ডিজিটেল সংবাদ ৰূপহীহাটঃ চৰকাৰে বিশ্ব কৰ্মা পূজাৰ কোনো বন্ধ ঘোষণা শনিবাৰে কৰা নাই যদিও লাওখোৱা সংহত শিশু উন্নয়ন প্ৰকল্পৰ কাৰ্যালয়ত এক অঘোষিত বন্ধ পালন কৰা পৰিলক্ষিত হ'ল ৷ সমাজ কল্যণ বিভাগৰ উক্ত প্ৰকল্প কাৰ্যালয়ত শনিবাৰে দুপৰীয়া প্ৰায় ১ বজালৈকে একমাত্ৰ চতুৰ্থ বৰ্গৰ কৰ্মী দুজনৰ বাহিৰে কোনো কৰ্মচাৰী উপস্থিত থকা দেখা পোৱা নগ'ল ৷
উল্লেখ্য যে, প্ৰকল্প কাৰ্যালয়খনত ব্যাপক দুৰ্নীতি, অনিয়ম আৰু নিযুক্তি কেলেংকাৰী আদি একাধিক অভিযোগ উত্থাপন হৈছে ৷ এনে অনিয়ম সন্দৰ্ভত এক ক্ষেত্ৰভিত্তিক তদন্তৰ বাবে সাংবাদিকৰ এটা দল কাৰ্যালয়খনত উপস্থিত হোৱাত প্ৰকল্প বিষয়াগৰাকী অনুপস্থিত থকা পৰিলক্ষিত হয় ৷
কাৰ্যালয়খনৰ এনে বন্ধ সদৃশ প্ৰত্যক্ষ কৰি সাংবাদিক কাৰ্যালয়ৰ পৰা প্ৰকল্প বিষয়াগৰাকীৰ যোগাযোগ নম্বৰ লৈ ফোন কৰাত অফিচিয়েল কামৰ বাবে গুৱাহাটীলৈ যোৱা বুলি প্ৰকাশ কৰে ৷ কিন্তু আন এক বিশেষ সূত্ৰই প্ৰকাশ কৰা অনুসৰি প্ৰকল্প বিষয়া মঞ্জু দাস জাগিৰোডস্থিত নিজৰ বাসগৃহলৈ যোৱা বুলি সদৰী কৰে ৷
সূত্ৰটোৱে জনোৱা কথা যদি সত্য হয় তেন্তে বিষয়াগৰাকীয়ে সাংবাদিকৰ সৈতে কিয় মিছা মাতিলে সেয়া এক ৰহস্যৰ বিষয় ৷ নে সহজ সৰল ৰাইজক অন্ধকাৰত ৰাখি এইদৰে চৰকাৰী বন্ধ নথকাৰ পিছতো বিশ্বকৰ্মা পূজাৰ অজুহাতত ইচ্ছাকৃতভাৱে ছুটি পালন কৰিলে প্ৰকল্প বিষয়া মঞ্জু দাসে ৷ তাকে লৈ কাৰ্যালয়স্থিত অঞ্চলটোত প্ৰতিক্ৰিয়াৰ সৃষ্টি হৈছে ৷
