থাইলেণ্ড আৰু কম্বোডিয়াৰ সীমান্তত বাঢ়িছে উত্তেজনাঃ ১২ জনে হেৰুৱালে প্ৰাণ

ডিজিটেল ডেস্কঃ পুনৰ আন এখন যুদ্ধ দেখিব নেকি বিশ্বই? থাইলেণ্ড আৰু কম্বোডিয়াৰ মাজৰ বিবাদে এই প্ৰশ্ন বহুতৰে মনত উদয় হৈছে। প্ৰায় এটা শতিকাতকৈয়ো অধিক সময় ধৰি এই দুয়োখন দেশৰ মাজত অব্যাহত আছিল সংঘাত। সেই সংঘাতে শেহতীয়াকৈ জটিল ৰূপল ধাৰণ কৰে। ফলশ্ৰুতিত থাইলেণ্ড আৰু কম্বোডিয়াৰ সীমান্তত সংঘটিত হোৱা সামৰিক সংঘৰ্ষত অতি কমেও ১২ জন লোকৰ মৃত্যু হৈছে। 

থাইলেণ্ডৰ সেনাই জনোৱা মতে, মৃত্য অধিকাংশ লোকেই দেশখনৰ তিনিখন প্ৰদেশৰ সাধাৰণ নাগৰিক। মৃতকৰ মাজত নাই কম্বোডিয়াৰ কোনো নাগৰিক।বৃহস্পতিবাৰে পুৱা দুয়োপক্ষৰ মাজত হৈছিল সংঘৰ্ষ। তাৰ পিছত থাইলেণ্ডে প্ৰথমে কম্বোডিয়াৰ পৰা আৰু কম্বোডিয়াই থাইলেণ্ডৰ পৰা আক্ৰমণ হোৱা বুলি দাবী কৰিছে। 

তাৰোপৰি থাইলেণ্ডে কম্বোডিয়াই তেওঁলোকৰ ওপৰত ৰকেট নিক্ষেপ কৰাৰ অভিযোগ উত্থাপন কৰিছে। আনহাতে, কম্বোডিয়াই তেওঁলোকৰ ওপৰত থাইলেণ্ডে বিমান আক্ৰমণ চলোৱাৰ অভিযোগ উত্থাপন কৰিছে। এনে অভিযোগ, প্ৰতিঅভিযোগৰ পিছতে সংঘাত অধিক গুৰুতৰ হৈ পৰিছে।

এনে ফলশ্ৰুতিত দুয়োখন দেশে নিজৰ নাগৰিকক সীমান্তৰ সমীপৰ অঞ্চল খালী কৰিবলৈ নিৰ্দেশ দিছে। থাইলেণ্ডে সীমান্তৰ ৪০ হাজাৰ সাধাৰণ নাগৰিকক সুৰক্ষিত স্থানলৈ স্থানান্তৰ কৰিছে।

অভিযোগ, প্ৰতি অভিযোগৰ মাজতে জ্বলিছে দুয়োখন দেশ

থাইলেণ্ডৰ কৰ্তৃপক্ষই জনোৱা মতে, চুৰিন, উবন ৰাটচাথানী আৰু শ্ৰীছাকেট প্ৰদেশত দুয়োপক্ষৰ মাজত হোৱা সামৰিক সংঘৰ্ষত এটা আঠ বছৰীয়া শিশু আৰু এটি ১৫ বছৰীয়া কিশোৰকে ধৰি মুঠ ১১ জন সাধাৰণ নাগৰিক আৰু এজন সামৰিক বিষয়া নিহত হয়।

থাইলেণ্ডৰ ৰাষ্ট্ৰীয় নিৰাপত্তা পৰিষদে দাবী কৰা মতে, বৃহস্পতিবাৰে স্থানীয় সময় অনুসৰি পুৱা ৭:৩০ বজাৰ পিছত সীমান্তৰ ওচৰত থাইলেণ্ডৰ সৈন্যক নিৰীক্ষণ কৰিবলৈ কম্বোডিয়াৰ সেনাই ড্ৰ’ন প্ৰেৰণ কৰে। তাৰ কিছু সময়ৰ পিছতে কম্বোডিয়াৰ সেনাবাহিনীৰ সদস্যসকলে ৰকেট চালিত গ্ৰেনেড লৈ সীমান্তৰ ওচৰত সমবেত হয়।

