ৰাইচিনা ডাইলগ-২০২৫ ৰ আজি অন্তিম দিনঃ বিদেশ ৰাজ্যমন্ত্ৰী পবিত্ৰ মাৰ্ঘেৰিটাৰ ভাষণ...

ডিজিটেল ডেস্কঃ ১৭ মাৰ্চ, সোমবাৰৰ পৰা নতুন দিল্লীত অনুষ্ঠিত হোৱা ৰাইচিনা ডাইলগ-২০২৫ ৰ দশম সংস্কৰণত আজি বিদেশ ৰাজ্যমন্ত্ৰী পবিত্ৰ মাৰ্ঘেৰিটাই বক্তব্য ৰাখে। ভাষণত পবিত্ৰ মাৰ্ঘেৰিটাই কয়, ৰাইচিনা ডাইলগে যোৱা এটা দশকৰ সময়ছোৱাত অৰ্থপূৰ্ণ অংশীদাৰিত্বক প্ৰতিপালন কৰাৰ লগতে বিশ্বজুৰি সৃষ্টি হোৱা প্ৰত্যাহ্বানসমূহৰ ওপৰত অন্তৰ্দৃষ্টিসম্পন্ন আলোচনাৰ সূচনা কৰিছে।

তেওঁ কয়, এক সৰ্বাংগীন আৰু ন্যায়সংগত শৃংখলা গঢ়ি তুলিবলৈ হ’লে উন্নয়নশীল বিশ্বৰ সৈতে শক্তিশালী অংশীদাৰিত্ব গঢ়ি তোলাটো অতি প্ৰয়োজনীয় বুলি ভাৰতে বিশ্বাস কৰে। গতিকে স্বাভাৱিকতে আমাৰ বিশ্বব্যাপী প্ৰচাৰ প্ৰচেষ্টাত লেটিন আমেৰিকা আৰু কেৰিবিয়ান (LAC) দেশসমূহে অতি উল্লেখযোগ্য স্থান দখল কৰিছে। আমি একেধৰণৰ আকাংক্ষাৰ অংশীদাৰ, আৰু গ্ল’বেল ছাউথৰ প্ৰয়োজনীয়তা পূৰণ কৰা বহুমেৰু বিশ্ব ব্যৱস্থাক সমৰ্থন কৰোঁ।

লেটিন আমেৰিকা আৰু কেৰিবিয়ান দেশসমূহৰ লগতে গ্ল’বেল ছাউথৰ কথা উল্লেখ কৰি তেওঁ পুনৰ কয়, এই অঞ্চলটোৰ সৈতে ভাৰত সক্ৰিয়ভাৱে জড়িত হৈ আহিছে।প্ৰধানমন্ত্ৰীয়ে দ্বিতীয় ভাৰত-কেৰিকম শীৰ্ষ সন্মিলনৰ বাবে গায়ানা ভ্ৰমণ কৰাৰ সময়তে আমাৰ সম্পৰ্কত বিগত বছৰত নৱীকৃত শক্তিৰ সৃষ্টি হৈছিল।

তেওঁ সামৰ্থ্য বিকাশ, কৃষি আৰু খাদ্য সুৰক্ষা, নবীকৰণযোগ্য শক্তি আৰু জলবায়ু পৰিৱৰ্তন, উদ্ভাৱন, প্ৰযুক্তি আৰু বাণিজ্যকে ধৰি বিভিন্ন খণ্ডত সহযোগিতাৰ প্ৰস্তাৱ আগবঢ়ায়। তেওঁ কয়, শেহতীয়াকৈ উৰুগুৱে, বাহামাছ, বাৰ্বাডোছ আৰু নিকাৰাগুয়া ভ্ৰমণৰ সময়ত প্ৰধানমন্ত্ৰীৰ এংগেজমেণ্ট ৰোডমেপৰ অনুসৰণ কৰাৰ সুযোগ পাইছিলোঁ।

