ৰাজনীতি এৰি খেতিত ধৰিবলৈ আগ্ৰহী কেন্দ্ৰীয় গৃহমন্ত্ৰী অমিত শ্বাহ

ডিজিটেল ডেস্ক : মুকলি আকাশ, মুকলি পথাৰ, মুকলি মনৰ প্ৰতি আগ্ৰহ বাঢ়িছে কেন্দ্ৰীয় গৃহমন্ত্ৰী অমিত শ্বাহৰ। ৰাষ্ট্ৰীয় কাকতত দিয়া এক সাক্ষাতকাৰত কেন্দ্ৰীয় গৃহমন্ত্ৰীগৰাকীয়ে কয়- যদি মই ৰাজনীতিৰ পৰা সন্ন্যাস লওঁ, তেতিয়া মই খেতিত ধৰিম। এখন মুকলি আকাশ, মুকলি পথাৰৰ সৈতে বহুদিন কটোৱা নাই।

তাৰোপৰি সদাব্যস্ত ৰাজহুৱা জীৱনৰ পৰা কিছু নিলগত থাকি তেওঁ হিন্দু মহাকাব্য, বেদ- উপনিষদ আদি পাঠ কৰিব বিচৰাৰ কথাও ব্যক্ত কৰে শ্বাহে। নিজৰ লগতে পৰিয়ালৰ স্বাস্থ্য ভালে ৰখাৰ উদ্দেশ্যে নিজৰ গাঁৱৰ ঘৰত থকা কৃষি পামত ঘেঁহু, মাকৈ, শাক- পাচলি আদিৰ খেতি কৰিব বিচাৰে তেওঁ। প্ৰকৃতিৰ সৈতে উমলিব খোজাৰ কথাও সাক্ষাতকাৰত ব্যক্ত কৰে গৃহমন্ত্ৰীগৰাকীয়ে।

তেওঁ আৰু কয়- বিগত ৪/৫ বছৰত মই কোনো এলোপেথিক দৰৱ সেৱন কৰা নাই। মই নিজকে ফিট বুলি অনুভৱ কৰো। ইয়াৰ কাৰণ হৈছে- নিয়মীয়া যোগ আৰু প্ৰাণায়ম। 

মই সদায় ১ ঘণ্টাকৈ হ’লেও যোগ সাধনা কৰো। অৱশ্যে ৰাজনৈতিক ব্যস্ততাৰ বাবে কেতিয়াবা কেতিয়াবা সময়ৰ নাটনি নোহোৱা নহয়।

যেতিয়া ৰাজনীতিৰ পথাৰখন এৰি খেতিত ধৰিম, তেতিয়া সকলো ঠিক হৈ যাব। আমাৰ দেশৰ যুৱক- যুৱতীসকলেও প্ৰতিদিনে যদি যোগ বা প্ৰাণায়ম কৰে, তেন্তে বহুখিনি উপকৃত হ’ব বুলি অমিত শ্বাহে মন্তব্য কৰে।