মোডীৰ ভূমিকাত অসন্তুষ্ট ট্ৰাম্পঃ বাণিজ্য, যুদ্ধ, কূটনীতিত আমেৰিকাৰ স্বাৰ্থৰ বিৰুদ্ধে ভাৰতৰ স্থিতি...

ভাৰত-ৰাছিয়াৰ ঘনিষ্ঠ সম্পৰ্কত অসন্তুষ্ট ট্ৰাম্প। এই কথা উল্লেখেৰে ট্ৰাম্পে ভাৰতৰ ওপৰত জাপি দিছে ২৫ শতাংশ শুল্ক আৰু অতিৰিক্ত জৰিমণা। ভাৰতৰ বিৰুদ্ধে ৰাছিয়া-ইউক্ৰেইনৰ যুদ্ধত ইন্ধন যোগোৱাৰো অভিযোগ ট্ৰাম্প প্ৰশাসনৰ। দক্ষিণ পূৱ এছিয়াত প্ৰভাৱ বিস্তাৰৰ উদ্দেশ্যতো আমেৰিকাক বাধা দিছে ভাৰতে ! ট্ৰাম্পৰ অসন্তুষ্টি, অভিযোগ আৰু অকথিত উদ্দেশ্যে এই বিষয়সমূহ সামৰি অসমীয়া প্ৰতিদিন ডিজিটেলৰ এক বিশেষ প্ৰতিবেদন।

ভাৰতক বন্ধু আখ্যা দি ভাৰতৰ বিৰুদ্ধেই অত্যাধিক শুল্ক জাপি দিয়াৰ উপৰিও জৰিমণা আৰোপ কৰিছে ড'নাল্ড ট্ৰাম্পে। ইয়াৰ বিপৰীতে পাকিস্তানৰে বাণিজ্যিক চুক্তি স্বাক্ষৰ কৰাৰ উপৰিও শুল্কৰ ক্ষেত্ৰত যথেষ্ট সকাহো দিছে। ট্ৰাম্পৰ কথা-বতৰাত এতিয়া ভাৰত নহয়, পাকিস্তানহে যেন তেওঁলোকৰ পৰম মিত্ৰ, তাৰেই আভাস পোৱা গৈছে। 

বুধবাৰে ড'নাল্ড ট্ৰাম্পে ভাৰতৰ বিৰুদ্ধে ২৫ শতাংশ শুল্ক আৰোপ কৰি অতিৰিক্তভাৱে জৰিমণা আৰোপ কৰাৰ কথাও উল্লেখ কৰিছে। কিন্তু সেই জৰিমণা কি হ’ব এতিয়ালৈকে নিশ্চিত হোৱা নাই। ইয়াৰ বিপৰীতে পাকিস্তানৰ ওপৰত আৰোপ কৰা হৈছে ১৯ শতাংশ শুল্ক। 

ট্ৰাম্পে এইদৰে ভাৰতৰ ওপৰত ২৫ শতাংশ শুল্ক আৰোপ কৰাৰ আঁৰত যে ভাৰতৰ ৰাছিয়ে ঘনিষ্ঠতা সেই কথাও স্পষ্ট কৰি দিছে। কেৱল ৰাছিয়াৰ সৈতে ঘনিষ্ঠতাই নহয়, আমেৰিকাৰ অভিযোগ ভাৰতে ৰাছিয়া আৰু ইউক্ৰেইনৰ মাজৰ যুদ্ধ অব্যাহত থকাৰ ক্ষেত্ৰতো সহায় কৰি আহিছে। 

ভাৰত-ৰাছিয়াৰ বাণিজ্যিক সম্পৰ্ক আৰু আমেৰিকাৰ অসন্তুষ্টি

ভাৰতে ৰাছিয়াৰ পৰা খনিজ তেল আৰু অস্ত্ৰ আদি আমদানি কৰি আহিছে। ৰাছিয়াৰ সৈতে দ্বিপাক্ষীক সমৰ্ক ভাৰতৰ যথেষ্ট শক্তিশালী। তাতেই অসন্তুষ্ট ড'নাল্ড ট্ৰাম্প।

ভাৰত আৰু ৰাছিয়াই যোৱা বিত্তীয় বৰ্ষত ৬৮ বিলিয়ন ডলাৰ অৰ্থাত প্ৰায় ৬ লাখ কোটি টকাৰ বাণিজ্য কৰিছে। ভাৰতে ৪২ হাজাৰ কোটি টকাৰ সামগ্ৰী ৰাছিয়ালৈ ৰপ্তানি কৰিছে আৰু ৫.৫ লাখ কোটি টকাৰ সামগ্ৰী ৰাছিয়াৰ পৰা আমদানি কৰিছে। 

