বৰ্ণিল লোককৃষ্টিৰে নগা ঐতিহ্য গাঁৱত আৰম্ভ ২৫সংখ্যক হৰ্ণবিল মহোৎসৱ...

কিচামাৰ পৰা মণ্টুচ্ কোঁৱৰঃ নাগালেণ্ডে আজি ৬২ সংখ্যক ৰাজ্য স্থাপনা দিৱস উদযাপন কৰে । ৰাজধানী ক'হিমাৰ অসামৰিক সচিবালয়ৰ প্লাজাত  মুখ্যমন্ত্ৰী নেইফিউ ৰিঅ'ই মুখ্য অতিথি হিচাপে অংশগ্ৰহণ কৰি  ৬২ সংখ্যক ৰাজ্য প্ৰতিষ্ঠা দিৱসৰ শুভেচ্ছা জনায়।  ৰিঅ'ই কয়  উন্নয়নৰ বাবে শান্তিৰ প্ৰয়োজন ।

তেওঁ  প্ৰতিজন নাগৰিকক ৰাজ্যখনক অধিক উচ্চতালৈ লৈ যাবলৈ একেলগে চেষ্টা কৰিবলৈ আহ্বান জনায়। নগা ৰাজনৈতিক সমস্যা সমাধানৰ ওপৰত গুৰুত্ব আৰোপ কৰি ৰিঅ'ই কয় যে ২০২৪ চনৰ ১৬ নৱেম্বৰৰ কেবিনেট বৈঠকত লোৱা সিদ্ধান্তৰ ওপৰত কাম কৰি আছে। ইতিমধ্যে নগা শান্তি আলোচনাৰ সন্দৰ্ভত যোৱা ২১ নৱেম্বৰত কেন্দ্রীয় গৃহমন্ত্রীক সাক্ষাৎ কৰে। নগা ৰাজনৈতিক সমস্যা সমাধান কৰাৰ বাবে এন এছ চি এন (আই এম)ৰ মুখ্য ৰাজনৈতিক আলোচনাপন্থীৰে আলোচনা অব্যাহত থকাৰ উপৰিও আৰু নতুন এন জি গোট গঠনকৰা হৈছে ।

ৰিঅ'ই কয় যে হৰ্ণবিল উৎসৱৰ ২৫ সংখ্যক সংস্কৰণ উদযাপনে হৰ্ণবিল উৎসৱৰ শক্তি বৃদ্ধি কৰাৰ লগতে  ৰাজ্যৰ অৰ্থনীতি বৃদ্ধি কৰাত সহায় কৰিছে। তেওঁ লগতে কয় যে পৰ্যটকৰ ক্ৰমাৎগত বৃদ্ধিৰ বাবে নগা হেৰিটেজ গাঁৱৰ কিছামাত নতুনকৈ ৫ হাজাৰতকৈ অধিক আসনৰ ক্ষমতা থকা এখন নতুন গেলেৰী নিৰ্মাণ কৰা হৈছে। ৰিঅ'ই ঘোষণা কৰে যে উৎসৱৰ বিষয়ে সময় সূচী, আৰু তথ্য প্ৰদান কৰা হৰ্ণবিল এপ মুকলি কৰা হৈছে।

তেওঁ লগতে কয় যে স্থানীয় ট্যুৰ অপাৰেটৰ আৰু হোম ষ্টেৰ মালিকসকলক সহায় কৰিবলৈ নাগালেণ্ডৰ বিনিয়োগ উন্নয়ন কৰ্তৃপক্ষৰ সহযোগত নতুন টুৰিষ্ট কানেক্ট আঁচনি প্ৰৱৰ্তন কৰা হৈছে। ইয়াৰ উপৰিও উৎসৱৰ চৌহদৰ ভিতৰত মানুহে যাত্ৰা কৰিব পৰাকৈ শ্বাটল বাছ সেৱাৰ ব্যৱস্থা কৰা হৈছিল যাতে সকলো দর্শকে উৎসৱটো সম্পূৰ্ণৰূপে উপভোগ কৰিব পাৰে। ৰিঅ'ই মন্তব্য কৰে যে প্ৰায় দুটা দশকৰ পাছত পৌৰসভাৰ  নির্বাচন অনুষ্ঠিত হৈছে।

ইতিমধ্যে মহিলাসকলৰ ৩৩% সংৰক্ষণ কাৰ্যকৰী কৰা হৈছে । ফলস্বৰূপে, ১০৩গৰাকী মহিলা কাউন্সিলাৰকে ধৰি ২৫টা ইউএলবিত ২৭৮গৰাকী কাউন্সিলাৰ নিৰ্বাচিত হৈছে।  ৰাজ্য চৰকাৰে মন জিলাত কন্যাক ঐতিহ্য কমপ্লেক্স নিৰ্মাণৰ কাম আৰম্ভ কৰিছে, উত্তৰ-পূব পৰিষদৰ অধীনত, যিটো পৰম্পৰাগত কন্যাক নগাৰ স্থাপত্য, ভাস্কৰ্য্য, পৰম্পৰা, আৰু সাংস্কৃতিক ঐতিহ্য সংৰক্ষণ আৰু প্ৰচাৰৰ বাবে এক অগ্ৰণী প্রচেষ্টা, ৰিঅ'ই লগতে কয়।

