ভাৰতৰ মহাকাশ প্ৰযুক্তিৰ সামৰ্থ্য বৃদ্ধিৰ লক্ষ্য ৰাষ্ট্ৰীয় মহাকাশ প্ৰচাৰ আৰু অনুমোদন কেন্দ্ৰৰ...

ডিজিটেল ডেস্ক : মহাকাশ নিয়ন্ত্ৰক তথা প্ৰমোটাৰ ভাৰতীয় ৰাষ্ট্ৰীয় মহাকাশ প্ৰচাৰ আৰু অনুমোদন কেন্দ্ৰ চমুকৈ IN-SPACE এ ভাৰতৰ মহাকাশ প্ৰযুক্তিৰ সামৰ্থ্যৰ বৃদ্ধি আৰু সমৰ্থনৰ বাবে প্ৰযুক্তি গ্ৰহণ পুঁজি (টি এ এফ) আৰম্ভ কৰাৰ কথা ঘোষণা কৰিছে । ভাৰতীয় কোম্পানীসমূহে বিকশিত কৰা প্ৰাৰম্ভিক পৰ্যায়ৰ মহাকাশ প্ৰযুক্তিসমূহক বাণিজ্যিকভাৱে সম্ভৱপৰ সামগ্ৰীলৈ পৰিৱৰ্তন কৰাত সহায় কৰিবলৈ এই পুঁজিৰ প্ৰাককলন প্ৰস্তুত কৰা হৈছে। 

উল্লেখযোগ্য যে ইয়াৰ দ্বাৰা বে-চৰকাৰী সংস্থাসমূহক আংশিক পুঁজি প্ৰদান কৰি টি এ এফে ড্ৰয়িং ব’ৰ্ডৰ পৰা বজাৰৰ বাবে উদ্ভাৱনী ধাৰণাসমূহৰ পৰিৱৰ্তনত সহায় কৰিব এই পদক্ষেপে। একেদৰে ভাৰতৰ ভিতৰত মহাকাশ প্ৰযুক্তিৰ বিকাশক প্ৰসাৰিত কৰাৰ লগতে আমদানিকৃত সমাধানৰ ওপৰত দেশখনৰ নিৰ্ভৰশীলতা হ্ৰাস কৰাৰ বাবে টি এ এফৰ ৰূপায়ণৰ দিহা কৰা হৈছে। 

ইয়াৰ উপৰি গৱেষণা আৰু উন্নয়নত বিনিয়োগ কৰি টি এ এফে চৰকাৰী সংস্থা আৰু ব্যক্তিগত খণ্ডৰ মাজত এক শক্তিশালী অংশীদাৰিত্ব গঢ়ি তোলাত সহায় কৰিব। যাৰ জৰিয়তে ভাৰতক মহাকাশ উদ্যোগৰ এক নিৰ্ভৰযোগ্য বিশ্ব অংশীদাৰ হিচাপে স্থান দিব। 

এই সন্দৰ্ভত আই এন-স্পেচৰ অধ্যক্ষ পৱন গোৱেংকাই কয় যে, এই পুঁজিয়ে ষ্টাৰ্টআপ আৰু এম এছ এম ইৰ বাবে প্ৰকল্পৰ খৰচৰ ৬০% পৰ্যন্ত আৰু বৃহৎ উদ্যোগৰ বাবে ৪০% পৰ্যন্ত আৰ্থিক সহায় আগবঢ়াব। প্ৰতিটো প্ৰকল্পৰ বাবে সৰ্বোচ্চ পুঁজিৰ সীমা ২৫ কোটি টকা। 

লগতে কয়- “আমি এই পুঁজিৰ ডিজাইন কৰিছো যাতে উদ্ভাৱকসকলক প্ৰাৰম্ভিক পৰ্যায়ৰ উন্নয়ন আৰু বাণিজ্যিকীকৰণৰ মাজৰ ব্যৱধান দূৰ কৰাত সহায় কৰিব পাৰি। এই সমৰ্থনে কোম্পানীসমূহক তেওঁলোকৰ প্ৰযুক্তিসমূহ পৰিশোধন কৰিবলৈ, উৎপাদন প্ৰক্ৰিয়া বৃদ্ধি কৰিবলৈ, আৰু ভাৰতৰ ভিতৰত আৰু বিদেশ উভয়তে বজাৰৰ চাহিদা পূৰণ কৰিবলৈ সক্ষম কৰিব।“