অসম আৰু নাগালেণ্ডৰ সংগঠনৰ গুৰুত্বপূৰ্ণ বৈঠক

ডিজিটেল সংবাদ, বেকাজানঃ যোৱা ২৩ ছেপ্টেম্বৰত নাগালেণ্ডৰ মন জিলাৰ অন্তৰ্গত আংজাংয়াং আৰু লংচিঙৰ বস্তিৰ মাজৰ পথত দুজন অসমীয়া যুৱকৰ মৃত্যুক কেন্দ্ৰ কৰি অসম-নাগালেণ্ড সীমান্তত উদ্ভৱ হোৱা উত্তেজনামূলক পৰিস্থিতি নিয়ন্ত্ৰণৰ উদ্দেশ্য শনিবাৰে নাগালেণ্ডৰ মন জিলা আৰু অসমৰ চৰাইদেউ জিলাৰ নাগৰিক সমাজৰ সংগঠনসমূহৰ মাজত এখনি গুৰুত্বপূৰ্ণ আলোচনা হয়।

নাগালেণ্ডৰ মন জিলাৰ কন্যাক ইউনিয়নৰ টিজিট শাখাৰ কাৰ্যালয়ত অনুষ্ঠিত বৈঠকৰ সময়ত কেতবোৰ গুৰুত্বপূৰ্ণ প্ৰস্তাৱ গ্ৰহণ কৰা হয়। প্ৰস্তাৱ অনুসৰি যদি প্ৰত্যাশিত ফৰেনছিক প্ৰতিবেদনে এই ঘটনাক হত্যাকাণ্ড বুলি প্ৰমাণিত কৰে তেন্তে দুয়োপক্ষই জিলা প্ৰশাসন আৰু আৰক্ষীক অতি সোনকালে দোষীসকলক গ্ৰেপ্তাৰ কৰিবলৈ দাবী জনাব। দুয়োপক্ষই সমস্যাসমূহ তৎকালীন আৰু সৌহাৰ্দ্যপূৰ্ণভাৱে সমাধান কৰিবলৈ সক্ষম কৰিব। দুয়োপক্ষৰ পৰা উদ্ভৱ হ’ব পৰা যিকোনো সাম্প্ৰদায়িক বিষয় হিচাপে লোৱা নহ’ব বুলিও দুই পক্ষই সংকল্প লয়। বৰঞ্চ আইনৰ বিধানসমূহ মানি চলি এনে বিষয়সমূহ আইনীভাৱে সমাধানৰ বাবে একেলগে কাম কৰিব। এই পন্থাই ন্যায়ৰ প্ৰাধান্য লাভ কৰাটো নিশ্চিত কৰিব আৰু সংঘাতৰ সমাধান ন্যায্য আৰু নিৰপেক্ষভাৱে কৰা হ’ব। দুয়োপক্ষই একমত প্ৰকাশ কৰে।

দুয়োখন ৰাজ্যৰ নিজৰ সংস্থাসমূহৰ মাজত নিয়মীয়া যোগাযোগ আৰু সমন্বয় বজাই ৰখাৰ গুৰুত্বক স্বীকাৰ কৰি দুয়োপক্ষই সেয়েহে প্ৰয়োজন অনুসৰি সময়ে সময়ে সমন্বয়ৰ বৈঠক অনুষ্ঠিত কৰাৰ সিদ্ধান্ত লৈছে। ইয়াৰ উপৰিও সিদ্ধান্ত লয় যে পৰৱৰ্তী বৈঠকত প্ৰস্তাৱ আৰু কাৰ্যকাৰিতাৰ ওপৰত আলোচনা কৰা হ’ব ।পাৰস্পৰিকভাৱে সহমতত উপনীত হয় যে ৰাজ্যৰ সম্প্ৰদায়ৰ মাজত শান্তি, ঐক্য আৰু সুসম্পৰ্কৰ প্ৰসাৰৰ ক্ষেত্ৰত এখন যৌথ কাৰ্য্য সমিতি গঠন কৰা হ’ব।

পৰৱৰ্তী বৈঠক ১০ অক্টোবৰত অনুষ্ঠিত হ’ব। দুয়োটা সংগঠনে শান্তি আৰু ঐক্যৰ পোষকতা কৰাৰ লগতে আহোম জনগোষ্ঠী আৰু কন্যাক নগা জনগোষ্ঠীৰ সম্পৰ্কও সুদৃঢ় কৰাৰ সংকল্প গ্ৰহণ কৰে। এই প্ৰস্তাৱত স্বাক্ষৰকাৰীসকলৰ ভিতৰত আছে কন্যাক ইউনিয়নৰ মন জিলাৰ সভাপতি টিংথক কনিয়াক, টি নোক্লেম কন্যাক, টাইপা চৰাইদেউৰ সভাপতি ভবানন্দ বৰগোহাঁই আৰু কে ইউ টিজিত ইউনিটৰ সভাপতি টি ৱাংদুন ৱাংছাহুম আৰু আটাছু চৰাইদেউৰ সভাপতি খীৰোদ বৰগোহাঁইয়ে।

উল্লেখযোগ্য যে নাগালেণ্ডৰ মন জিলাৰ অন্তৰ্গত আংজাংইয়াঙত ২৩ ছেপ্টেম্বৰৰ চৰাইদেউৰ এজন চালক আৰু হেণ্ডিমেনে প্ৰাণ হেৰুৱাইছিল। এই ঘটনাক হত্যাকাণ্ড বুলি অভিযোগ উত্থাপিত হোৱাত অসম-নাগালেণ্ড সীমান্তত উত্তপ্ত পৰিস্থিতি সৃষ্টি হৈছিল।