কাইলৈৰ পৰা বৰ্ষাকালীন অধিৱেশনঃ বিৰোধীক প্ৰত্যুত্তৰ দিবলৈ সাজু চৰকাৰ...

ডিজিটেল ডেস্কঃ অহা ২১জুলাইৰ পৰা আৰম্ভ হ'ব সংসদৰ বৰ্ষাকালীন অধিৱেশন। ২১ আগষ্টলৈকে চলিব লগা এই অধিৱেশনত এইবাৰ বিশেষভাৱে গুৰুত্বপূৰ্ণ। কিয়নো অপাৰেশ্যন সিন্দূৰ, ৱাকফ বিল, পেহেলগাম আক্ৰমণৰ দৰে উল্লেখযোগ্য ঘটনাৰ পিছত এয়া হৈছে সংসদৰ প্ৰথমখন অধিৱেশন।

উল্লেখ কৰা প্ৰয়োজন যে, এই অধিৱেশনতে আয়কৰ বিধেয়ক- ২০২৫ও গৃহীত হোৱাৰ সম্ভাৱনা আছে। খবৰ অনুসৰি এইবাৰ অধিবেশনত মুঠ আঠখন বিধেয়ক উত্থাপন কৰা হ’ব। তৰোপৰি মণিপুৰত জাৰি হৈ থকা ৰাষ্ট্ৰপতিৰ শাসনৰ ম্যাদ বৃদ্ধিৰ প্ৰস্তাৱো অধিবেশনত দাখিল কৰিব পাৰে।

সংসদৰ এই বৰ্ষাকালীন অহা অধিবেশন ২১ আগষ্টলৈকে মুঠ ২১ দিন ধৰি সংসদৰ অধিবেশন অনুষ্ঠিত হ’ব। ইয়াৰ মাজতে ১২ আগষ্টৰ পৰা ১৮ আগষ্টলৈ সংসদৰ কাৰ্যসূচী বিৰত থাকিব। 

এই অধিবেশনত বিহাৰ বিধানসভা নিৰ্বাচনৰ পূৰ্বে ভোটাৰ তালিকাৰ নিবিড় সংশোধনৰ বাবে নিৰ্বাচন আয়োগে দিয়া নিৰ্দেশ আৰু ইয়াৰ কাৰ্যকৰীকৰণক লৈ সংসদত বিতৰ্ক হোৱাৰ পূৰ্ণ সম্ভাৱনা আছে। এই বিষয়টোক লৈ ইতিমধ্যে কংগ্ৰেছ আৰু আৰজেডিয়ে অসন্তুষ্টি প্ৰকাশ কৰিছে। 

আনকি বিষয়টো উচ্চতম ন্যায়ালয়ৰ মজিয়াতো উঠিছেগৈ। উচ্চতম ন্যায়ালয়ে যদিও নিৰ্বাচন আয়োগৰ ভোটাৰ তালিকাৰ নিবিড় সংশোধন স্থগিত ৰখা নাই তথাপিও এই ক্ষেত্ৰত কিছু নীতি, নিৰ্দেশনা জাৰি কৰিছে।