থাইলেণ্ডৰ এন এছ চিৰ এগৰাকী মুখপাত্ৰই জনোৱা মতে, পুৱা প্ৰায় ৮:২০ বজাত কম্বোডিয়াৰ সৈন্যই তেওঁলোকৰ ওপৰত গুলীচালনা কৰাৰ ফলত থাইলেণ্ডৰ সৈন্যই প্ৰতিশোধ ল’বলৈ বাধ্য হয়। থাইলেণ্ডে অভিযোগ কৰে যে কম্বোডিয়াই তেওঁলোকৰ বিৰুদ্ধে বিএম-২১ ৰকেট লঞ্চাৰ আৰু আৰ্টিলাৰীকে ধৰি গধুৰ অস্ত্ৰ ব্যৱহাৰ কৰি সীমান্তৰ এখন চিকিৎসালয়, পেট্ৰ’ল পাম্প, ঘৰ আৰু চৰকাৰী অট্টালিকাৰ ক্ষতিসাধন কৰে।

আনহাতে কম্বোডিয়াই দাবী কৰিছে থাইলেণ্ডৰ সেনাইহে এই সংঘাতৰ সূচনা কৰিছিল। তেওঁলোকে জনোৱা মতে, পুৱা প্ৰায় ৬:৩০ বজাত থাইলেণ্ডৰ সেনাই সীমান্তৰ সমীপৰ এটা খেমাৰ-হিন্দু মন্দিৰৰ ফালে আগবাঢ়ি গৈ তাৰ চাৰিওফালে কাঁইটীয়া তাঁৰৰ বেৰ নিৰ্মাণ কৰি পূৰ্বৰ চুক্তি উলংঘা কৰে।

কম্বোডিয়াৰ ৰাষ্ট্ৰীয় প্ৰতিৰক্ষা মন্ত্ৰালয়ৰ মুখপাত্ৰ মালি ছোচিটাই জনোৱা মতে, থাইলেণ্ডৰ সৈন্যই পুৱা ৭ বজাৰ পিছত ড্ৰ’ণ প্ৰেৰণ কৰে আৰু প্ৰায় ৮:৩০ বজাত “পইণ্ট ব্লেংক” গুলীচালনা কৰে।

থাইলেণ্ড আৰু কম্বোডিয়াৰ মাজত সংঘাতৰ কাৰণ

দুয়োখন দেশৰ মাজত এই সংঘাত এশ বছৰতকৈও অধিক পুৰণি। ফ্ৰান্সে কম্বোডিয়া দখল কৰাৰ পিছত দুয়োখন দেশৰ মাজত এই সীমান্তৰ সৃষ্টি হৈছিল।কিন্তু ২০০৮ চনত কম্বোডিয়াই বিবাদিত অঞ্চলটোৰ একাদশ শতিকাৰ মন্দিৰ এটা ইউনেস্ক’ৰ বিশ্ব ঐতিহ্য ক্ষেত্ৰ হিচাপে পঞ্জীয়ন কৰিবলৈ চেষ্টা কৰাত পৰিস্থিতি অৱনতি ঘটে। 

থাইলেণ্ডে ইয়াৰ তীব্ৰ প্ৰতিবাদ সাব্যস্ত কৰে। দুয়োখন দেশৰ মাজত হোৱা বিবাদৰ ফলত বছৰ বছৰ ধৰি সংঘৰ্ষৰ সৃষ্টি হৈ আহিছে, যাৰ ফলত দুয়োপক্ষৰ বহু সৈনিক আৰু সাধাৰণ নাগৰিকৰো মৃত্যু হৈছে।

শেহতীয়াকৈ যোৱা মে’ মাহত সংঘৰ্ষৰ সময়ত কম্বোডিয়ান সৈনিকৰ মৃত্যুৰ পিছত দুয়োখন দেশৰ মাজত উত্তেজনা বৃদ্ধি পাইছে, যাৰ ফলত দ্বিপাক্ষিক সম্পৰ্ক এটা দশকৰো অধিক সময়ৰ ভিতৰত সৰ্বনিম্ন স্তৰলৈ গৈছে।

বিগত দুমাহত দুয়োখন দেশে এখনে আনখনৰ বিৰুদ্ধে সীমান্ত নিষেধাজ্ঞা আৰোপ কৰিছে। কম্বোডিয়াই থাইলেণ্ডৰ পৰা ফলমূল আৰু শাক-পাচলি আমদানি কৰাত নিষেধাজ্ঞা আৰোপ কৰাৰ লগতে বিদ্যুৎ আৰু ইণ্টাৰনেট সেৱাও বিচ্ছিন্ন কৰিছে।

ইফালে, যোৱা কেইটামান সপ্তাহত দুয়োখন দেশে সীমান্তত সামৰিক উপস্থিতি অধিক শক্তিশালী কৰি তুলিছে।