Swiggy Genie সেৱা স্থগিতঃ জনপ্ৰিয় হৈ পৰিছে ব'ল্ট সেৱা...

ডিজিটেল ডেস্কঃ ভাৰতৰ অন্যতম জনপ্ৰিয় ফুড ডেলিভাৰী এপ ছুইগিয়ে বহু চহৰত তেওঁলোকৰ Genie সেৱা সাময়িকভাৱে বন্ধ কৰি দিছে। Swiggy Genie ৰ ব্যৱহাৰ চহৰৰ ভিতৰত এঠাইৰ পৰা আন এঠাইলৈ সামগ্ৰী প্ৰেৰণ কৰিবলৈ ব্যৱহাৰ কৰা হৈছিল।

দেশৰ প্ৰায় ৭০খন চহৰত এই সেৱা উপলব্ধ আছিল যদিও এতিয়া বেছিভাগ চহৰতে এই সেৱা বন্ধ হৈ পৰিছে। অৱশ্যে আনুষ্ঠানিকভাৱে এই সম্পৰ্কে কোনো কথা ঘোষণা কৰা হোৱা নাই। ব্যৱহাৰকাৰীসকলে ইয়াক ব্যৱহাৰ কৰিবলৈ চেষ্টা কৰাৰ সময়ত এই সেৱা সাময়িকভাৱে উপলব্ধ নহয় বুলি এপৰ জৰিয়তে জানিব পাৰিছে।

এই সন্দৰ্ভত সামাজিক মাধ্যমত ব্যৱহাৰকাৰীসকলে প্ৰশ্ন কৰাত ছুইগিৰ ফালৰ পৰা উত্তৰ দি কয় যে, Swiggy Genie কিছু কাৰিকৰী সমস্যাৰ বাবে সাময়িকভাৱে স্থগিত ৰখা হৈছে। তেওঁলোকে কেতিয়া এই সেৱা পুনৰ ঘূৰি আহিব তাৰ কোনো স্পষ্ট সময় উল্লেখ কৰা নাই।

আমোদজনকভাৱে ছুইগিয়ে এই সেৱা স্থগিত ৰখাৰ সময়তে আকৌ ছুইগি ব’ল্ট নামৰ নতুন সেৱা সম্প্ৰসাৰণ আৰম্ভ কৰিছে। এই সেৱাৰ জৰিয়তে ১০ মিনিটৰ ভিতৰতে খাদ্য ডেলিভাৰীৰ ওপৰত গুৰুত্ব দিয়া হৈছে।ছুইগি ব’ল্টে এতিয়া সৰু চহৰ (টায়াৰ-II আৰু টায়াৰ-III চহৰ)কে ধৰি ৫০০ খনতকৈও অধিক চহৰত কাম আৰম্ভ কৰিছে। 

এই সেৱাই অংশীদাৰ ৰেষ্টুৰেণ্টৰ পৰা ২ কিলোমিটাৰৰ ভিতৰত ‘ৰেডি টু ইট’ খাদ্য ডেলিভাৰী কৰিব। মাত্ৰ ১০ মিনিটতে খাদ্য যোগান ধৰাৰ প্ৰতিশ্ৰুতি দিয়া হৈছে এই সেৱাৰ জৰিয়তে। ইতিমধ্যে ব’ল্টৰ সৈতে ৪৫ হাজাৰৰো অধিক ৰেষ্টুৰেণ্টৰ অংশীদাৰ হৈছে। তাৰ ভিতৰত আছে মেকড’নাল্ডছ, কেএফচি, ছাবৱে, বাৰ্গাৰ কিঙৰ দৰে জনপ্ৰিয় প্ৰতিষ্ঠানো।

ব’ল্টৰ বাবেই ছুইগিৰ অৰ্ডাৰ বৃদ্ধি পোৱাও দেখা গৈছে। বৰ্তমান এপটোত প্ৰতি ১০ টা অৰ্ডাৰৰ ভিতৰত ১ টা অৰ্ডাৰ ব’ল্টৰ জৰিয়তে আহে। ইয়াৰ পৰা দেখা যায় যে ছুইগিয়ে দ্ৰুত খাদ্য ডেলিভাৰীৰ স্থানত অধিক বৃদ্ধিৰ চেষ্টা কৰিছে।

ইফালে ছুইগিৰ উপাৰ্জনো বৃদ্ধি পাইছে। ২০২৩ চনৰ শেষৰ ত্ৰৈমাসিকত ই ৩,৯৯৩ কোটি টকা উপাৰ্জন কৰিছিল, যি পূৰ্বৰ বছৰৰ তুলনাত ৩১ শতাংশ বৃদ্ধি। অৱশ্যে কিছু কিছু ক্ষেত্ৰত কোম্পানীটো কিছু লোকচানৰো সন্মুখীন হৈছে।