ভয়ংকৰ প্ৰাকৃতিক দুৰ্যোগৰ সন্মুখীন উত্তৰ ছিকিমঃ হাজাৰৰো অধিক পৰ্যটক আবদ্ধ...

ডিজিটেল ডেস্কঃ ভয়ংকৰ প্ৰাকৃতিক দুৰ্যোগৰ সন্মুখীন হৈছে উত্তৰ ছিকিম। প্ৰচণ্ড বৰষুণ আৰু ভূমিস্খলনে বিধ্বস্ত কৰিছে উত্তৰ ছিকিমৰ বিশাল অঞ্চল।

 বৃহস্পতিবাৰৰ পৰা অব্যাহত থকা অবিৰত বৰষুণৰ বাবে বহু অঞ্চলত ভূমিস্খলন সংঘটিত হৈছে। ফলত কেইবাটাও গুৰুত্বপূৰ্ণ মূল পথ বন্ধ হৈ পৰিছে।

 এনে অভাৱনীয় দুৰ্যোগৰ বাবে পৰ্যটকসকলে যাতে অপ্ৰীতিকৰ পৰিস্থিতিৰ সন্মুখীন নহয় তাৰ বাবে প্ৰশাসনে সাময়িকভাৱে ছিকিমলৈ যাত্ৰা নকৰিবলৈ পৰামৰ্শ আগবঢ়াইছে। প্ৰশাসনৰ সূত্ৰ অনুসৰি প্ৰাকৃতিক দুৰ্যোগৰ বাবে লাচেন আৰু লাচুঙত আবদ্ধ হৈ আছে ১০০০ৰো অধিক পৰ্যটক।

 আনহাতে মংগনৰ আৰক্ষী অধীক্ষক সোণম দেচু ভুটিয়াই কয় যে, বহু কেইটা পথত হোৱা ভূমিস্খলনৰ বাবে ১৫০০ৰো অধিক পৰ্যটকৰ বাহন আবদ্ধ হৈ আছে। স্থানীয় প্ৰশাসনে আৱদ্ধ পৰ্যটকসকলৰ বাবে নিশা থকাৰ ব্যৱস্থা কৰিছে।

থানা, গুৰুদ্বাৰ, আই টি বি পি শিবিৰ আৰু কাষৰীয়া গাঁৱসমূহত পৰ্যটকৰ থকাৰ ব্যৱস্থা কৰা হৈছে। এক সংবাদ মাধ্যমৰ আগত ভুটিয়াই কয় যে শুকুৰবাৰে পুৱা পৰ্যটকসকলক গেংটকলৈ পঠোৱাৰ ব্যৱস্থাও কৰা হৈছে।

বৃহস্পতিবাৰৰ পৰা হোৱা প্ৰবল বৰষুণৰ বাবে চুংথাঙৰ পৰা লাচেনলৈ যোৱা পথত মুনসিথাঙৰ সমীপত ভূমিস্খলন সংঘটিত হয়। আনহাতে, চুংথামৰ পৰা লাচুংলৈ যোৱাৰ পথত লিমাত ভূমিস্খলন সংঘটিত হয়।

ফলত লাচেন আৰু লাচুঙলৈ যোৱা পৰ্যটকসকল ভূমিস্খলনৰ বাবে পথত আবদ্ধ হৈ পৰে। শুকুৰবাৰৰ পৰা উত্তৰ ছিকিমত পৰ্যটকৰ প্ৰৱেশ নিষিদ্ধ কৰা হৈছে।

পৰিস্থিতিৰ উন্নতি নোহোৱালৈকে কোনো পৰ্যটককে উত্তৰ ছিকিমলৈ আহিবলৈ পৰামৰ্শ দিয়া হোৱা নাই। যিসকল পৰ্যটক এই অঞ্চলটোত আছে তেওঁলোকক পৰিস্থিতি উন্নত হ’লেহে হোটেলৰ পৰা ওলাই যাবলৈ পৰামৰ্শ দিয়া হৈছে।