অৰ্থনৈতিক সহযোগিতা বৃদ্ধি, বাণিজ্য আৰু বিনিয়োগ বৃদ্ধি আৰু ভাৰত আৰু লেটিন আমেৰিকা আৰু কেৰিবিয়ান (LAC) দেশসমূহৰ জনসাধাৰণৰ মাজত শক্তিশালী সম্পৰ্ক গঢ়ি তোলাৰ যথেষ্ট সম্ভাৱনা আছে। লেটিন আমেৰিকা আৰু কেৰিবিয়ান (LAC) দেশসমূহৰ সৈতে ভাৰতৰ বাণিজ্যিক সম্পৰ্কৰ কথা উল্লেখ কৰি মাৰ্ঘেৰিটাই আৰু কয়, ২০২৩-২০২৪ বিত্তীয় বৰ্ষত এল এ চিৰ সৈতে ভাৰতৰ মুঠ বাণিজ্য আছিল ৩৫.৭৩ বিলিয়ন মাৰ্কিন ডলাৰ। আমাৰ অৰ্থনীতিৰ মাজত এক উচ্চ পৰ্যায়ৰ পৰিপূৰকতা আছে। 

ভাৰতত প্ৰাকৃতিক সম্পদ আৰু কৃষিজাত সামগ্ৰীৰ চাহিদা আছে যি এল এ চিৰ পৰা আমদানিৰ দ্বাৰা পূৰণ কৰিব পৰা যায়। ভাৰত গ্ৰাহক সামগ্ৰীৰ এক বিশ্বাসযোগ্য উৎস হ’ব পাৰে। আমাৰ ঔষধ উদ্যোগে এল এ চি অঞ্চলটোত নিজৰ পদাংক বহু পৰিমাণে সম্প্ৰসাৰণ কৰিছে। 

তেওঁ কয়, ব্ৰাজিল আৰু আৰ্জেণ্টিনাৰ পঞ্চম বৃহত্তম বাণিজ্যিক অংশীদাৰ দেশ ভাৰত। বিদেশত প্ৰথমবাৰৰ বাবে লিথিয়াম সম্পদ অধিগ্ৰহণ কৰাৰ সময়ত ভাৰতে আৰ্জেণ্টিনাৰ সৈতে অন্বেষণ আৰু নিষ্কাশনৰ বাবে পাঁচটা লিথিয়াম ব্লক লিজত লোৱাৰ চুক্তিত স্বাক্ষৰ কৰিছে।

তেল, প্ৰাকৃতিক গেছ আৰু খনিজ পদাৰ্থৰ চহকী মজুত থকা লেটিন আমেৰিকাই ভাৰতৰ শক্তি সুৰক্ষা আৰু বৈচিত্ৰ্যৰ লক্ষ্যক আগুৱাই নিব পাৰে। জৈৱ ইন্ধন আৰু ইথানল উৎপাদনত আমাৰ সহযোগিতাই বহনক্ষম শক্তি সমাধানৰ বাবে নতুন পথ মুকলি কৰিছে। ভাৰতৰ নেতৃত্বত আন্তঃৰাষ্ট্ৰীয় সৌৰ মিত্ৰতা, দুৰ্যোগ স্থিতিস্থাপক আন্তঃগাঁথনিৰ বাবে মিত্ৰজোঁট, মিছন লাইফ, আৰু গ্ল’বেল বায়’ফুৱেল এলায়েন্সৰ দৰে পদক্ষেপত এল এ চিৰ অংশগ্ৰহণ বৃদ্ধি পাইছে।

ডিজিটেল ৰাজহুৱা আন্তঃগাঁথনিৰ দৰে প্ৰযুক্তি সমাধান সৃষ্টি আৰু ৰূপায়ণত ভাৰতে অৰ্থপূৰ্ণ ভূমিকা ল’ব পাৰে। ট্ৰিনিদাদ আৰু ট’বাগো ইউ পি আই গ্ৰহণ কৰা প্ৰথমখন কেৰিকম দেশ হিচাপে পৰিগণিত হৈছে। গায়ানা, পেৰু, উৰুগুৱে আৰু জামাইকাত ইউ পি আইৰ প্ৰচাৰৰ বাবে কাম চলি আছে।