ইউক্ৰেইন-ৰাছিয়াৰ যুদ্ধ আৰম্ভ হোৱাৰ পিছতেই ইউৰোপীয় ইউনিয়নে ৰাছিয়াৰ ওপৰত বহু কেইটা নিষেধাজ্ঞা আৰোপ কৰিছিল। তাৰে এটা আছিল ৰাছিয়াৰ পৰা তেল ক্ৰয়ত নিষেধাজ্ঞা। এনে পৰিস্থিতিত ৰাছিয়াই আন্তঃৰাষ্ট্ৰীয় বজাৰতকৈ তেলৰ মূল্য যথেষ্ট হ্ৰাস কৰিছিল।

সেই সুযোগ গ্ৰহণ কৰি ভাৰতে ৰাছিয়াৰ পৰা কম মূল্যত তেল আমদানি কৰি আহিছে। মন কৰিবলগীয়া যে ভাৰত বিশ্বৰ ভিতৰতে আজিৰ তাৰিখত তেল আমদানি কৰা দেশৰ তালিকাত তৃতীয় স্থানত আছে। ভাৰতে ৰাছিয়াৰ পৰা এইদৰে কম মূল্যত তেল ক্ৰয় কৰি অধিক মূল্যত ৰপ্তানিও কৰি আহিছে। ফলত অৰ্থ নৈতিকভাৱে যথেষ্ট লাভাম্বিত হৈছে ভাৰত। 

বিশ্বৰ তৃতীয় স্থানৰ তেল আমদানিকাৰক দেশৰ তালিকাৰ তৃতীয়স্থানত থকা ভাৰতে ৩৫ শতাংশ তেলেই আমদানি কৰে ৰাছিয়াৰ পৰা। ইয়াৰ পূৰ্বে ভাৰতে ইউ এ ই, চৌদি আৰৱ আদিৰ দৰে পশ্চিম এছিয়াৰ দেশৰ পৰা  তেল আমদানি কৰিছিল। 

আনহাতে ভাৰতে ৰাছিয়াৰ পৰা বিভিন্ন অস্ত্ৰ যেনে যুদ্ধ বিমান, টেংক, শক্তিশালী ক্ষেপণাস্ত্ৰ আদিও আমদানি কৰি আহিছে। ভাৰত বিশ্বৰ ভিতৰতে দ্বিতীয় বৃহত্তম অস্ত্ৰ আমদানিকাৰক দেশ। 

অৱশ্যে ভাৰতে ড'নাল্ড ট্ৰাম্পক সন্তুষ্ট কৰিবলৈকে যোৱা এটা সপ্তাহৰ পৰা ৰাছিয়াৰ পৰা তেল আমাদানি কৰা বন্ধ কৰিছে। তথ্য অনুসৰি যোৱা এটা সপ্তাহৰ পৰা ভাৰতৰ ছটাকৈ ৰাষ্ট্ৰীয়কৃত তেল শোধনাগৰে ৰাছিয়াৰ পৰা তেল আমদানি বন্ধ কৰিছে। কিন্তু তাৰ পিছতো সন্তুষ্ট হোৱা নাই ট্ৰাম্প। 

ৰাছিয়া-ইউক্ৰেইন যুদ্ধত ভাৰতৰ সাৰ-পানীৰ অভিযোগ

আমেৰিকাই ভাৰতৰ বিৰুদ্ধে ২৫ শতাংশ শুল্ক আৰু অতিৰিক্ত জৰিমণা আৰোপ কৰাৰ আঁৰত যে ৰাছিয়াৰ সৈতে ভাৰতৰ ঘনিষ্ঠতা সেই কথা স্পষ্ট হৈছে। ট্ৰাম্প প্ৰশাসনে আনকি অভিযোগ কৰিছে ৰাছিয়া আৰু ইউক্ৰেইনৰ যুদ্ধ অব্যাহত ৰখাত ভাৰতেই ইন্ধন যোগান ধৰিছে। 

ভাৰতৰ এনে ভূমিকাত হেনো হতাশ ডনাল্ড ট্ৰাম্প। আমেৰিকাৰ বিদেশ মন্ত্ৰী মাৰ্কো ৰুবিঅ’ই আমেৰিকাৰ সংবাদ মাধ্যমক সম্বোধন কৰাৰ সময়ত দাবী কৰিছে যে, ভাৰতে ৰাছিয়া-ইউক্ৰেইনৰ যুদ্ধত ইন্ধন যোগান ধৰি আহিছে। 
তেওঁ উল্লেখ কৰা মতে ভাৰতে ৰাছিয়াৰ পৰা তেল ক্ৰয় কৰি ৰাছিয়া-ইউক্ৰেইনৰ যুদ্ধ অব্যাহত ৰখাত সহায় কৰিছে। ৰুবিঅ’ই কয়, "চাওক, বিশ্ব বাণিজ্যত ভাৰত আমাৰ বন্ধু। কৌশলগত অংশীদাৰ। কিন্তু বৈদেশিক নীতিৰ ক্ষেত্ৰত কাৰো সৈতে সকলো সময়তে ১০০ শতাংশ সমন্বয় স্থাপন কৰিব নোৱাৰি।" 

