কুম্ভমেলাৰ গংগাৰ পানী স্নান কৰাৰ বাবে উপযোগী নহয়ঃ কেন্দ্ৰৰ প্ৰতিবেদনতে চাঞ্চল্যকৰ তথ্য...

ডিজিটেল ডেস্কঃ প্ৰয়াগৰাজত চলি থকা কুম্ভ মেলাত স্নান কৰিবলৈ দেশ-বিদেশৰ কোটি কোটি লোকৰ আগমণ ঘটিছে যদিও শেহতীয়াকৈ কেন্দ্ৰৰে এক প্ৰতিবেদনত প্ৰকাশ পাইছে চাঞ্চল্যকৰ তথ্য। তথ্য অনুসৰি প্ৰয়াগৰাজৰ গংগা পানী স্নান কৰাৰ বাবে উপযুক্ত নহয়।

ৰাষ্ট্ৰীয় পৰিবেশ আদালতক এই বিষয়ে জনাইছে কেন্দ্ৰীয় প্ৰদূষণ নিয়ন্ত্ৰণ পৰিষদে। কেন্দ্ৰীয় পৰিবেশ মন্ত্ৰণালয়ৰ অধীনস্থ পৰিষদৰ প্ৰতিবেদন ৰাষ্ট্ৰীয় পৰিবেশ আদালতে লাভ কৰাৰ পাছতে উত্তৰ প্ৰদেশ চৰকাৰক তলব কৰিছে।

১৯ ফেব্ৰুৱাৰী, বুধবাৰে উত্তৰ প্ৰদেশ প্ৰদূষণ নিয়ন্ত্ৰণ পৰিষদৰ বিষয়াক ভাৰ্ছুৱেল মাধ্যমেৰে আদালতত হাজিৰ হৈ বিষয়টোৰ সন্দৰ্ভত ব্যাখ্যা আগবঢ়াবলৈ নিৰ্দেশ দিয়া হৈছে। কেন্দ্ৰীয় প্ৰদূষম নিয়ন্ত্ৰণ পৰিষদৰ সেই প্ৰতিবেদনত আশংকা কৰা হৈছে কুম্ভমেলাৰ সময়ত গংগা নদীৰ পানীত বেক্টেৰিয়াৰ পৰিমাণ বৃদ্ধি পোৱাৰ সম্ভাৱনা প্ৰৱল হৈ পৰিছে।

ইণ্ডিয়া টুডেত প্ৰকাশিত খবৰ অনুসৰি কেন্দ্ৰৰ সেই প্ৰতিবেদনত কোৱা হৈছে, ১২ আৰু ১৩ জানুৱাৰীত প্ৰয়াগৰাজৰ গংগাৰ নদীৰ পানী পৰীক্ষা কৰা হৈছিল।তাত দেখা গৈছে, বায়’কেমিকেল অক্সিজেন ডিমাণ্ডৰ ক্ষেত্ৰত সেই পানী স্নানৰ বাবে উপযুক্ত নহয়।

প্ৰয়াগৰাজৰ গংগাৰ পানী কেইবাবাৰো পৰীক্ষা কৰা দেখা গৈছে। এই সময়ত প্ৰমাণিত হৈছে কলিফৰ্ম বেক্টেৰিয়াৰ স্তৰৰ বাবে এই পানী গা ধোৱাৰ বাবে উপযুক্ত নহয়।

কেন্দ্ৰৰ এই প্ৰতিবেদনে সতৰ্ক কৰি দিছে কুম্ভমেলাৰ সময়ত ভক্তৰ ভিৰৰ বাবে পানীত বেক্টেৰিয়াৰ পৰিমাণ আৰু বৃদ্ধি হৈছে। বিশেষকৈ 'শ্বাহি স্নান'ৰ সময়ত এই বেক্টেৰিয়াৰ পৰিমাণ যথেষ্ট বৃদ্ধি পাইছিল। 

উল্লেখ্য যে, পানীত কলিফৰ্ম বেক্টেৰিয়াৰ উপস্থিতি আৱৰ্জনা বৃদ্ধি হোৱাৰ পৰা বৃদ্ধি পায়। কেন্দ্ৰীয় প্ৰদূষণ নিয়ন্ত্ৰণ ব'ৰ্ডৰ মতে, প্ৰতি ১০০ মিলিলিটাৰ পানীত সৰ্বাধিক ২,৫০০  কলিফৰ্ম বেক্টেৰিয়া থাকিলেও সেয়া ক্ষতিকাৰক নহয়।

অৱশ্যে, প্ৰয়াগৰাজৰ পানীত পোৱা শৌচ কলিফৰ্মৰ পৰিমাণ প্ৰকাশ কৰা হোৱা নাই। ৰাষ্ট্ৰীয় পৰিৱেশ আদালতৰ ন্যায়াধীশ প্ৰকাশ শ্ৰীবাস্তৱৰ নেতৃত্বত গঠিত এজনীয়া বিচাৰপীঠে এই প্ৰতিবেদন পৰীক্ষা কৰিছে আৰু উত্তৰ প্ৰদেশ প্ৰদূষণ নিয়ন্ত্ৰণ ব'ৰ্ডৰ পৰা ব্যাখ্যা বিচাৰিছে।

ন্যায়াধীশ শ্ৰীবাস্তৱ পূৰ্বে কলকাতা উচ্চ ন্যায়ালয়ৰ মুখ্য ন্যায়াধীশ আছিল। আদালতে জানিব বিচাৰিছে উত্তৰ প্ৰদেশ প্ৰদূষণ নিয়ন্ত্ৰণ পৰিষদে গংগাৰ প্ৰদূষণ হ্ৰাস কৰিবলৈ কি পদক্ষেপ গ্ৰহণ কৰিছে? তাৰোপৰি আদালতে উত্তৰ প্ৰদেশ প্ৰশাসনক এই সন্দৰ্ভত এক বিতং প্ৰতিবেদন দাখিল কৰিবলৈ কৈছে।