/asomiyapratidin/media/media_files/2025/07/26/123-2025-07-26-18-42-16.jpg)
ডিজিটেল সংবাদ, গুৱাহাটী : ‘ক্ৰিকেটকোষ’ৰ উদ্যোগত ২৬ জুলাই, শনিবাৰে গুৱাহাটীৰ লতাশিলস্থিত বিষ্ণু-নিৰ্মলা ভৱনত সফলতাৰে অনুষ্ঠিত হৈ যায় দ্বিতীয় বাৰ্ষিক মুকলি প্ৰাইজমানি কুইজ প্ৰতিযোগিতা আৰু স্কুলীয়া শিক্ষাৰ্থীৰ মাজত লিখিত কুইজ প্ৰতিযোগিতা। ৰাজ্যৰ উজনিৰ পৰা নামনিলৈ বিভিন্ন প্ৰান্তৰ পৰা অহা প্ৰায় ৩ শতাধিক প্ৰতিযোগীয়ে অংশগ্ৰহণ কৰা এই প্ৰতিযোগিতাৰ মাজতে ৰাজ্যৰ ক্ৰিকেট ক্ষেত্ৰলৈ আগবঢ়োৱা অৱদানৰ বাবে অসম মহিলা ক্ৰিকেট দলৰ প্ৰাক্তন অধিনায়িকা মণিষা দাসক বিশেষভাৱে সম্বৰ্ধনা জনোৱা হয়।
ক্ৰিকেটাৰগৰাকীক ‘ক্ৰিকেটকোষ’ৰ তৰফৰ পৰা এখন মানপত্ৰ, স্মাৰক আৰু ফুলাম গামোচাৰে সম্বৰ্ধনা জনোৱা হয়। সম্বৰ্ধনা গ্ৰহণ কৰি মহিলা ক্ৰিকেটাৰগৰাকীয়ে ‘ক্ৰিকেটকোষ’ৰ এই উদ্যোগক প্ৰশংসা কৰাৰ লগতে যুৱতীসকলক ক্ৰিকেটৰ প্ৰতি আকৰ্ষিত কৰাৰ ওপৰতো গুৰুত্ব প্ৰদান কৰে। তাৰোপৰি তেওঁ ক্ৰিকেট জীৱনৰ সন্দৰ্ভতো প্ৰতিযোগিতাস্থলীত উপস্থিত প্ৰতিযোগী, অভিভাৱক আদিক উদ্দেশ্যি চমুকৈ উল্লেখ কৰে।
আনহাতে আন এগৰাকী ক্ৰিকেটাৰ আবু নেছিম আহমেদকো আজিৰ এই অনুষ্ঠানতে অনুৰূপ ধৰণে সম্বৰ্ধনা জনোৱাৰ উদ্যোগ লোৱা হৈছিল যদিও ৰাজ্যৰ বাহিৰত থকাৰ বাবে তেওঁ উপস্থিত থাকিব নোৱাৰিলে। অৱশ্যে তেওঁ টেলিফোনৰ জৰিয়তেই অনুষ্ঠানটোলৈ শুভেচ্ছা জনায় কৃতজ্ঞতা জ্ঞাপন কৰে।
প্ৰায় ৬০ টাৰো অধিক দলে অংশগ্ৰহণ কৰা স্কুলীয়া ছাত্ৰ-ছাত্ৰীৰ লিখিত কুইজ প্ৰতিযোগিতাত শ্ৰেষ্ঠ দলৰ খিতাপ লাভ কৰে ধৃতিৰাজ শৰ্মা আৰু দেবাংক বাণী কাশ্যপে। তাৰোপৰি বিবেক বৰ্মন, সুৰুয আহমেদে দ্বিতীয় আৰু ত্ৰিনাভ কাশ্যপ, প্ৰিয়াংশু পি কাশ্যপে তৃতীয়স্থান লাভ কৰে।
