ডিজিটেল ডেস্ক : পৃথিৱীত প্ৰায় ৭ হেজাৰটা মুখ্য ভাষা বৰ্তমান প্ৰচলিত । আছে কেইবা লক্ষাধিক শব্দ । ভাষা যদি এখন নৈ হয় তেন্তে সেই নৈত অবিশ্ৰান্তভাৱে বৈ থকা পানী হ'ব শব্দ । সেই ভাষা আৰু শব্দৰ বাবে যদি এটি সম্পূৰ্ণ সংগ্ৰহালয় নিৰ্মাণ কৰা হয় ?
২০২০ চনৰ মে' মাহত আমেৰিকা যুক্তৰাষ্ট্ৰৰ ৱাশ্বিংটন চহৰত নিৰ্মাণ কৰা হৈছিল এই 'প্লেনেট ৱৰ্ড' নামৰ সংগ্ৰহালয়টো । মুঠ ১১ টাকৈ প্ৰদৰ্শনীৰ জৰিয়তে বিশ্বৰ বিভিন্ন ভাষা আৰু শব্দসমূহ প্ৰদৰ্শন কৰা হয় দৰ্শকক । ৱাশ্বিংটন ডি চি ৰে ফ্ৰেংকলিন নামৰ এখন বিদ্যালয়ত অৱস্থিত এই সংগ্ৰহালয়টো মুকলি সমগ্ৰ বিশ্বৰ বাবে । য'ত বিভিন্ন উপায়েৰে দৰ্শক সকলক পৰিচয় কৰোৱা হয় বিভিন্ন ভাষা আৰু শব্দৰ সমূহৰ সৈতে ।
এই প্ৰদৰ্শনী সমূহৰ এখনত দৰ্শক সকলক এখন স্ক্ৰীণত শব্দৰ সহায়ৰে আঁকিবলৈ দিয়া হয় যিকোনো দৃশ্য, পৰৱৰ্তী সময়ত সেই দৃশ্যসমূহ নিজেই হৈ পৰে একোখন ধুনীয়া ছবি ।
আন এক প্ৰদৰ্শনীত আছে ২২ ফুট উচ্চতাৰ এখন দেৱাল য'ত আছে প্ৰায় ১০০০ টা শব্দ । দৰ্শকক প্ৰতিটো শব্দৰেই ইতিহাস আৰু তাৰ অন্তৰালৰ কাহিনী কয় দেৱালখনে ।
কেৱল এয়াই নহয় বৰং মাৰ্টিন লুথাৰ কিং জুনিয়ৰ তথা জন এফ কেনেডীৰো প্ৰখ্যাত বক্তব্যসমূহ শুনিবলৈ পাব দৰ্শকে ।
