱতাৰ স্বাৰ্থত হিংসা পৰিহাৰ কৰি শান্তিপূৰ্ণ , প্ৰগতিশীল মণিপুৰ নিৰ্মাণৰ বাবে সকলো পক্ষকে কাম কৰিবলৈ আহ্বান জনায় ।

Also Read: ডাবলিনৰ সেউজ পৰিৱেশত ভাৰত-আয়াৰলেণ্ডৰ টি-২০ মেচ