ৰিঅ'ই উল্লেখ কৰে যে এক শক্তিশালী আৰু নিৰ্ভৰযোগ্য শক্তি উৎপাদনৰ বাবে  ২০৩০ চনৰ ভিতৰত ৰাজ্যখনৰ ৩৬০ মেগা ৱাটৰ প্ৰকল্পৰ বাবে শক্তি বিভাগে কেন্দ্রীয় বিদ্যুৎ কর্তৃপক্ষৰ শক্তি মন্ত্ৰালয়ৰ সৈতে এক  পৰিকল্পনা চূড়ান্ত কৰিছে। হৰ্ণবিল উৎসৱৰ লগত সংগতি ৰাখি বার্ষিক মাইকিফেষ্ট  আয়োজন কৰা হৈছে । য'ত কিছামাত নাগা জনজাতীয় ডিজাইনৰ ওপৰত এখন প্রদর্শনী প্ৰদৰ্শন কৰা হ'ব।

ইয়াৰ উপৰিও নাগা মহিলাসকলক সবলীকৰণৰ বাবে মহিলা সম্পদ উন্নয়ন বিভাগে জালুকিত থকা উদ্যোগ স্থাপন কৰা হৈছে ।  মুখ্যমন্ত্ৰী ৰিঅ'ই কয় যে নতুন আৰু নবীকৰণযোগ্য শক্তি বিভাগে জৰীপ সম্পূৰ্ণ কৰিছে আৰু ৱখা জিলাৰ নামনি দৈয়াঙত এইচ  ই পিৰ উন্নয়নৰ বাবে জৰীপৰ কাম সম্পূৰ্ণ হৈছে । ডাউনস্ট্রিম  প্রকল্পৰ প্রতিবেদন (ডি পি আৰ) সাজু হৈছে।  

ইফালে বিয়লি চাৰি বজাত নগা ঐতিহ্য গাঁৱ কিছামাত  নাগালেণ্ডৰ অন্যতম চিনাকি সাংস্কৃতিক অনুষ্ঠান হৰ্ণবিল ফেষ্টিভেলৰ ২৫ সংখ্যক সংস্কৰণ আজিৰে পৰা আৰম্ভ হৈছে ৰাজ্যখনৰ চহকী সাংস্কৃতিক ঐতিহ্যক বিশ্ব মঞ্চত প্ৰদৰ্শন কৰাৰ উদ্দেশ্যৰে প্ৰত্যেক বছৰৰ নাগালেণ্ডৰ প্ৰতিষ্ঠা দিৱসৰ সৈতে সংগতি ৰাখি ১ ডিচেম্বৰৰ পৰা ১০ ডিচেম্বৰ লৈ অনুষ্ঠিত কৰি আহিছে হৰ্ণবিল মহোৎসৱ।    

আজি হৰ্ণবিল উৎসৱ ৰ উদ্বোধনী অনুষ্ঠানত ভাষণ দি নাগালেণ্ডৰ ৰাজ্যপাল লা গণেছনে কয় যে ৰাজ্যখনে উৎসৱৰ ২৫ বছৰ সম্পূৰ্ণ কৰাৰ লগে লগে ই বৈচিত্ৰ্যত ঐক্যক উদযাপন কৰাৰ লগতে পাৰস্পৰিক সন্মান আৰু বুজাবুজিৰে সমৃদ্ধ এক  ভৱিষ্যতৰ দিশত আগবাঢ়ি যোৱাৰ এক মুহূৰ্ত বুলিও তেওঁ কয়।

আনহাতে  নাগালেণ্ডৰ  মুখ্যমন্ত্ৰী নেইফিউ ৰিঅ’ই উৎসৱৰ ভূমি আৰু হৰ্ণবিল উৎসৱলৈ সকলো দৰ্শনাৰ্থীক আদৰণি জনায়।  অংশীদাৰ দেশসমূহ —আমেৰিকা, পেৰু, জাপান, আৰু ৱেলছ, আৰু অংশীদাৰ ৰাষ্ট্ৰসমূহ তেলেংগানা আৰু ছিকিমৰ আদৰণি জনাই মিষ্টাৰ ৰিঅ’ই কয় যে তেওঁলোকৰ উপস্থিতিয়ে এই অনুষ্ঠানত যথেষ্ট তাৎপৰ্যপূৰ্ণ কৰি তুলিছে। মহোৎসৱত আমেৰিকা, ব্ৰিটেইন  পেৰুকে  ধৰি চাৰিখন  দেশৰ অংশীদাৰৰ ৰাষ্ট্ৰদূতসকলেও সভাত ভাষণ দিয়ে।  

পদ্ম ভূষণ, গ্ৰেমী, আৰু অস্কাৰ বিজয়ী সুৰকাৰ ড° এ আৰ ৰহমানেও ভাষণ দিয়ে। ইফালে হৰ্ণবিল মহোৎসৱৰ ৰূপালী জয়ন্তীত ভৰি দিয়াত পূৰ্বতকৈ বৃহৎ পৰিসৰ আয়োজন কৰি ইতিমধ্যে দেশী-বিদেশী পৰ্যটক আকৰ্ষণ কৰিব পৰাকৈ সজাই তোলা হৈছে। ইফালে নাগালেণ্ডৰ লোককৃষ্টিৰ সমাহাৰ এই হৰ্ণবিল উৎসৱ উপভোগ কৰিবলৈ কিচামাৰ বাকৰিলৈ পৰ্যটকৰ সোঁত ববলৈ আৰম্ভ কৰিছে।