ৰঙাপৰাত অনৈতিক কাৰ্য্যত লিপ্ত যুৱক-যুৱতী : ল’জৰ মালিকৰ বিৰুদ্ধে ব্যৱস্থাগ্ৰহণৰ দাবী

ডিজিটেল সংবাদ, জামুগুৰিহাট : শোণিতপুৰ জিলাৰ অন্তৰ্গত ৰঙাপৰা আৰক্ষীয়ে বুধবাৰে নিশা ফ্লাই অ’ভাৰ ল’জৰ পৰা দুই যুৱক আৰু সমসংখ্যক যুৱতীক উদ্ধাৰ কৰে ৷ লগতে আৰক্ষীয়ে দুয়োকে থানালৈ লৈ যায়  ৷  

এইখিনিতে উল্লেখ কৰা প্ৰয়োজন যে, উক্ত ফ্লাই অ’ভাৰ ল’জত দীৰ্ঘদিনৰ পৰা অনৈতিক কাৰ্য্যকলাপ চলি অহাৰ  অভিযোগ উত্থাপন হৈ আহিছিল ৷  ল’জখনত চলি থকা এনে অনৈতিক কাৰ্যকলাপৰ বিৰুদ্ধে নিশা অভিযান চলায় অসম জাতীয়তাবাদী যুৱ ছাত্ৰ পৰিষদে ৷ 

অভিযানৰ সময়তে  ল’জখনৰ দুটা কোঠালিৰ পৰা দুজন যুৱক আৰু দুগৰাকী যুৱতীক উদ্ধাৰ কৰি আৰক্ষীক চমজাই দিয়ে ৷ নিশা ল’জখনত উদ্ধাৰ হোৱা যুৱক- যুৱতীৰ কোনো পৰিচয় পত্ৰ নোলোৱাকৈ ল’জত থকাৰ ব্যৱস্থা কৰি দিছিল ল’জৰ মালিকে ৷  

তাৰোপৰি ল’জখনৰ ৰেজিষ্টাৰ বহীত কোনো ধৰণৰ নাম ঠিকনা লিপিবদ্ধ নকৰাকৈ থাকিবলৈ দিছিল যুৱক- যুৱতীহালক ৷ ইফালে এই ঘটনা পোহৰলৈ অহাৰ পাছতে ৰঙাপৰাত চাঞ্চল্যৰ সৃষ্টি হৈছে ৷ 

ৰঙাপৰাৰ একাংশ দল সংগঠনৰ লগতে স্থানীয় ৰাইজে অতিশীঘ্ৰে ল’জৰ মালিকৰ বিৰুদ্ধে ব্যৱস্থা গ্ৰহণৰ দাবী জনাইছে। একেদৰে প্ৰশাসনক উক্ত ল’জখন বন্ধ কৰি দিবলৈ আহ্বান জনাইছে ৷