কৰ্তব্যৰ প্ৰতি অৱহেলা কৰাৰ অভিযোগত নিলম্বন

ডিজিটেল সংবাদ, চিৰাংঃ কৰ্তব্যৰ প্ৰতি অৱহেলা কৰাৰ অভিযোগত চিৰাং জিলাৰ আবকাৰী বিভাগৰ অধীক্ষক গৌৰাঙ্গ চৌধুৰী আৰু আৱকাৰী পৰিদৰ্শক দিব্যজ্যোতি শৰ্মাক নিলম্বিত কৰা হয়। 

অসমৰ ৰাজ্যপালে স্বাক্ষৰ কৰা এক নিৰ্দেশ যোগে নিজৰ কৰ্মৰত এলেকাত অবৈধ সুৰাৰ ঘাটি স্থাপন, চৰকাৰী ৰাজহ ক্ষতিসাধন লগতে জনস্বাস্থ্যলৈ ভয়ংকৰ ভাবুকি কঢ়িয়াই অনাৰ দৰে ঘটনা সংঘটিত হোৱাৰ পিছতো কোনোধৰণৰ ব্যবস্থা গ্ৰহণ নকৰি নিজৰ কৰ্তব্যত গাফিলতি কৰাৰ অভিযোগত চিৰাং জিলাৰ আবকাৰী বিভাগৰ অধীক্ষক গৌৰাঙ্গ চৌধুৰী আৰু আৱকাৰী পৰিদৰ্শক দিব্যজ্যোতি শৰ্মাক সোমবাৰৰ পৰা কাৰ্য্যকৰী হোৱাকৈ নিলম্বিত কৰে।

উল্লেখযোগ্য যে, যোৱা ১৯ জুনৰ দিনা চিৰাং জিলা আবকাৰী বিভাগৰ অজ্ঞাতে জিলাখনৰ ভাৰত-ভূটান সীমান্তৰ শান্তিপুৰ এলেকাত বঙাইগাঁও জিলাৰ আবকাৰী বিভাগৰ অধীক্ষক আৰু আবকাৰী বিভাগৰ গুৱাহাটীৰ পৰা অহা এটা চোৰাংচোৱাৰ দলে যৌথভাৱে অভিযান চলাই এটা বৃহৎ আকাৰৰ অবৈধ তথা নকল সুৰা প্ৰস্তুতকৰা কাৰখানা উৎখাত কৰিছিল। উক্ত অবৈধ নকল সুৰা কাৰখানাৰ পৰা আবকাৰী বিভাগে ৫০ লাখ টকাৰ অবৈধ সুৰাৰ কেঁচামাল আৰু বিভিন্ন ব্যাণ্ডৰ সুৰাৰ জব্দ কৰিছিল।

এই ঘটনাৰ পিছতে আবকাৰী আয়োগৰ পৰা আবকাৰী উচ্চ পদস্থ বিষয়া দুগৰাকীলৈ কাৰণ দৰ্শোৱাৰ জাননী প্ৰেৰণ কৰা হৈছিল কিন্তু বিষয়া দুগৰাকী কাৰণ দৰ্শোৱাৰ জাননীৰ উত্তৰত সন্তুষ্ট হব নোৱাৰি নিলম্বিত কৰা হৈছে বুলি নিৰ্দেশত উল্লেখ কৰা হৈছে।