ডিজিটেল সংবাদ, ৱাখা : ৰবিবাৰে মণিপুৰৰ ইম্ফলত সামৰণি পৰে জি-২০ আলোচনা মঞ্চৰ বিজনেছ-২০ সন্মিলনৰ প্ৰথমখন বৈঠক। কেন্দ্ৰীয় বাণিজ্য আৰু উদ্যোগ মন্ত্ৰালয়ৰ উদ্যাগত অনুষ্ঠিত তিনিদিনীয়া জি ২০বিজনেছ সন্মিলনত বিশ্বৰ ২৩খন দেশৰ এশৰো অধিক প্ৰতিনিধিয়ে অংশগ্ৰহণ কৰে। এই তিনিদিনীয়া সন্মিলনত তথ্য আৰু যোগাযোগ প্ৰযুক্তি (আইচিটি), পৰ্যটন, স্বাস্থ্যসেৱা আৰু হস্ততাঁতত বহুপক্ষীয় ব্যৱসায়িক অংশীদাৰিত্বৰ সুযোগ সম্পৰ্কে আলোচনা কৰা হয়। সন্মিলনৰ প্ৰথমদিনা জি-২০ আৰু অন্যান্য দেশৰ প্ৰতিনিধিসকলে পূৰ্ণাংগ ভাষণ দিয়ে।
ৰবিবাৰে প্ৰতিনিধিসকলে মণিপুৰৰ আই এন এ মেম’ৰিয়েল কমপ্লেক্স আৰু দক্ষিণ এছিয়াৰ অন্যতম বৃহৎ মিঠা পানীৰ হ্ৰদ লোকটক হ্ৰদ ঐতিহাসিক আৰু বিখ্যাত পৰ্যটনস্থলীসমূহ ভ্ৰমণ কৰে । তদুপৰি প্ৰতিনিধিসকলে মহিলাসকলৰ দ্বাৰা পৰিচালিত বিখ্যাত "ইমা কেইথল বা ইমা মাৰ্কেট" পৰিদৰ্শন কৰে।
উল্লেখ্য যে এই বিজনেছ ২০ৰ সন্মিলনৰ লক্ষ্য হৈছে উত্তৰ-পূব অঞ্চলটোৱে বিশ্ব আৰু স্থানীয় বিনিয়োগকাৰীসকলৰ বাবে আগবঢ়োৱা সম্ভাৱনাসমূহ প্ৰদৰ্শন কৰাৰ লগতে উত্তৰ-পূব ৰাজ্যসমূহৰ মূল শক্তি থকা উদ্যোগ খণ্ডসমূহত বহুপক্ষীয় ব্যৱসায়িক অংশীদাৰিত্বৰ সুযোগসমূহ দাঙি ধৰা।
জি২০ সন্মিলনৰ বিজনেছ২০ ইম্ফল বৈঠকৰ সন্দৰ্ভত মুখ্যমন্ত্ৰী এন বীৰেনে কয় যে জি-২০ৰ সৈতে জড়িত মণিপুৰত অনুষ্ঠিত বি-২০ অধিবেশনত অংশগ্ৰহণ কৰা বিদেশী প্ৰতিনিধিৰ পৰা মণিপুৰে ইতিবাচক সঁহাৰি লাভ কৰিবলৈ আৰম্ভ কৰিছে । মণিপুৰত জি-২০ শীৰ্ষ সন্মিলনৰ অংশ হিচাপে বি-২০ অধিবেশনৰ আয়োজনত সন্তোষ প্ৰকাশ কৰি মুখ্যমন্ত্ৰী এন বীৰেন সিঙে কয় যে আমেৰিকাৰ এটা প্ৰখ্যাত কোম্পানীয়ে মণিপুৰত ৫০০ মাৰ্কিন মিলিয়ন ডলাৰ বিনিয়োগ কৰাৰ আশ্বাস দিছে।
এই সন্মিলনত পৰ্যটন, স্বাস্থ্য, হস্ততাঁত, হস্তশিল্পৰ দৰে বিভিন্ন খণ্ডত ৰাজ্যখনৰ ক্ষমতা থকা ক্ষমতা প্ৰদৰ্শনৰ সুযোগ প্ৰদান কৰা হয়। আনহাতে আৰ্জেণ্টিনা আৰু পেৰুৱে নিজৰ দেশত মণিপুৰৰ সু-প্ৰশিক্ষিত নাৰ্ছ নিয়োগ কৰাৰ আগ্ৰহ প্ৰকাশ কৰিছে ।আৰ্জেণ্টিনাই মণিপুৰত ফুটবল খেল প্ৰচাৰত সহযোগিতা আগবঢ়োৱাৰ প্ৰতিশ্ৰুতি দিছে।