বিশেষকৈ চুৰিনাম, চেণ্ট ভিনচেণ্ট এণ্ড গ্ৰেনাডিনছ, ট্ৰিনিদাদ এণ্ড ট’বাগো, চেণ্ট কিটছ এণ্ড নেভিছ, ডমিনিকান ৰিপাব্লিক আৰু বাৰ্বাডোছৰ ক্ষুদ্ৰ আৰু মজলীয়া উদ্যোগ খণ্ডত ভাৰতে উন্নয়নমূলক প্ৰকল্পৰ বাবে ধন আগবঢ়াইছে। ভাৰতে গায়ানালৈ দুখন বিমান যোগানৰ বাবে ২৩.৩৭ মিলিয়ন মাৰ্কিন ডলাৰৰ এল অ’ চি প্ৰদান কৰিছিল।

নিকাৰাগুয়াত ২০২৫ চনৰ পৰা ২০২৬ চনৰ ভিতৰত এটা বৃহৎ শক্তি সঞ্চাৰণ প্ৰকল্প সম্পূৰ্ণ হোৱাৰ আশা কৰা হৈছে। ভাষণত মন্ত্ৰী পবিত্ৰ মাৰ্ঘেৰিটাই এল এ চিৰ সৈতে থকা সম্পৰ্কৰ কথা উল্লেখ কৰিবলৈ গৈ আৰু কয়, অঞ্চলটোৰ সৈতে আমাৰ সংযোগ শতিকাজুৰি চলি আছে। আমাৰ শক্তিশালী আৱেগিক আৰু সাংস্কৃতিক বন্ধনে আমাৰ সম্পৰ্ক শক্তিশালী কৰাত বহুখিনি সহায় কৰিব পাৰে।

চলিত বৰ্ষৰ প্ৰবাসী ভাৰতীয় দিৱসত প্ৰধানমন্ত্ৰীয়ে গিৰমিটীয়াসকলৰ এক বিস্তৃত তথ্যকোষ সৃষ্টিৰ পৰামৰ্শ আগবঢ়ায়। শিক্ষা আৰু শৈক্ষিক সহযোগিতা আমাৰ ক্ৰমবৰ্ধমান সম্পৰ্কৰ আন এক স্তম্ভ। আই টি, মেডিচিন, আৰু অভিযান্ত্ৰিকীত ভাৰতীয় বৃত্তি আৰু প্ৰশিক্ষণ কাৰ্যসূচীয়ে এল এ চিৰ ছাত্ৰ-ছাত্ৰীসকলক বিশেষজ্ঞতা লাভ কৰিবলৈ সক্ষম কৰিছে, আৰু নিজৰ জাতিলৈ অৰ্থপূৰ্ণভাৱে অৰিহণা যোগাবলৈ সক্ষম কৰিছে।

উল্লেখ্য যে, যোৱা ১৭ মাৰ্চত প্ৰধানমন্ত্ৰী নৰেন্দ্ৰ মোজীয়ে দিল্লীত ৰাইচিনা ডাইলগ ২০২৫ ৰ দশম সংস্কৰণ উদ্বোধন কৰিছিল। এই অনুষ্ঠানত মুখ্য অতিথি হিচাপে উপস্থিত আছিল নিউজিলেণ্ডৰ প্ৰধানমন্ত্ৰী ক্রিষ্টোফাৰ লাক্সন।

আজি এই অনুষ্ঠানৰ অন্তিম দিন। এইবাৰ এই অনুষ্ঠানৰ বিষয়বস্তু হৈছে ‘কালচক্ৰ-মানুহ, শান্তি আৰু গ্ৰহ। এইবাৰ এই অনুষ্ঠানত বিশ্বৰ মুঠ ১২৫ খন দেশৰ প্ৰতিনিধিয়ে অংশগ্ৰহণ কৰিছে। এই প্ৰতিনিধিসকলৰ ভিতৰত আছে মন্ত্ৰী, প্ৰাক্তন ৰাষ্ট্ৰপতি আৰু চৰকাৰৰ মুৰব্বী, সামৰিক নেতা, উদ্যোগী, প্ৰযুক্তি বিশেষজ্ঞ, শিক্ষাবিদ, সাংবাদিক, কূটনৈতিক বিশেষজ্ঞ, নীতি নিৰ্ধাৰক, আৰু যুৱক-যুৱতী। তাৰোপৰি এই অনুষ্ঠানত ৩৫০০ ৰো অধিক অংশগ্ৰহণকাৰীয়ে ব্যক্তিগতভাৱে যোগদান কৰিছে।