ডিজিটেল ডেস্ক : পৰাগ কুমাৰ দাস । প্ৰবল সম্ভাৱনাময় এক সবল প্ৰতিবাদী কন্ঠ । সাংবাদিকতা, জাতীয়তাবাদী আৰু মানৱ অধিকাৰ কৰ্মী পৰাগ কুমাৰ দাস । সেই পৰাগ কুমাৰ দাসৰ আজি ২৭ সংখ্যক মৃত্যুবাৰ্ষিকী । '৯০ৰ দশকৰ অস্থিৰ অসমত সুস্থিৰ অৰ্থনীতিৰ কথা চিন্তা কৰা পৰাগ কুমাৰ দাস আছিল অসমৰ মানৱ অধিকাৰ আন্দোলনৰ অন্যতম গুৰি ধৰোতাও । কিন্তু কেৱল ইয়াতেই জানো শেষ হয় এনে এগৰাকী ব্যক্তিৰ আলোচনা অথবা সংজ্ঞা ?
দিল্লীৰ ছেইন্ট ষ্টিফেন্স মহাবিদ্যালয়ৰ অৰ্থনীতিত স্নাতক ডিগ্ৰী গ্ৰহণ কৰি দিল্লী স্কুল অৱ ইক'নমিকছৰ পৰা স্নাতকোত্তৰ ডিগ্ৰী গ্ৰহণ কৰিছিল পৰাগ দাসে । অসম আন্দোলনৰ সময়ত সমগ্ৰ ৰাজ্য উত্তাল হৈ থকা সময়ত পাঞ্জাৱ নেছনেল বেংকত ব্যৱস্থাপকৰূপে যোগদান কৰি পৰৱৰ্তী সময়ত গুৱাহাটী ষ্ট'ক এক্সছেঞ্জতো সংস্থাপন লাভ কৰিছিল যদিও ক্ৰমাৎ সাংবাদিকতা আৰু জাতীয়তাবাদী চিন্তা-ধাৰাৰ প্ৰতি ঢাল খাই অহা পৰাগে সেই পদবীৰ পৰা পদত্যাগ কৰি 'অসমীয়া প্ৰতিদিন'ত কাৰ্যবাহী সম্পাদকৰূপে যোগদান কৰিছিল ১৯৯৫ চনত ।
১৯৯৫ চনতহে অসমীয়া প্ৰতিদিনত যোগদান কৰিলেও অসম আন্দোলনৰ পৰা সুদীৰ্ঘ প্ৰায় এটা দশক কিন্তু সাহিত্য-সাংবাদিকতাৰ সৈতে সম্পৰ্ক এটা স্থাপন কৰাত সফল হৈছিল পৰাগ দাস । '৮০ৰ দশকৰ শেষৰফালেই প্ৰান্তিক আৰু দা চেন্টিনেলত সাংবাদিকতা আৰম্ভ কৰা পৰাগ দাসে পৰৱৰ্তী সময়ত সেই সময়ৰ অসমত এক প্ৰকাৰ ক্ৰান্তিৰ সৃষ্টি কৰি আৰম্ভ কৰিছিল সাপ্তাহিক অসমীয়া কাকত "বুধবাৰ" ।
বুধবাৰত সেই সময়ৰ বহু কেইগৰাকী খ্যাত-প্ৰখ্যাত লিখক-সাংবাদিক যেনে দেৱব্ৰত দাস, অৱনী চক্ৰৱৰ্তী,গৌতম বৰা, দিলীপ তামূলী, ডঃ অমৰজ্যোতি চৌধুৰী আদি সমল ব্যক্তিয়ে নিজা চিন্তা-ধাৰা উত্থাপন কৰিছিল । ১৯৯৬ চনৰ ১৭ মে'ত চান্দমাৰীৰ ৰাজগড়ত আততায়ীৰ গুলীত নিহত হোৱা পৰাগ কুমাৰ দাসৰ মৃত্যুত অসমীয়া সমাজে হেৰুৱালে সম্ভাৱনা । যি হয়তো পৰৱৰ্তী সময়ত অসমৰ সামাজিক, ৰাজনৈতিক প্ৰেক্ষাপটত এক গুৰুত্বপূৰ্ণ হৈ পৰিল হয় ।
আজিৰ এই ৰাজনীতি আৰু সমাজনীতিৰ সন্ধিক্ষণত পৰাগ দাসৰ আলোচনা আৰু সমালোচনা দুয়োটাই হোৱা উচিত । উগ্ৰ জাতীয়তাবাদৰ পৰা সুস্থ অৰ্থনৈতিক বিশ্লেষণলৈ সকলো প্ৰাসংগিক-অপ্ৰাসংগিক প্ৰশ্ন পুনৰ উত্থাপন হোৱা উচিত । যিবোৰ প্ৰশ্ন শাসকপক্ষক সুধিবলৈ ৰৈ গ'ল সেইবোৰ সোধা উচিত, যিবোৰ উত্তৰ ৰাইজক দিবলৈ ৰৈ গ'ল সেইবোৰ উত্তৰ দিয়া উচিত ।
চাংলাট ফেনলাৰ পৰা স্বাধীন অসমৰ অৰ্থনীতিলৈ হোৱা বিশ্লষণাত্মক যাত্ৰা কম সময়ৰ ভিতৰতেই সুদীৰ্ঘ । এই সমগ্ৰ যাত্ৰাটিৰ আলোচনা হওক, যিহেতু ভৱিষ্যতেও অসমত জাতীয়তাবাদৰ ইতিহাস আৰু ভৱিষ্যতৰ প্ৰাসংগিকতা থাকিব তেনেস্থলত জাতীয়তাবাদে চৰম হতাশাৰ কৰালগ্ৰাসত পৰাৰ পূৰ্বেই হওক এই আলোচনা ।
