প্ৰধানমন্ত্ৰী মোডীয়ে গাড়ী চলাইছে। ষ্টেৰিয়েঙত হাত থৈ বাৰে বাৰে তেওঁ মনিটৰলৈ চাইছে। কাৰণ তেওঁ ভাৰততেই থাকি ৫ জিৰ জৰিয়তে আমেৰিকাত এই গাড়ী চলাইছে। এতিয়া আমি বহু আগবাঢ়ি গ'লো।
সৌ সিদিনা লৈকে মোবাইলত এটা ভিডিঅ' বা ইণ্টাৰনেট খোলাটো এক প্ৰকাৰৰ অসম্ভৱেই আছিল। ২ জিৰ দিনত ভিডিঅ' এটা চাবলৈ কিমান অসুবিধা হৈছিল সেয়া ভুক্তভোগীয়ে জানে। তাৰ পাছত আহিল ৩ জি।
উন্নত হ'ল ইণ্টাৰনেটৰ স্পীড। তাৰ পাছত ৪ জি, আৰু এইবাৰ ৫ জি। আগষ্ট মাহত অনুষ্ঠিত এক নিলামত এই ৫-জি সেৱাৰ মালিকীস্বত্ব লাভ কৰা ৰিলায়েঞ্চে আৰম্ভ কৰিব এই সেৱা । ২০২৩ বৰ্ষৰ ডিছেম্বৰ মাহলৈ সমগ্ৰ দেশতে উপলব্ধ হ'বলগীয়া এই সেৱা শনিবাৰে এক অনুষ্ঠানত উদ্বোধন কৰে দেশৰ প্ৰধানমন্ত্ৰী নৰেন্দ্ৰ মোডীয়ে ।
উল্লেখ্য যে, ৫-জি এতিয়া কেৱল এক সেৱা নহয়, ইয়াৰ সৈতে ওতপ্ৰোতভাৱে জড়িত আছে দেশৰ তথ্য-প্ৰযুক্তি বিদ্যাৰ ইতিহাসৰ এক অধ্যায় । ১৯৮৬ চনত কেৱল শিক্ষা আৰু গৱেষণাৰ বাবে মুকলি কৰি দিয়া ইন্টাৰনেট সেৱা ২০২০ চনৰ তথ্য অনুসৰি দেশৰ ৭১.৮৪ কোটি অৰ্থাৎ ৫৪ শতাংশ লোকে ব্যৱহাৰ কৰে ।
১৯৮৬ চনত এডুকেশ্যনেল ৰিছাৰ্চ নেটৱৰ্কে দেশত আৰম্ভ কৰা ইন্টাৰনেট সেৱা আছিল কেৱল ৮ খন প্ৰখ্যাত শিক্ষানুষ্ঠানৰ বাবে । এই কেইখন আছিল নেশ্যনেল চেন্টাৰ ফ'ৰ চফ্টৱেৰ টেকনলজি (বোম্বে), ইণ্ডিয়ান ইনষ্টিটিউট অৱ চায়েঞ্চ, দেশৰ ৫ খন আই আই টি (দিল্লী, মুম্বাই, কানপুৰ, খড়গপুৰ আৰু চেন্নাই) আৰু নতুন দিল্লীৰ ডাইৰেক্টৰ অৱ এডুকেশ্যন ।
আনহাতে, ১৯৯৫ চনৰ স্বাধীনতা দিৱসৰ দিনা সমগ্ৰ দেশবাসীৰ বাবে মুকলি কৰি দিয়া হৈছিল ইন্টাৰনেট সেৱা । ৫,২০০ টকাৰ বিনিময়ত ৯.৬ কিলো বিট/ছেকেণ্ডৰ বেগত ২৫০ ঘন্টাৰ বাবে ব্যৱহাৰ কৰিব পৰা গৈছিল এই সেৱা । বৰ্তমানৰ ৫-জি সেৱাই এই বেগ বৃদ্ধি কৰিব ১০০-৩০০ মেগা বাইট/ছেকেণ্ডলৈ ।
৩৬ বছৰীয়া এই স্পেকট্ৰাম যাত্ৰা সাক্ষী হৈ ৰয় দেশৰ তথ্য প্ৰযুক্তিৰ উন্নতিৰ সকলো পদক্ষেপৰ । ইন্টাৰনেট অবিহনে আজি অচল আন বহু আনুসংগিক সেৱা । আৰু কেৱল সেৱাই নহয় বৰং ইন্টাৰনেট অবিহনে অচল আমাৰ জীৱন ধাৰা ।
নিমিষতে স্তব্ধ হৈ পৰিব দেশ । তেনে এক সময়তে, দেশত আৰম্ভ হোৱা ৫-জি সেৱাই সূচনা কৰিব এক নতুন যুগৰ । কিন্তু তাৰ সৈতেই জড়িত হৈ আছে আন বহু সমস্যা । উন্নত ৰাষ্ট্ৰ সমুহে কাহানিবাই ৫-জি সেৱা লাভ কৰাৰ পাছতো ভাৰতত আছে কোটি কোটি ২-জি ব্যৱহাৰকাৰী ।
