ডিজিটেল ডেস্ক : সামাজিক মাধ্যমত কোন মুহুৰ্তত কেতিয়া কি চৰ্চিত হৈ পৰে সেই কথা জনাৰ সৌভাগ্য আজিলৈ কাৰো হোৱা নাই । বহু সময়ত গুৰুত্বপূৰ্ণ কোনো কথা তল পৰি, চাঞ্চল্যৰ সৃষ্টি কৰে একোটা লঘু ঘটনাই । তেনেদৰেই আৰম্ভ হৈছিল বিশ্বৰ বিখ্যাত পুঁজিপতি ইলন মাস্কৰ তাতোকৈ বিখ্যাত ডগ মীম । নিমিষতে প্ৰচুৰ জনপ্ৰিয়তা অৰ্জন কৰাৰ পাছত ক্ৰিপ্ট' কাৰেন্সীটো আৰম্ভ কৰা হৈছিল ডগ কইন, ঠিক বিটকইনৰ দৰেই ।
শেহতীয়াকৈ পুঁজিপতি গৰাকীয়ে ক্ৰয় কৰিলে টুইটাৰৰ মালিকীস্বত্ব । তাৰ পাছৰে পৰাই বিভিন্ন বিষয়ত নিতৌ নতুন বিতৰ্ক । কেতিয়াবা যদি কৰ্মচাৰী নিলম্বন, কেতিয়াবা আকৌ টুইটাৰৰ বিখ্যাত ব্লু বাৰ্ডৰ ল'গ' সলনিৰ প্ৰতিশ্ৰুতি । মুঠতে যিকোনো প্ৰকাৰে সংবাদ মাধ্যমৰ শীৰ্ষত ইলন মাস্ক ।
সোমবাৰে ৰাতিপুৱা বিখ্যাত মাইক্ৰ' ব্লগিং চাইট টুইটাৰৰ এক নতুন ল'গ' দেখা পালে বিশ্ববাসীয়ে । নীলা চৰাইৰ জেগাত টুইটাৰলৈ সম্ভাষণ জনালে এটি কুকুৰে । এই কুকুৰটি হৈছে বিশ্ববিখ্যাত শ্বিবা ইনু । শ্বিবা ইনু প্ৰজাতিৰ কুকুৰৰ আচৰণৰ বাবে শেহতীয়াকৈ সৃষ্টি কৰা হৈছিল বিভিন্ন মীম । যাৰ বাবেই এতিয়া পুনৰ চৰ্চাৰ শীৰ্ষত ইলন মাস্ক ।
