ফ্ৰীজত থোৱা মাংসই হ’ল কাল ! প্ৰাণ গ’ল এজনৰ, তিনিজনৰ অৱস্থা সংকটজনক

ডিজিটেল ডেস্ক : ফ্ৰীজত সাঁচি থোৱা মাংস খায় প্ৰাণ গ’ল এজন লোকৰ। তাৰোপৰি তিনিজন লোকৰ অৱস্থা অতি সংকটজনক বুলি জানিব পৰা গৈছে। ইতিমধ্যে তেওঁলোকক হাস্পতালত ভৰ্তি কৰোৱা হৈছে। এই ঘটনা সংঘটিত হৈছে হায়দৰাবাদত।

ঘটনাৰ বিৱৰণী মতে, বানস্থলীপুৰম নামৰ এটা এলেকাৰ পৰিয়ালে ঘৰতে আয়োজন কৰিছিল এক উৎসৱৰ। পৰিয়ালৰ মাজতে সম্পন্ন হোৱা এই উৎসৱৰ পাছতে আয়োজন কৰা হৈছিল ভোজৰ। 

সকলো কাৰ্য সুচাৰূপে সম্পন্ন হোৱাৰ পাছত ভোজৰ ৰাহি হোৱা অন্যান্য খাদ্যৰ লগতে ছাগলী আৰু কুকুৰাৰ মাংসও ফ্ৰীজত থৈ দিছিল। তাৰ পাছতে পিছদিনা সেই মাংস খায় পৰিয়ালটোৰ কেইবাগৰাকী সদস্য স্বাস্থ্যজনিত বিভিন্ন সমস্যাত ভোগে। 

শৌচ, বমি, জ্বৰ আদি সমস্যাত ভোগাৰ পাছত তেওঁলোকক হাস্পতালত ভৰ্তি কৰোৱা হয় যদিও এজন লোকৰ খাদ্যত বিষক্ৰিয়া হৈ মৃত্যু হোৱা বুলি চিকিৎসকে জানিবলৈ দিয়ে। নিহত লোকজনৰ নাম হৈছে- শ্ৰী নিবাস যাদৱ। ইতিমধ্যে তেওঁলোকে সেৱন কৰা খাদ্যখিনিৰ নমুনা সংগ্ৰহ কৰিছে স্বাস্থ্য বিভাগে।