সঁচা, বয়স মাত্ৰ এটা সংখ্যাহে !

ডিজিটেল ডেস্ক: কেৰিয়াৰ আৰম্ভ কৰাৰ পাছত শিক্ষাৰ মাজলৈ ঘূৰি অহাটো আমাৰ দেশত এক প্ৰকাৰ অসম্ভৱ বুলিয়েই ধাৰণা কৰা হয়। কিন্তু এই ধাৰণাক মিছা প্ৰতিপন্ন কৰিবলৈ সক্ষম হ'ল এজন ৬৪ বছৰীয়া অৱসৰপ্ৰাপ্ত বিষয়াই। ষ্টেট বেংক অৱ ইণ্ডিয়াৰ এই অৱসৰপ্ৰাপ্ত বিষয়াজনৰ নাম জয় কিশোৰ প্ৰধান।

হয়, এই বিষয়াজনে এন.ই.ই.টি. পৰীক্ষাত উত্তীৰ্ণ হৈ প্ৰমাণ কৰে যে সপোন পূৰণ কৰাৰ কোনো নিদিষ্ট সময় বা বয়স নাথাকে।বয়সে নিৰ্ধাৰণ নকৰে কেৰিয়াৰৰ বিকল্প।এই বিষয়াজনৰ নাম জয় কিশোৰ প্ৰধান। তেওঁ ২০২০ত ৬৪বছৰ বয়সত ৰাষ্ট্ৰীয় যোগ্যতা তথা প্ৰৱেশ পৰীক্ষা (এনইইটি ইউজি) সফলতাৰে উত্তীৰ্ণ হৈছিল।

উৰিষ্যাৰ বাসিন্দা জয় কিশোৰ প্ৰধানে এছবিআইৰ পৰা উপ-মেনেজাৰ হিচাপে অৱসৰ গ্ৰহণ কৰে।ইয়াৰ পাছতে তেওঁ তেওঁৰ দীৰ্ঘদিনীয়া সপোন পূৰণ কৰাৰ মন মেলে। তেওঁ এনইইটিৰ প্ৰস্তুতিৰ বাবে এক প্ৰণালীবদ্ধ পদ্ধতি গ্ৰহণ কৰিছিল।ইয়াৰ বাবে অৱশ্যে তেওঁ এক অনলাইন প্ৰশিক্ষণ কাৰ্যসূচীত নাম ভৰ্তি কৰিছিল।এই প্ৰস্তুতিৰ সময়ত পাৰিবাৰিক জীৱনৰ চাপ, বিভিন্নজনৰ সমালোচনাকে ধৰি বহু প্ৰত্যাহ্বানৰ সন্মুখীন হৈছিল যদিও সকলো আওকান কৰি দৃঢ়তাৰে নিজৰ লক্ষ্যৰ দিশে আগবাঢ়িছিল। যেতিয়া তেওঁ সফলতাৰে এনইইটি পৰীক্ষাত উত্তীৰ্ণ হৈছিল তেতিয়া তেওঁৰ কঠোৰ পৰিশ্ৰম সফল হৈছিল। এই সাফল্যই তেওঁক বীৰ সুৰেন্দ্ৰ চাই চিকিৎসা বিজ্ঞান আৰু গৱেষণা প্ৰতিষ্ঠানৰ (ভিএমএছএআৰ) এক আকাংক্ষিত আসন অৰ্জন কৰাত সহায় কৰিছিল।

ৰাষ্ট্ৰীয় চিকিৎসা আয়োগ আইন, ২০১৯ৰ ধাৰা ১৪ অনুসৰি, এনইইটি (ইউজি) গ্ৰহণ কৰা প্ৰাৰ্থীসকলৰ বয়সৰ কোনো উচ্চ সীমা নাই। এই নীতিয়ে সকলো বয়সৰ উচ্চাকাংক্ষী চিকিৎসা শিক্ষাৰ্থীসকলক তেওঁলোকৰ সপোন অনুসৰণ কৰিবলৈ উৎসাহিত কৰে।

Also Read: বিশ্বৰ এইবোৰ উৎসৱৰ বিষয়ে জানিলে আপুনিও হ'ব আচৰিত