ডিজিটেল ডেস্কঃ ৰাজ্যত পুনৰ আঙুলি উঠিছে খাকী পোছাকধাৰীৰ বিৰুদ্ধে । এজন খাকী পোছাকধাৰীৰ বিৰুদ্ধে উত্থাপিত হৈছে নাৰী নিৰ্যাতনৰ অভিযোগ । যৌতুক বিচাৰি পত্নীক নিৰ্যাতন চলোৱাৰ লগতে প্ৰাণে মাৰাৰ চেষ্টা চলোৱাৰ অভিযোগ অসম আৰক্ষীৰ একাদশ বেটেলিয়ানত কৰ্মৰত জোৱান ৰূপজ্যোতি হাজৰিকাৰ বিৰুদ্ধে ।
দেৰগাঁৱৰ একাদশ অসম বেটেলিয়ানত কৰ্মৰত ৰূপজ্যোতি হাজৰিকা নামৰ জোৱানজনে কামপুৰ ধিং গাঁৱৰ এগৰাকী যুৱতীক প্ৰেমসূত্ৰে পলুৱাই নিছিল । প্ৰথমে সকলো ঠিকেই আছিল যদিও পাছত সুৰাপান কৰি আহি পত্নীক যৌতুক বিচাৰি অকথ্য নিৰ্যাতন চলোৱাৰ লগতে হত্যা কৰাৰো চেষ্টা চলোৱাৰ অভিযোগ উত্থাপিত হৈছে ।
স্বামীৰূপী আৰক্ষীৰ অত্যাচাৰ সহিব নোৱাৰি মহিলা গৰাকীৰ মাতৃগৃহৰ লোকে দেৰগাঁও আৰক্ষীৰ সহযোগত তেওঁক উদ্ধাৰ কৰি কামপুৰৰ ঘৰলৈ লৈ আনে । এতিয়া যুৱতীগৰাকীৰ লগতে পৰিয়ালৰলোকে ন্যায়ৰ দাবী কৰিছে।
