ইছুজু মটৰ্ছ ইণ্ডিয়াৰ বাণিজ্যিক বাহনৰ ৰপ্তানি ২৪ শতাংশ বৃদ্ধি

ডিজিটেল ডেস্কঃ ইছুজু মটৰ্ছ ইণ্ডিয়াই বুধবাৰে জানিবলৈ দিয়া অনুসৰি ২০২৪-২৫ বিত্তীয় বৰ্ষত তেওঁলোকৰ বাণিজ্যিক বাহনৰ ৰপ্তানি ২৪ শতাংশ বৃদ্ধি পাই ২০,৩১২ ইউনিটত উপনীত হৈছে। যিটো পূৰ্বৰ বছৰৰ ১৬,৩২৯ ইউনিটৰ তুলনাত দেশৰ বাণিজ্যিক বাহন ৰপ্তানিকাৰীসকলৰ ভিতৰত সৰ্বাধিক।

কোম্পানীটোৱে ভাৰতক ভাৰতীয় আৰু ৰপ্তানি বজাৰৰ বাবে এক কৌশলগত উৎপাদন কেন্দ্ৰ হিচাপে ব্যৱহাৰ কৰি, বিশেষকৈ পিকআপ শ্ৰেণীত, ইছুজুৰ বিশ্বজুৰি সম্প্ৰসাৰণত গুৰুত্বপূৰ্ণ ভূমিকা পালন কৰি আহিছে। ইছুজু মটৰ্ছ ইণ্ডিয়াৰ অন্ধ্ৰ প্ৰদেশৰ শ্ৰী চিটিত অৱস্থিত উৎপাদন কাৰখানাটোৱে এছিয়া আৰু মধ্যপ্ৰাচ্যৰ বাওঁহাত আৰু সোঁহাতৰ ড্ৰাইভ বজাৰৰ প্ৰয়োজন পূৰণ কৰি আহিছে।

য’ত নেপাল, ভূটান, বাংলাদেশ, চৌদি আৰৱ, বাহৰেইন, কাটাৰ, কুৱেইট, ওমান আৰু জৰ্ডানৰ দৰে দেশসমূহ অন্তৰ্ভুক্ত। ইছুজু মটৰ্ছ ইণ্ডিয়াৰ উপ-ব্যৱস্থাপনা সঞ্চালক তৰু কিশিমটোৱে কয়, “আমি বিশ্বৰ মূল বজাৰসমূহত ভাৰতত নিৰ্মিত ইছুজু বাহনৰ ক্ৰমবৰ্ধমান চাহিদা লক্ষ্য কৰিছো। এই শক্তিশালী ৰপ্তানিয়ে ভাৰতত নিৰ্মিত আমাৰ বাহনৰ বিশ্বমানৰ গুণগত মান, নিৰ্ভৰযোগ্যতা আৰু কাৰ্যক্ষমতাৰ প্ৰমাণ। বছৰৰ পিছত বছৰ ধৰি আমাৰ ৰপ্তানিৰ পৰিমাণ স্থিৰভাৱে বৃদ্ধি পাইছে। 

ইছুজু মটৰ্ছ ইণ্ডিয়াই ২০১৬ চনত শ্ৰী চিটিত কাৰখানা স্থাপনৰ জৰিয়তে নিজৰ কাৰ্যকলাপ আৰম্ভ কৰিছিল। যি সম্প্ৰতি ১,০০,০০০ খন বাহন উৎপাদন কৰিছে। ২০২০ চনত কোম্পানীটোৱে দ্বিতীয় পৰ্যায়ৰ কাৰ্যকলাপ আৰম্ভ কৰে। য’ত এটা প্ৰেছ শ্বপ সুবিধা আৰু ইঞ্জিন এছেম্বলি প্লাণ্ট অন্তৰ্ভুক্ত আছে।

কোম্পানীটোৱে জানিবলৈ দিয়ে যে যোৱা মাহকেইটাত ইয়াৰ দেশীয় নেটৱৰ্কৰ সম্প্ৰসাৰণ কৰি ক্ৰমবৰ্ধমান গ্ৰাহকৰ ভিত্তিৰ ওচৰলৈ ব্ৰেণ্ডটোক লৈ যোৱা হৈছে। ইছুজু মটৰ্ছ ইণ্ডিয়াৰ সভাপতি তথা ব্যৱস্থাপনা সঞ্চালক ৰাজেশ মিত্তালে কয়, “ভাৰতত আমি উৎপাদন কৰা প্ৰতিটো বাহন বিশ্বজুৰি ইছুজু ব্ৰেণ্ডক সংজ্ঞায়িত কৰা একে বিশ্বমানৰ মানদণ্ডৰ সৈতে নিৰ্মিত। এই ‘মেড ইন ইণ্ডিয়া’ বাহনসমূহ আমাৰ শক্তিশালী উৎপাদন প্ৰক্ৰিয়া, পৰীক্ষিত পণ্যৰ ডি এন এ আৰু দেশীয় তথা আন্তৰ্জাতিক বজাৰৰ সেৱাৰ প্ৰতি আমাৰ দায়বদ্ধতাৰে প্ৰতিফলন।”