২০২৫ বিত্তীয় বৰ্ষত ভাৰতৰ মুঠ ব্যৱসায়িক সামগ্ৰী ৰপ্তানি ৪৪৬.৫ বিলিয়ন ডলাৰ হোৱাৰ সম্ভাৱনা

ডিজিটেল ডেস্কঃ ভাৰতৰ ৰপ্তানি-আমদানি বেংকে শুকুৰবাৰে প্ৰকাশ কৰা অনুসৰি ২০২৫ বিত্তীয় বৰ্ষৰ বাবে ভাৰতৰ মুঠ ব্যৱসায়িক সামগ্ৰী ৰপ্তানি ৪৪৬.৫ বিলিয়ন ডলাৰ হোৱাৰ সম্ভাৱনা আছে। এই পৰিমাণ ২০২৩-২৪ চনৰ তুলনাত ২.২ শতাংশ অধিক।

তাৰোপৰি বিত্তীয় বৰ্ষৰ চতুৰ্থ ত্ৰৈমাসিকত সামগ্ৰীৰ ৰপ্তানি ১২৪.৮ বিলিয়ন ডলাৰ হোৱাৰ সম্ভাৱনা আছে।  যি যোৱা বছৰৰ তুলনাত ৩.৬৪ শতাংশ বৃদ্ধি পাব আৰু ইয়াৰ ইতিবাচক গতিবেগ অহা বিত্তীয় বৰ্ষৰ প্ৰথম ত্ৰৈমাসিকলৈকে অব্যাহত থকাৰ সম্ভাৱনা আছে।

অৱশ্যে বাণিজ্য নীতিৰ অনিশ্চয়তা আৰু ভূ-ৰাজনৈতিক উত্তেজনাই এই ক্ষেত্ৰত বিপদৰো সৃষ্টি কৰিব পাৰে। বেংকটোৱে এক বিবৃতিত কয় যে, ভাৰতৰ ৰপ্তানিৰ ইতিবাচক বৃদ্ধি শক্তিশালী কৃষি চপোৱা, উৎপাদন কাৰ্যকলাপ পুনৰুজ্জীৱিত হোৱা আৰু বাণিজ্যিক অংশীদাৰসকলৰ চাহিদাৰ সম্ভাৱনা উন্নত হোৱাৰ ফলত হ’ব পাৰে।

২০২৪-২৫ চনৰ বাবে অনাতৈল ৰপ্তানি ৩৮২ বিলিয়ন ডলাৰ হোৱাৰ পূৰ্বানুমান কৰা হৈছে। আনহাতে অনাতৈল আৰু অনাৰত্ন আৰু গহনা ৰপ্তানি সম্পূৰ্ণ বিত্তীয় বৰ্ষত ৩৫০ বিলিয়ন ডলাৰ স্পৰ্শ কৰিব বুলি পূৰ্বানুমান কৰা হৈছে।