বিপদ বাঢ়িছে শ্বেইখ হাছিনাৰঃ ১২ ফেব্ৰুৱাৰীত হাজিৰ হ'ব লাগিব ন্যায়ালয়ত

ডিজিটেল ডেস্কঃ বিপদত বাঢ়িছে শ্বেইখ হাছিনাৰ। বাংলাদেশৰ পূৰ্বৰ প্ৰধানমন্ত্ৰী শ্বেইখ হাছিনাৰ বিৰুদ্ধে জাৰি কৰা হৈছে গ্ৰেপ্তাৰী পৰোৱানা। এই গ্ৰেপ্তাৰী পৰোৱানা জাৰি কৰিছে বাংলাদেশৰ আন্তৰ্জাতিক অপৰাধ ট্ৰিবিউনেল চমুকৈ আই চি টিয়ে। 

আৱামী লীগৰ নেত্ৰী হাছিনাৰ উপৰিও তেওঁৰ প্ৰতিৰক্ষা উপদেষ্টা মেজৰ জেনেৰেল (অৱসৰগ্ৰস্ত) তাৰিক আহমেদ চিদ্দিকী আৰু বাংলাদেশ আৰক্ষীৰ প্ৰাক্তন মহাপৰিদৰ্শক বেনজীৰ আহমেদৰ বিৰুদ্ধেও গ্ৰেপ্তাৰী পৰোৱানা জাৰি কৰা হৈছে। জানিব পৰা মতে মুঠ ১২ টা ৱাৰেণ্ট জাৰী কৰা হৈছে।

অভিযোগ অনুসৰি হাছিনাৰ কাৰ্যকালত কেইবাজনো লোকক বিচাৰ নোহোৱাকৈ অপহৰণ কৰি হত্যা কৰা হৈছিল। ন্যায়াধীকৰণৰ মুখ্য অভিযোজক মহম্মদ তাজুল ইছলামে সোমবাৰে নিৰুদ্দেশ আৰু হত্যাৰ সন্দৰ্ভত হাছিনাকে ধৰি ১২ জন লোকৰ বিৰুদ্ধে গোচৰটো দাখিল কৰে। 

পিছত, ন্যায়াধীকৰণৰ অধ্যক্ষ ন্যায়াধীশ মহম্মদ গোলাম মৰ্তুজা মজুমদাৰে হাছিনাৰ বিৰুদ্ধে গ্ৰেপ্তাৰী পৰোৱানা জাৰি কৰে আৰু তেওঁক গ্ৰেপ্তাৰৰ নিৰ্দেশ কাৰ্যকৰী কৰিবলৈ কোৱা হৈছে। তাৰোপৰি হাছিনাসহিতে ১২ জনক অহা ১২ ফেব্ৰুৱাৰীৰ ভিতৰত আদালতত হাজিৰ হ'বলৈ কোৱা হৈছে।

মন কৰিবলগীয়া যে, ইয়াৰ পূৰ্বেও ২০২৪ ৰ অক্টোবৰত, ন্যায়াধীকৰণে সংৰক্ষণ সংস্কাৰ আন্দোলনৰ সময়ত 'গণহত্যা আৰু মানৱতাৰ বিৰুদ্ধে অপৰাধ'ৰ অভিযোগত দাখিল কৰা দুটা গোচৰত হাছিনাকে ধৰি মুঠ ৪৫ জন লোকৰ বিৰুদ্ধে গ্ৰেপ্তাৰী পৰোৱানা জাৰি কৰিছিল।

তদন্তকাৰী সংস্থাক ১৮ নৱেম্বৰ, ২০২৪ ৰ ভিতৰত হাছিনাকে ধৰি সকলো অভিযুক্তক গ্ৰেপ্তাৰ কৰি ন্যায়াধীকৰণৰ সন্মুখত হাজিৰ কৰিবলৈ নিৰ্দেশ দিয়া হৈছিল। উল্লেখ্য যে,  ১৯৭১ চনৰ মুক্তি যুদ্ধৰ সময়ত মানৱতাৰ বিৰুদ্ধে অপৰাধৰ গোচৰৰ বিচাৰ কৰিবলৈ ২০১০ চনত হাছিনাৰ কাৰ্যকালত আন্তৰ্জাতিক অপৰাধ ন্যায়াধিকৰণ গঠন কৰা হৈছিল। 

১৯৭১ চনত মানৱতাৰ বিৰুদ্ধে অপৰাধৰ বাবে ইতিমধ্যে এই ন্যায়াধীকৰণত বহুলোকৰ বিচাৰ কৰা হৈছে। মৃত্যুদণ্ডকে ধৰি বিভিন্ন চৰ্তৰে কাৰাদণ্ডও বিহা হৈছে। সেই ন্যায়াধীকৰেই এইবাৰ হাছিনাৰ কাৰ্যকালত মানৱতাৰ বিৰুদ্ধে অপৰাধত হাছিনাকে ধৰি এই লোকসকলৰ বিৰুদ্ধে বিৰুদ্ধে গ্ৰেপ্তাৰ পৰোৱানা জাৰি কৰিছে।