কুৰুৱাবাহীৰ বান পৰিস্থিতি : বানপানী কমিছে যদিও পশুখাদ্যৰ ব্যাপক নাটনিয়ে বিপদত পেলাইছে কৃষকক

ডিজিটেল সংবাদ, বোকাখাত : সোম আৰু মঙলবাৰৰ পৰা অধিক অৱনতি ঘটা বোকাখাত কুৰুৱাবাহীৰ বান পৰিস্থিতি কিছু উন্নত হোৱাৰ কথা জানিবলৈ দিছে স্থানীয় জনসাধাৰণে। ধনশিৰি নদীৰ বাঢ়নি পানীয়ে বৃহত্তৰ অঞ্চলটোৰ মেৰকান, ক'লাবৰীয়া চাপৰি, মেৰ চাপৰি, চিনাকান চাৰিআলি, চিনাকান, আদৰ্শ গাঁৱকে ধৰি ভালেকেইটা অঞ্চল বুৰাই পেলাইছিল যদিও বুধবাৰৰ বিয়লিৰ পৰা অঞ্চলটোৰ বানপানীয়ে বুৰাই পেলোৱা গাঁওসমূহত পানী কমিছে বুলি জানিবলৈ দিছে গাঁওবাসীয়ে।

কিন্তু গো-চৰণীয়া আৰু ৰবি শস্যৰক্ষেত্ৰসমূহত বৰ্তমানেও পানী সোমাই থকাৰ বাবে পশুখাদ্যৰ নাটনিয়ে ব্যাপকভাৱে সমস্যাৰ সৃষ্টি কৰিছে অঞ্চলটোত। এই ক্ষেত্ৰত বোকাখাত সমজিলা প্ৰশাসনৰ তৰফৰ পৰা পশুখাদ্যৰ যোগান ধৰা হৈছে যদিও সেয়া পৰ্যাপ্ত নহয় বুলি অভিযোগ উত্থাপন কৰিছে ভুক্তভোগী পশুপালকসকলে।

ইয়াৰ বিপৰীতে বিপৰ্য্যস্ত পৰিয়ালসমূহৰ বাবে খাদ্য তথা কিছু ৰচদপাতিৰ চৰকাৰী-বেচৰকাৰী ব্যৱস্থা কৰা হৈছে যদিও সেয়া বিতৰণৰ ক্ষেত্ৰটো স্বজন-তোষণৰ অভিযোগ উঠিছে বান বিধ্বস্ত অঞ্চলটোত। ইফালে কৃষি মন্ত্ৰী তথা বিধায়ক অতুল বৰাই বুধবাৰে বান বিধ্বস্ত অঞ্চলটো পৰিদৰ্শন কৰি বানপিড়িত ৰাইজৰ অৱস্থাৰ বুজ লয়। পৰিদৰ্শনকালত মন্ত্ৰী গৰাকী‌য়ে বানপানী সন্দৰ্ভত দিয়া চৰকাৰী তথ্য মতে শেহতীয়া বানত বোকাখাতৰ ৯খন ৰাজহ গাঁৱৰ প্ৰায় ৮,৯৪৭ লোক প্ৰভাৱিত হৈছে।

সম্প্ৰতি প্ৰশাসনে স্থাপন কৰা তিনিটা সাহায্য শিবিৰত ৮৭২জন লোকে আশ্ৰয় লৈ আছে। বোকাখাতৰ প্ৰায় ৪৫১ হেক্টৰ কৃষিভূমিৰ শস্য জলমগ্ন হৈছে।

উল্লেখযোগ্য যে, বোকাখাত বানপীড়িত অঞ্চলৰ ৰাইজৰ বাবে নুমলীগড় শোধনাগাৰ কৰ্তৃপক্ষই সামাজিক দায়বদ্ধতা শিতানৰ পুঁজিৰে ১০খনকৈ নাও আগবঢ়াইছে। বুধবাৰে তিনিখন নাও কুৰুৱাবাহী চিনাকান, ২ নং পাৰঘাট আৰু ধোদাং অঞ্চলৰ ৰাইজৰ সেৱাৰ বাবে মুকলি কৰা হয়।