ডিজিটেল সংবাদ, কোকৰাঝাৰঃ কেবিনেট বৈঠক ৰাজ্যৰ বিভিন্ন জিলাত অনুষ্ঠিত হোৱাৰ পিছত এইবাৰ দিছপুৰৰ বাহিৰত অনুষ্ঠিত হ'ব বিধানসভাৰ অধিৱেশন । কোকৰাঝাৰত অনুষ্ঠিত হ'ব অসম বিধানসভাৰ শীতকালীন অধিৱেশন । এই লৈ বিটিচিৰ সচিবালয়ত ইতিমধ্যেই আৰম্ভ হৈছে প্ৰস্তুতি । প্ৰস্তুতিৰ বুজ লবলৈ সোমবাৰে কোকৰাঝাৰত উপস্থিত হয় বিধানসভাৰ অধ্যক্ষ বিশ্বজিৎ দৈমাৰী ।
কাম-কাজৰ অগ্ৰগতিৰ বুজ লৈ অধ্যক্ষগৰাকীয়ে কয় যে দিছপুৰৰ বাহিৰত বিধানসভা অধিৱেশন অনুষ্ঠিত কৰাৰ উদ্দেশ্য হৈছে বিধায়িনী প্ৰক্ৰিয়া ৰাইজে জনাতো অতিকৈ প্ৰয়োজন । গণতান্ত্ৰিক দেশত ৰাইজৰ প্ৰতিনিধিয়ে দেশ পৰিচালনা কৰে । আৰু এই পৰিচালনা কৰাৰ মূল মঞ্চ হৈছে হ'ল বিধানসভা । চৰকাৰ যিটো দলেই গঠন নকৰক কিয় বিধানসভাৰ মজিয়াত সিদ্ধান্ত গ্ৰহণ কৰাৰ পিছতহে কাম কৰিব পাৰে ।
তদুপৰি অধ্যক্ষগৰাকীয়ে কয় যে, তেওঁ অধ্যক্ষ হোৱাৰ পাছতেই এই অধিৱেশন সকলোৰে বাবে মুকলি কৰি দিছে যাতে ছাত্ৰ-ছাত্ৰীৰ লগতে সাধাৰণ জনতাই যিকোনো সময়ত এইয়া পৰিদৰ্শন কৰিব পাৰে ।
ইতিমধ্যেই দিছপুৰৰ বাহিৰৰ বহু স্থানত কেবিনেট অনুষ্ঠিত হৈছে । যাৰ ফলত ৰাজকোষৰ বহুতো ধন খৰছ হৈছে । এইবাৰ বিধানসভা ৰাজধানীৰ বাহিৰত অনুষ্ঠিত কৰিবলৈ সিদ্ধান্ত লৈছে ।
পিছে দিছপুৰৰ বাহিৰত বিধানসভা অনুষ্ঠিত কৰাৰ উদ্দেশ্য যিয়েই নহওক কিয় এই কাৰ্যই যে ৰাজকোষৰ এক বুজন সংখ্যক ধন ব্যয় কৰিব সেইয়া নিশ্চিত হৈ পৰিছে । কিয়নো ইতিমধ্যেই শাসনাধিষ্ঠ চৰকাৰে ৰাজ্যৰ পৰিচালনাৰ বাবে এক বৃহৎ পৰিমাণৰ ঋণ লৈছে । এনে সময়ত দিছপুৰৰ বাহিৰত বিধানসভা অনুষ্ঠিত কৰাৰ সিদ্ধান্তই পুনৰ ৰাজকোষৰ ধন ব্যয়ত অৰিহণা যোগাব সেইয়া নিশ্চিত হৈ পৰিছে ।