প্ৰতিযোগিতাত দেখুওৱা পাৰদৰ্শিতাৰ বাবে আন তিনিটা দল ক্ৰমে সমৰদ্বীপ দাস, নিশান্ত বৈশ্যক চতুৰ্থ, মৃগাংক সাহা আৰু প্ৰিয়জিত কুন্দুক পঞ্চম আৰু ধিমান জ্যোতি কলিতা, নিনাদ নৈৰিৎ প্ৰকাশক ষষ্ঠ পুৰস্কাৰ প্ৰদান কৰা হয়। মুকলি ক্ৰিকেট কুইজ প্ৰতিযোগিতাতো ৬০ টাৰো অধিক প্ৰতিযোগী দলে অংশগ্ৰহণ কৰে।
তাৰ মাজৰ পৰা ৬ টা দলক মূল প্ৰতিযোগিতালৈ নিৰ্বাচিত কৰা হয়। এই প্ৰতিযোগিতাত প্ৰথম শ্ৰেষ্ঠ দলৰ খিতাপ লাভ কৰে চন্দন দুৱৰা আৰু দ্বীপাঞ্জন দেৱে। সেইদৰে মিত চৌধুৰী, মৃদুলৰাম কলিতাই দ্বিতীয় আৰু বিক্ৰমদ্বীৱ ডেকা, দিলীপ কুমাৰ শৰ্মাই তৃতীয় শ্ৰেষ্ঠ দলৰ খিতাপ লাভ কৰে।
তিনিওটা বিজয়ী দলকে নগদ ধনৰ পুৰস্কাৰ, মান পত্ৰ আৰু ফুলাম গামোচা প্ৰদান কৰা হয়। চতুৰ্থ স্থানৰ সায়ন মজুমদাৰ, গৌৰৱ হালৈ, পঞ্চম স্থানৰ অৰ্চিত শৰ্মা, মানস জ্যোতি বৈশ্য আৰু ষষ্ঠ স্থানৰ মৃদুল তামুলী, ৰেৱতী মোহন ফুকনকো মানপত্ৰ প্ৰদান কৰা হয়। প্ৰতিযোগিতাৰ শ্ৰেষ্ঠ দৰ্শকৰ সন্মান লাভ কৰে সৌৰভ আম্বাটছিয়ে। তেওঁক এটি স্মাৰক, এখন মানপত্ৰ আৰু এখন গ্ৰন্থ পুৰস্কাৰ হিচাপে প্ৰদান কৰা হয়। প্ৰতিযোগিতাত বিশিষ্ঠ অতিথি হিচাপে উপস্থিত থাকে ৰাজ্যৰ দুই জ্যেষ্ঠ ক্ৰীড়া সাংবাদিক সুবোধমল্ল বৰুৱা আৰু যুগললোচন দাস।
দুয়োগৰাকীয়ে ক্ৰিকেটকোষৰ এই উদ্যোগক প্ৰশংসা কৰি আগন্তুক সময়তো এই ধাৰাবাহিকতা ৰক্ষা কৰিবলৈ আহ্বান জনায়। বৰ্ণাঢ্য ক্ৰীড়া সাংবাদিকতাৰ ক্ষেত্ৰখনত অৰ্জন কৰা অভিজ্ঞতাৰ আধাৰত কুইজ সম্পৰ্কীয় বক্তব্যৰে দুয়োগৰাকীয়ে অংশগ্ৰহণকাৰী আৰু উপস্থিত দৰ্শকক আপ্লুত কৰে।
কুইজ প্ৰতিযোগিতাখন পৰিচালনা কৰে জনপ্ৰিয় ‘কুইজ মাষ্টাৰ’ তথা ক্ৰীড়া সাংবাদিক দীপাংকৰ কৌশিকে। স্ক’ৰাৰ হিচাপে দায়িত্ব পালন কৰে প্ৰাঞ্জল শইকীয়াই।