ডিজিটেল সংবাদ মানকাচৰঃ 'ঋণগ্ৰস্থ চৰকাৰৰ প্ৰতি আস্থা হেৰুৱাইছে জনতাই। কেৱল আঁচনি ঘোষণা কৰিয়ে চৰকাৰে সামৰিছে দায়িত্ব। এ আই ইউ ডি এফৰ প্ৰতি আকৃষ্ট হৈছে সাধাৰণ লোক।'
অসম চৰকাৰৰ দুবছৰীয়া বৰ্ষপূৰ্তি পালনৰ আগনিশা মানকাচৰত এগৰাকী কংগ্ৰেছৰ কাউন্সিলাৰসহ দুই শতাধিক কংগ্ৰেছ আৰু অগপৰ নেতা-কৰ্মীয়ে এ আই ইউ ডি এফত যোগদান কৰাৰ পাছত মানকাচৰৰ বিধায়ক আমিনুল ইছলাম এই দাবী ।
মানকাচৰ সমষ্টিৰ ঝালোৰচৰ গাওঁ পঞ্চায়তত কংগ্ৰেছৰ পৰা নিৰ্বাচিত হোৱা কাউন্সিলাৰ নাৰগিছ খান, তেওঁৰ অভিভাৱক ছামিউল আলম মণ্ডলসহ অঞ্চলটোৰ দুই শতাধিক কংগ্ৰেছৰ কৰ্মী বিধায়ক আমিনুল ইছলামৰ উপস্থিতিত এ আই ইউ ডি এফ দলত যোগদান কৰে।
কাউন্সিলাৰগৰাকীৰ নিজা বাসভৱনত মঙলবাৰে নিশা প্ৰায় ১০ বজাত অনুষ্ঠিত হয় এই যোগদানৰ কাৰ্যসূচী। এই যোগদান সভাতেই বাঘাপাৰা গাওঁ পঞ্চায়তৰ পৰা অহা ৰাঙাপানী এলেকাৰ কেইবাগৰাকী অগপৰ কৰ্মীও এ আই ইউ ডি এফত যোগদান কৰে।
যোগদান কাৰ্যসূচীত বিধায়ক আমিনুল ইছলাম, দলৰ জিলা সভাপতি নজমুল আৰপিনসহ কেইবাগৰাকী দলীয় নেতা-কৰ্মী উপস্থিত আছিল। লক্ষণীয় যে, চৰকাৰ বৰ্ষপূৰ্তি পালনত ব্যস্ত থকাৰ সময়ত এ আই ইউ ডি এফে নিজৰ দল শক্তিশালী কৰাৰ বাবে বৰ্ষপূৰ্তিৰ আগনিশা এইদৰে যোগদান কাৰ্যসূচী ৰূপায়ন কৰা কাৰ্যই বিশেষ তাৎপৰ্য বহন কৰিছে।
