ডিজিটেল সংবাদ,কোকৰাঝাৰ : কোকৰাঝাৰত আজিৰে পৰা তিনিদিনীয়া কাৰ্যসূচীৰে আৰম্ভ হৈছে সদৌ অসম নাথ যোগী ছাত্ৰ সন্থাৰ দ্বিতীয় সংখ্যক কেন্দ্ৰীয় ত্ৰি-বাৰ্ষিক অধিৱেশন। কোকৰাঝাৰ সদৰ চহৰৰ নাতিদূৰৈৰ ভূটীয়াপাৰা ৰাজহুৱা খেলপথাৰত অনুষ্ঠিত হৈছে সদৌ অসম নাথ যোগী ছাত্ৰ সন্থাৰ অধিৱেশনখন।
বুধবাৰৰ পৰা অনুষ্ঠিত তিনিদিনীয়া বৰ্ণাঢ্য কাৰ্যসূচীৰে আৰম্ভ হোৱা অধিবেশনৰ প্ৰথম দিনাখনেই উখল-মাখল পৰিৱেশে বিৰাজ কৰিছে । অধিৱেশনক লৈ ব্যস্ত হৈ পৰিছে জীয়ৰী-বোৱাৰী, ডেকা-গাভৰু সকলোৱে।
প্ৰথম দিনৰ কাৰ্যসূচী অনুসৰি মুখ্য তোৰণ উদ্বোধন কৰে বিশিষ্ট সমাজসেৱক মুৰুলীধৰ মেধিয়ে । সংগঠনৰ পতাকা উত্তোলন কৰে সদৌ অসম নাথ যোগী ছাত্ৰ সন্থাৰ কেন্দ্ৰীয় সভাপতি লক্ষণ নাথে ৷
সাংস্কৃতিক পতাকা উত্তোলন কৰে অভ্যৰ্থনা সমিতিৰ সভাপতি তথা বিধায়ক লৰেন্স ইছলাৰীয়ে ৷ ছহিদ তৰ্পন কৰে সংগঠনটোৰ কেন্দ্ৰীয় সাধাৰণ সম্পাদক অৰবিন্দ নাথে । ইয়াৰ পিছতে যোগী গুৰু গৰোক্ষ নাথৰ প্ৰতিচ্ছবি মাল্যাৰ্পণ আগবঢ়ায় বেদ ব্যৱস্থাপক দ্বিজেন গোস্বামীয়ে আৰু বৃক্ষ ৰোপণ কাৰ্যসূচীৰ শুভাৰম্ভ কৰে অভ্যৰ্থনা সমিতিৰ সম্পাদক ধনঞ্জয় নাথে ৷
দুপৰীয়া ১২-০০ বজাত প্ৰতিনিধি শিবিৰ মুকলি কৰে অভ্যৰ্থনা সমিতিৰ কাৰ্যকৰী সভাপতি বকুল নাথে আৰু বিয়লী ২-০০ বজাৰ পৰা নাথ যোগী কৃষ্টি - সংস্কৃতি সমাৰোহ অনুষ্ঠিত হয় ৷ ইপিনে অধিৱেশনৰ প্ৰথম দিনাৰ কাৰ্যসূচীত অংশগ্ৰহণ কৰা নাথ যোগী ছাত্ৰ সন্থাৰ সাধাৰণ সম্পাদক অৰবিন্দ নাথে কয়- নাথ যোগী জনগোষ্ঠীটোৰ কাৰণে এই অধিৱেশনখন ঐতিহাসিক হিচাপে চিহ্নিত হৈ ৰ'ব।
জনগোষ্ঠীটোৰ উন্নয়নৰ স্বাৰ্থত চৰকাৰৰ সতে অনুষ্ঠিত হোৱা আলাপ আলোচনাৰ প্ৰতিশ্ৰুতি ৰূপায়ন নহ'ল । ইয়াৰ প্ৰতিফলন ২০২৪ চনৰ নিৰ্বাচনত দেখিবলৈ পাব । এই অধিৱেশনত জনগোষ্ঠীটোৰ শৈক্ষিক, ৰাজনৈতিক অধিকাৰৰ পৰা আৰম্ভ কৰি কেইবাটাও গুৰুত্বপূৰ্ণ সিদ্ধান্ত ল'ব বুলি নাথ যোগী ছাত্ৰ সন্থাৰ কেন্দ্ৰীয় সম্পাদক অৰবিন্দ নাথে মন্তব্য কৰে।
আনহাতে অভ্যৰ্থনা সমিতিৰ সভাপতি তথা বিধায়ক লৰেন্স ইছলাৰীয়ে অধিৱেশনত সকলোৰে উপস্থিতি- সহযোগিতা কামনা কৰি অধিৱেশনৰ সফলতা কামনা কৰিছে ।উল্লেখ্য যে সদৌ অসম নাথ যোগী ছাত্ৰ সন্থাৰ দ্বিতীয় সংখ্যক ত্ৰি-বাৰ্ষিক অধিৱেশনত অসমসহ দেশৰ বিভিন্ন প্ৰান্তৰ পৰা অহা আলহী - প্ৰতিনিধিক আপ্যায়নৰ বাবে খেলপথাৰতে নিৰ্মাণ কৰা নাথ-যোগী গাঁৱৰ বাকৰিত গাঁৱৰ জীয়ৰী-বোৱাৰীয়ে পিঠাগুড়ি খুন্দিছে আৰু বিভিন্ন ধৰণৰ পিঠা বনোৱা পৰিলক্ষিত হৈছে।
তদুপৰি ৭০০০ নাথ-যোগী নাচনীৰ দ্বাৰা নাথ-যোগী কৃষ্টি প্ৰদৰ্শনৰ আখৰা চলিছে উদযাপনথলীতে । উল্লেখ্য যে, নাথ-যোগী ছাত্ৰ সন্থাৰ কেন্দ্ৰীয় অধিৱেশনত অসমৰ উপৰি উত্তৰ প্ৰদেশ , মধ্যপ্ৰদেশ, ৰাজস্থানকে ধৰি দেশৰ বিভিন্ন প্ৰান্তৰ পৰা তিনি হেজাৰ প্ৰতিনিধিয়ে অংশগ্ৰহণ কৰিছে ৷
ইপিনে সন্ধিয়া ৬-০০ বজাত নাথ-যোগীৰ এউৰি উৎসৱ আৰম্ভ হৈছে । খেলপথাৰতে নিৰ্মান কৰি উলিওৱা নাথ গাঁৱত এউৰি উৎসৱ আৰম্ভ হৈছে । অতি উলহ-মালহেৰে আৰম্ভ হোৱা এউৰি উৎসৱৰ পিছত নিশা সাংস্কৃতিক অনুষ্ঠান আৰম্ভ হ'ব ।
