ডিজিটেল সংবাদ,বিহালীঃ ৰাজ্যৰ আন আন লোকসভা সমষ্টিসমূহৰ সমান্তৰালকৈ ১১ নং শোণিতপুৰ সমষ্টিতো তুংগত বলিছে নিৰ্বাচনী বতাহ। উল্লেখ্য যে,শোণিতপুৰ সংসদীয় সমষ্টিৰ শাসক-বিৰোধী দুয়ো দলৰ প্ৰাৰ্থী ৭১ নং বিহালী বিধানসভা সমষ্টিৰ অন্তৰ্গত বৰগাং এলেকাৰ ৷
শুকুৰবাৰে বিহালী বিধানসভা সমষ্টিৰ বৰগাংত অন্যতম বিৰোধী দল তথা ইণ্ডি মৰ্চাৰ সহযোগি দল চিপিআই (এম-এল)-ৰ উদ্যোগত এক বিশাল গণ সমাৱেশ অনুষ্ঠিত হয় ৷ গণ সমাৱেশৰ পূৰ্বে দলটোৱে ৰেলী বাহিৰ কৰে ৷ উক্ত গণ সমাৱেশত ৰাজ্যৰ বামপন্থী নেতা বিবেক দাস উপস্থিত থাকে ৷
গণ সমাৱেশত উপস্থিত থাকি শোণিতপুৰ সংসদীয় সমষ্টিৰ বিজেপি মিত্ৰজোঁটৰ প্ৰাৰ্থী ৰঞ্জিত দত্ত ম্যাদ ওকলা ঔষধ,তেওঁৰ কাম নাই বুলি বিবেক দাসে মন্তব্য কৰে ৷ ইয়াৰোপৰি ৰঞ্জিত দত্ত কেলেংকাৰী কৰা মানুহ বুলি অভিযোগ কৰি বিজেপিত ভাল মানুহৰ স্থান নাই বুলিও তেওঁ দাবী কৰে ৷
আনহাতে ৰঞ্জিত দত্তই ২৫ বছৰীয়া ৰাজনৈতিক কালত বিহালীৰ কোনো উন্নয়ন নকৰাৰো অভিযোগ তোলে বিবেক দাসে ৷
