২০২৫ ত শক্তিশালী বিত্তীয় পৰিস্থিতিত ভাৰতীয় কৰ্পোৰেট খণ্ড...

ডিজিটেল ডেস্কঃ যুদ্ধ, বাণিজ্যিক প্ৰত্যাহ্বান, ঘৰুৱা চাহিদাৰ মন্দাৱস্থাৰ দৰে গোলকীয় প্ৰত্যাহ্বানৰ মাজতে ভাৰতীয় কৰ্পোৰেট খণ্ডই ২০২৫ ত প্ৰবেশ কৰিছে।তেওঁলোকে শক্তিশালী বেলেন্স শ্বীটে এই প্ৰত্যাহ্বানসমূহ মোকাবিলা কৰাত এক গুৰুত্বপূৰ্ণ ভূমিকা পালন কৰিছে।

ACE Equities ৰ মতে BSE 500 কোম্পানীৰ নগদ ভাণ্ডাৰ (বি এফ এছ আই আৰু তেল আৰু গেছৰ বাহিৰে) ৩০ ছেপ্টেম্বৰ, ২০২৪ ৰ ভিতৰত আছিল ৭.৬৮ লাখ কোটি টকা। এই পৰিমাণ প্ৰাক-কোভিড অৰ্থাত বিত্তীয় বৰ্ষ ২০২০ ৰ সমাপ্তিৰ সময়তকৈ ৫১ শতাংশ অধিক।

এই বৃদ্ধিৰ কাৰক হিচাপে বিশ্লেষকসকলৰ মতে উজ্জল শ্বেয়াৰ বজাৰ,  কিউ আই পি আৰু আই পি অ'ৰ জৰিয়তে ইকুইটি পুঁজি সংগ্ৰহ, প্ৰিমিয়ামাইজেচন আৰু ডিজিটাইজেচনৰ জৰিয়তে মাৰ্জিন বৃদ্ধি, উদ্যোগ একত্ৰীকৰণ, কাৰ্যকৰী বিচক্ষণতা আদিকে চিনাক্ত কৰিছে। 

বিশেষকৈ, কোভিডৰ পিছৰ সময়ছোৱাত, ভাৰতীয় কোম্পানীবোৰে তেওঁলোকৰ বেলেন্স শ্বীট শক্তিশালী কৰাৰ বাবে গুৰুত্বপূৰ্ণ পদক্ষেপ গ্ৰহণ কৰিছে বুলিও উল্লেখ কৰিছে।

আকুইৰাছৰ পৰিচালনা সঞ্চালক ভবেশ শ্বাহে কয়, "কোভিড মহামাৰীয়ে কৰ্পোৰেটসকলৰ বাবে এক ধাৰণা সৃষ্টি কৰিছে যে, অপ্ৰত্যাশিত প্ৰত্যাহ্বানৰ বাবে তেওঁলোকৰ অধিক তৰলতা থকা প্ৰয়োজন। একে সময়তে, কোভিডৰ পিছৰ 'ৰিভেঞ্জ বায়িং' প্ৰৱণতাই কোম্পানীৰ প্ৰদৰ্শন বৃদ্ধি কৰিছে আৰু নগদ সঞ্চয় বৃদ্ধি কৰিছে।”

বিশ্লেষকসকলে আৰু কয় যে, শ্বেয়াৰ বজাৰৰ শক্তিশালী স্থিতিয়ে কোম্পানীৰ বেলেন্স শ্বীটকো শক্তিশালী কৰিছে। আই পি অ' আৰু কিউ আই পিৰ জৰিয়তে সংগ্ৰহ কৰা পুঁজিয়ে কোম্পানীবোৰক তেওঁলোকৰ ঋণ হ্ৰাস কৰাত সহায় কৰিছে। লগতে, ডিজিটাইজেচন আৰু নিয়ামক পৰিৱৰ্তনে কোম্পানীৰ বেলেন্স শ্বীট উন্নত কৰাত সহায় কৰিছে।

২০২৪ ৰ মাৰ্চত, BSE500 ৰ ঋণৰ পৰা EBITDA ৰ অনুপাত আছিল ২.৫x-২.৭x । যি কোভিডৰ আগত আছিল ৪.৫ x। ইয়েই কোম্পানীবোৰে মাত্ৰ ২.৫ ৰ পৰা ৩ বছৰৰ উপাৰ্জনত তেওঁলোকৰ ঋণ পৰিশোধ কৰিবলৈ সক্ষম হোৱাটোকে  সূচাইছে।

২০২৫ ত, যদিও বিশ্বজুৰি আৰু ঘৰুৱা চাহিদা এক চিন্তাৰ বিষয় হৈ আছে, বিশ্লেষকসকলে বিশ্বাস কৰে যে কৌশলগত বিনিয়োগে বিকাশ তৈয়াৰ কৰিব। কোম্পানীবোৰে হ্ৰস্বম্যাদী প্ৰকল্প আৰু একত্ৰীকৰণৰ ওপৰত গুৰুত্ব দিছে।বজাৰৰ চাহিদা হ্ৰাস হ'লেও তেওঁলোকে সেইবোৰ কাৰ্যকৰী কৰিবলৈ সাজু।

নুভামা পেছাদাৰী গ্ৰাহক গোটৰ সভাপতি সন্তোষ পাণ্ডেয়ে কয়, "এক শক্তিশালী বিত্তীয় ভেটিয়ে কোম্পানীবোৰক দ্ৰুতগতিত আগবাঢ়িবলৈ সক্ষম কৰে, বিশেষকৈ একত্ৰীকৰণৰ ক্ষেত্ৰত। ”

সেয়েহে, ভাৰতীয় কৰ্পোৰেট খণ্ডৰ শক্তিশালী নগদ ভাণ্ডাৰ আৰু হ্ৰাস হোৱা ঋণৰ বোজাই ২০২৫ চনৰ প্ৰত্যাহ্বানৰ মোকাবিলা কৰাৰ ক্ষেত্ৰত তেওঁলোকৰ আত্মবিশ্বাসী স্থিতি নিশ্চিত কৰিছে।