ডিজিটেল ডেস্কঃ উত্তৰ প্ৰদেশৰ বাৰনাসীত বুধবাৰে পুৱা এক ভয়ংকৰ দুৰ্ঘটনা সংঘটিত হয়। দুৰ্ঘটনাটোৰ ফলত একেটা পৰিয়ালৰে ৮ জন লোকৰ মৃত্যু হোৱাৰ উপৰি এটি ৩ বছৰীয়া শিশু গুৰুতৰভাৱে আঘাতপ্ৰাপ্ত হয়। এৰ্টিগা বাহনখনে ট্ৰাকত খুন্দা মৰাৰ ফলত এই দুৰ্ঘটনা সংঘটিত হোৱা বুলি জানিব পৰা গৈছে।
দুৰ্ঘটনাৰ পাছতে আৰক্ষী ঘটনাস্থলীত উপস্থিত হৈ মৃতদেহ উদ্ধাৰ কৰিছে। জানিব পৰা মতে ৩ বছৰীয়া শিশুটিৰ বাহিৰে গাড়ীত থকা আটাইকেইজন লোকৰ মৃত্যু হয়। মৃত্যু হোৱা লোককেইজন পীলভীটৰ আছিল।
আজি পুৱা কাশী বিশ্বনাথ দৰ্শন কৰি বনাৰসৰ জৌনপুৰলৈ গৈ থকাৰ অৱস্থাত এই দুৰ্ঘটনা সংঘটিত হয়। ইতিমধ্যে তেওঁলোকৰ সম্পৰ্কীয়লোকক আৰক্ষীয়ে খবৰ দিছে।
উত্তৰ প্ৰদেশৰ মুখ্যমন্ত্ৰীয়ে ঘটনাৰ ওপৰত শোক প্ৰকাশ কৰি মৃতকলৈ শ্ৰদ্ধাঞ্জলি জনাইছে। লগতে শিশুটিৰ সুস্বাস্থ্য় কামনা কৰিছে। বৰ্তমান আঘাতপ্ৰাপ্ত শিশুটিৰ চিকিৎসা চলি আছে।