অৱশ্যে ইন্টাৰনেটৰ বাবে নহয় বৰং ফোন আৰু এছ এম এছৰ ক্ষেত্ৰত হে বৰ্তমান ব্যৱহাৰ কৰা হয় ২-জি । অনুমান কৰা হয় যে, ২-জি উপভোক্তা সকলৰ বেছি সংখ্যকেই জ্যেষ্ঠ নাগৰিক যি কেৱল যোগাযোগৰ বাবে হে ব্যৱহাৰ কৰে ফোন ।
কিন্তু এই সকল ব্যৱহাৰকাৰীৰ পৰা উপযুক্ত ৰাজহ সংগ্ৰহ কৰিব পৰা নাই টেলীকম সেৱা সংস্থাসমূহে । যাৰ বাবে লোকচানত চলাই নিব লগীয়া হৈছে ব্যৱসায় । ৰিলায়েঞ্চ জিঅ'ৰ বাহিৰে আন সকলো টেলীকম সেৱাৰে ২-জিৰ কোটি কোটি উপভোক্তা থকাৰ বাবে বন্ধ কৰিব পৰা নাই ২-জি সেৱা ।
এই সেৱাসমূহ উন্নত কৰি অন্তত ৩-জি লৈ নিলেও উপভোক্তাৰ বাবে আটাইতকৈ কম খৰচী উপায় হ'ব শোচনীয় অৱস্থাৰ বি এচ এন এল অথবা জিঅ' । তেনে স্থলত আটাইতকৈ বেছি লোকচান হ'ব ভোডাফোন-আইডিয়া আৰু ভাৰতী এয়াৰটেলৰ ।
৫-জি সেৱাই কেৱল ইন্টাৰনেট সেৱাই উন্নত নকৰে, ইয়াৰ উপৰিও উন্নত কৰিব দেশৰ অৰ্থনীতি । ২০৩৫ বৰ্ষলৈ ৫-জিৰ জৰিয়তে ৪৫০ বিলিয়ন ডলাৰ অৰ্জন কৰাৰ লক্ষ্য কৰা হৈছে সমগ্ৰ দেশত । যাক গণ্য কৰা হৈছে দেশৰ অৰ্থনীতি আৰু সামাজিক ক্ষেত্ৰৰ উন্নয়নৰ আহিলা ৰূপে ।
প্ৰধানমন্ত্ৰী নৰেন্দ্ৰ মোডীৰ ভাষ্য অনুসৰি, নৱ ভাৰত এতিয়া কেৱল প্ৰযুক্তিৰ উপভোক্তাই নহয় বৰং প্ৰযুক্তিৰ ৰূপায়ক ৰূপেও জনাজাত হ'ব সমগ্ৰ বিশ্বত । আনহাতে, আদিত্য বিৰলা গ্ৰুপৰ অধ্যক্ষ কুমাৰ বিৰলাৰ মন্তব্য অনুসৰি ৫-জিৰ জৰিয়তেই অহা তিনি বছৰত ৫ ট্ৰিলিয়ন ডলাৰৰ অৰ্থনীতি হ'ব ভাৰত । এনে মন্তব্যসমূহৰ পৰা সহজেই অনুমান কৰিব পাৰি দেশত ৫-জিৰ প্ৰভাৱ ।
কিন্তু এই সমগ্ৰ উন্নয়নৰ সৈতে জড়িত হৈ আছে আন এক ক'লা ইতিহাস । সেইয়া হৈছে ২০০৭ বৰ্ষৰ ২-জি স্পেকট্ৰাম কেলেংকাৰী । সমগ্ৰ দেশত চাঞ্চল্যৰ সৃষ্টি কৰা এই কেলেংকাৰীৰ ফলত ভাৰতৰ ক্ষতি হৈছিল প্ৰায় ১,৭৬০ বিলিয়ন ডলাৰৰ ।
২০০৭ চনতে ১,৭৬০ বিলিয়ন ডলাৰৰ ক্ষতি আছিল ভাৰতীয় অৰ্থনীতিৰ ওপৰত এক মোক্ষম আঘাত । সেই সময়ৰ টেলীকম মন্ত্ৰী এ. ৰাজাৰ তত্বাৱধানত সংঘটিত হৈছিল এই কেলেংকাৰী ।
এই কেলেংকাৰীৰ পাছতেই অত্যাধিক সাৱধানতা অৱলম্বন কৰিব লগীয়া হৈছিল দেশৰ টেলীকম বিভাগে । তাৰ পাছত ২০১৬ চনত দেশত আৰম্ভ হয় ৰিলায়েঞ্চ জিঅ'ৰ ৪-জি সেৱা । ৪-জি সেৱাৰ জৰিয়তেই সমগ্ৰ দেশৰ টেলীকম সেৱাৰ এক প্ৰকাৰৰ একছত্ৰী সম্ৰাট হৈ পৰে ৰিলায়েঞ্চ ।
তাৰ পাছতেই যেন ইন্টাৰনেট সেৱাৰ অশ্বমেধ ঘোৰাৰ বেগ লয় ৰিলায়েঞ্চে । প্ৰায় ৮৮,০৭৮ কোটি টকাত ৫-জি ৰ মালিকীস্বত্ব ক্ৰয় কৰে ৰিলায়েঞ্চে । এই দূৰন্ত ঘোৰাই পঞ্চম প্ৰজন্মৰ ইন্টাৰনেট সেৱাৰ বাবদ খৰচ কৰিব প্ৰায় ২ ট্ৰিলিয়ন টকা । তেন্তে এই সেৱাৰ বাবদ লাভ কৰিব লগীয়া অংক ৰাশি সহজেই অনুমেয়।