ৰুবিঅ'ই আৰু কয়, "ভাৰতত শক্তিৰ বিপুল চাহিদা আছে। তেওঁলোকে খনিজ তেল, কয়লা, গেছ আদি ক্ৰয় কৰে। প্ৰতিখন দেশৰ দৰেই তেওঁলোকেও নিজৰ অৰ্থনীতি সুৰক্ষিত আৰু শক্তিশালী কৰাৰ প্ৰয়োজন। গতিকে তেওঁলোকে এই সকলোবোৰ বস্তু ৰাছিয়াৰ পৰা ক্ৰয় কৰে। ৰাছিয়াই অতি কম দামত তেল বিক্ৰী কৰি আছে। 

ৰাছিয়াৰ ওপৰত থকা আন্তঃৰাষ্ট্ৰীয় নিষেধাজ্ঞাৰ বাবে তেওঁলোকৰ তেলৰ মূল্য হ্ৰাস কৰিছে।তাৰ সুবিধা গ্ৰহণ কৰি ভাৰতে কম মূল্যত ৰাছিয়াৰ পৰা তেল ক্ৰয় কৰিছে। ৰুবিঅ’ৰ মতে ভাৰতৰ এই কাৰ্যই ৰাছিয়াক যুদ্ধ অব্যাহত ৰখাত সহায় কৰিছে। সেয়ে এয়া ড’নাল্ড ট্ৰাম্পৰ বাবে ডাঙৰ অস্বস্তিকৰ বিষয়।" 

ৰুবিঅ’ই কয় যে, বিশ্বৰ আন বহু দেশে তেল ৰপ্তানি কৰে। ইয়াৰ পিছতো ভাৰতে ৰাছিয়াৰ পৰা ইমানখিনি তেল ক্ৰয় কৰাত হতাশ হৈ পৰিছে ৰাষ্ট্ৰপতি ট্ৰাম্প। 

ভাৰতৰ বিৰুদ্ধে এনে স্থিতিৰ আঁৰত দক্ষিণ পূৱ এছিয়াত আমেৰিকাৰ প্ৰভাৱ অক্ষুন্ন ৰখা

ভাৰত- ৰাছিয়াৰ বাণিজ্যিৰ সম্পৰ্কই যে ডনাল্ড ট্ৰাম্পৰ অসন্তুষ্টিৰ মূল কাৰণ সেয়া তেওঁলোকৰ ভাষ্যতে স্পষ্ট হৈছে। ৰাছিয়াৰ সৈতে ভাৰতৰ এনে ঘনিষ্ঠতাই আমেৰিকাক আন এক উদ্দেশ্য পূৰণতো বাধাৰ সৃষ্টি কৰিছে। সেই কথা অৱশ্যে কোনেও আনুষ্ঠানিকভাৱে কোৱা নাই। 

দক্ষিণ পূব এছিয়াত আমেৰিকাৰ অন্যতম প্ৰধান প্ৰতিদ্বন্দী চীন। সেয়েহে আমেৰিকাই এই অঞ্চলটোত তেওঁলোকৰ প্ৰভাৱ বিস্তাৰৰ বাবে ভাৰতৰ সৈতে ঘনিষ্ঠতা বৃদ্ধি কৰি চীনক নিয়ন্ত্ৰণত ৰখাৰ কৌশল ৰচনা কৰি আহিছে আমেৰিকাই। ভাৰত-চীনৰ শত্ৰুতাপূৰ্ণ সম্পৰ্কৰ বাবেই সেই সুযোগ গ্ৰহণ কৰিছে আমেৰিকাই। 

কিন্তু শেহতীয়াকৈ ভাৰত-ৰাছিয়াৰ ঘনিষ্ঠতা বৃদ্ধি পোৱাৰ বাবে আমেৰিকাৰ সেই পৰিকল্পনাত বহু বাধাৰ সৃষ্টি হৈছে। ভাৰতৰ প্ৰধানমন্ত্ৰী নৰেন্দ্ৰ মোডীয়ে যোৱা অক্টোবৰ মাহত ৰাছিয়া ভ্ৰমণ কৰিছিল। চলিত বৰ্ষৰ শেষৰ ফালে ৰাছিয়াৰ ৰাষ্ট্ৰপতি ভ্লাদিমিৰ পুটিনে ভাৰত ভ্ৰমণ কৰাৰ কথা। 

দক্ষিণ পূৱ এছিয়াত আমেৰিকাৰ প্ৰভাৱ অব্যাহত ৰখাৰ স্বাৰ্থতে এতিয়া আমেৰিকাৰ ভাৰতৰ বিপৰীতে পাকিস্তানক অধিক গুৰুত্ব দিবলৈ চেষ্টা কৰিছে। তাৰেই ফলশ্ৰুতিত পাকিস্তানৰে বাণিজ্যিক চুক্তি কৰি সেই দেশৰ তৈল ভাণ্ডাৰ বিকাশৰ বাবে কথা দিছে। বাণিজ্যিক শুল্ক ১৯ শতাংশতে সীমাবদ্ধ ৰাখিছে।