নগাঁৱত বিশ্ব গ্ৰন্থ দিৱস উদযাপন

ডিজিটেল সংবাদ, নগাঁও : “গ্ৰন্থ পঢ়ো, ভাষা ৰক্ষা কৰো” শীৰ্ষক বাণী সৰোগত কৰি বুধবাৰে নগাঁৱত উদযাপন কৰা হয় বিশ্ব গ্ৰন্থ দিৱস ।  নগাঁও সাহিত্য সভাৰ উদ্যোগত নগাঁও মহাবিদ্যালয়( স্বতন্ত্ৰ) আৰু শংকৰদেৱ সাহিত্য চ’ৰাৰ সহযোগত নগাঁও মহাবিদ্যালয়ত উদযাপন কৰা হয় এই বিশ্ব গ্ৰন্থ দিৱস । 

সাতিত্যাচাৰ্য যজ্ঞেশ্বৰ শৰ্মা সভাকক্ষত অনুষ্ঠিত হোৱা তথা নগাঁও জিলা সাহিত্য সভাৰ সভাপতি ড০ শৰৎ বৰকটকীয়ে সভাপতিত্ব কৰা মুকলি সভাখনিৰ আঁত ধৰে ৰাজীৱ কুমাৰ হাজৰিকাই । সভাৰ আৰম্ভণিতে নগাঁও মহাবিদ্যালয়ৰ ভাৰপ্ৰাপ্ত অধ্যক্ষ ড০ পুলিন চন্দ্ৰ বৰাই বক্তব্য আগবঢ়ায়।

তেওঁ কয়- গ্ৰন্থ আমাৰ বন্ধু । গ্ৰন্থ আমাক লাগিবই । গ্ৰন্থৰ মাজেৰে লেখকজনক জানিব পৰা যায় । ড০ ভূবন চন্দ্ৰ চুতীয়াই আঁত ধৰা আদৰণী অনুষ্ঠানত বিশিষ্ট ঔপন্যাসিক মনিকুন্তলা ভট্টাচাৰ্য উপস্থিত থাকি কয় যে, লেখকৰ বিশেষ দিনটোৰ কথা পাঠকৰ বাহিৰে আনে কোনে জানিব । গ্ৰন্থ প্ৰচাৰৰ বাবে সকলোৱে কাম কৰিব লাগিব । 

“মোৰ প্ৰিয় কিতাপ” শীৰ্ষক কবিতাটি পাঠ কৰি ঔপন্যাসিক ভট্টাচাৰ্যই কয় যে গ্ৰন্থৰ ভৱিষ্যত আছে পৃথিৱী যিমান দিনলৈকে থাকিব বৌদ্ধিক পৰিপুষ্টিৰ বাবে গ্ৰন্থ সিমান দিনলৈকে জীয়াই থাকিব । 

উল্লেখযোগ্য যে, সভাত অসমীয়া প্ৰতিদিন কাকতৰ সহযোগী সম্পাদক প্ৰকাশ মহন্ত বিশিষ্ট অতিথি হিচাপে উপস্থিত থাকি কয় যে, শব্দৰ শৃঙ্খলেৰে আমাক আন্দোলিত কৰিব পৰা ব্যৱস্থা কৰিব লাগিব । গ্ৰন্থ অধ্যয়নৰ বাবে এক পৰিবেশৰ সূচনা হ’ব লাগিব । 

ভাষণ প্ৰসঙ্গত মহন্তই বৌদ্ধিক অন্বেষণৰ ক্ষেত্ৰত আড্ডাৰ প্ৰাসংগিতাৰ কথা উল্লেখ কৰি গ্ৰন্থ প্ৰতিষ্ঠান নগাঁৱৰ ৰুমী- ৰূপকৰ অৱদানৰ কথা উল্লেখ কৰে । লগতে অসমীয়া সাহিত্যলৈ নগাঁৱৰ মনিষীসকলে আগবঢ়োৱা অৱদানৰ বিষয়ে আলোকপাত কৰে । 

ইউ পি এছ চি পৰীক্ষাত বিশেষ কৃতকাৰ্য প্ৰদৰ্শন কৰা নগাঁৱৰ ভাস্বত শইকীয়াক বিশ্ব গ্ৰন্থ দিৱসত সাহিত্য সভাই সম্বৰ্ধনা জনায় । সম্বৰ্ধনা গ্ৰহণ কৰি ভাস্বত শইকীয়াই বক্তব্য আগবঢ়ায় । 

সভাত বিধায়ক ৰূপক শৰ্মা, বিধায়ক দীপ্লুৰঞ্জন শৰ্মা উপস্থিত থাকি গ্ৰন্থ অধ্যয়ন আৰ বৌদ্ধিক চৰ্চাৰ পৰিবেশ ৰচনাৰ বাবে চৰকাৰীভাৱে হাতত লোৱা পদক্ষেপৰ সন্দৰ্ভত সভাত অভিমত প্ৰকাশ কৰে । উল্লেখ্য যে, বন্তি প্ৰজলনেৰে বিশ্ব গ্ৰন্থ দিৱসৰ কাৰ্যসূচীৰ পাতনি মেলা হয় । বন্তি প্ৰজলন কৰে অসম সাহিত্য সভাৰ উপ সভাপতি পদুম ৰাজখোৱাই । ইয়াৰ পিছতে মানব শৃঙ্খলৰ কাৰ্যসূচী ৰূপায়ন কৰা হয় ।