চাকৰি দিয়াৰ নামত লুটিলে লক্ষাধিক টকা

ডিজিটেল সংবাদ, ধেমাজিঃ ধেমাজি আৰু লখিমপুৰত দুই প্ৰৱঞ্চকে মেলিছে প্ৰৱঞ্চনাৰ জাল। হীৰকজ্যোতি দত্ত আৰু মিতালী সোনোৱাল নামৰ দুই প্ৰৱঞ্চকে জিলা দুখনৰ গ্ৰাম্য অঞ্চলৰ সাধাৰণ যুবক-যুৱতীক মিছা প্ৰলোভনেৰে জালত পেলাই চাকৰি দিয়াৰ নামত লুটিলে লক্ষাধিক টকা।

উল্লেখ্য যে, চলিত বৰ্ষৰ মাৰ্চ মাহৰ পৰাই এই দুই প্ৰৱঞ্চকে যুৱক-যুৱতী সকলক লখিমপুৰ চিকিৎসা মহাবিদ্যালয়ত খালী হৈ থকা সুৰক্ষাকৰ্মী পদত নিযুক্তি কৰাই দিম বুলি নগদ আৰু অনলাইনৰ জৰিয়তে ১৬০০শ পৰা ২২০০ শ ' টকা পৰ্যন্ত ধন সংগ্ৰহ কৰিছিল ৷ ইফালে ধন দিয়াৰ পৰা তিনি-চাৰি মাহ পৰ্যন্ত সময় বাগৰি যোৱা পিছতো কোনো খা-খবৰ নোপোৱাত যুৱক-যুৱতী সকলে তেওঁলোকলৈ ফোন যোগে যোগাযোগ কৰে। কিন্তু কোনো উত্তৰ নোপোৱাত বিষয়টো সন্দেহৰ আৱৰ্তত সোমাই পৰে ৷

উপায়ন্তৰ হৈ যুৱক-যুৱতীৰ একাংশই ততাতৈয়াকৈ লখিমপুৰ চিকিৎসা মহাবিদ্যালয়ত উপস্থিত হৈ খবৰ লোৱাতহে ঘটনাৰ সবিশেষ পোহৰলৈ  আহ ৷ বৃহস্পতিবাৰে ধেমাজি নৰোৱাথান অঞ্চলৰ চন্দ্ৰ নাথ সোনোৱালৰ নেতৃত্বত যোৱা ২০ জনীয়া ভুক্তভোগী যুৱক-যুৱতীৰ দলে ধেমাজি সদৰ আৰক্ষী থানাত এখন এজাহাৰ দাখিল কৰ ৷ ইতিমধ্যে ধেমাজি সদৰ আৰক্ষীয়ে দুই প্ৰৱঞ্চকৰ বিৰুদ্ধে গোচৰ ৰুজু কৰি তদন্ত প্ৰক্ৰিয়া আৰম্ভ কৰিছে ৷