অগপত যোগদান কৰিব প্ৰাক্তন কংগ্ৰেছী মন্ত্ৰী ছিদ্দিক আহমেদে...

ডিজিটেল ডেস্কঃ  সাংসদ গৌৰৱ গগৈৰ নেতৃত্বত ৰাজ্যত কংগ্রেছে অহা বিধানসভা নিৰ্বাচনৰ বাবে তৎপৰতা আৰম্ভ কৰাৰ সময়তে দলীয় নেতৃত্বৰ বিৰুদ্ধে সৰৱ হৈ পৰিছে প্রাক্তন কংগ্ৰেছী মন্ত্রী ছিদ্দেক আহমেদ। তেওঁৰ মতে গৌৰৱ গগৈৰ নেতৃত্বত ৰাজ্যত কংগ্ৰেছৰ উত্তৰণ সম্ভৱপৰ নহয়।

সেয়েহে তেওঁ ৰাজ্য চৰকাৰৰ সহযোগী দল অসম গণ পৰিষদত যোগদান কৰিবলৈ সাজু হৈছে। ইয়াৰ বাবে তেওঁ দলটোৰ নেতৃত্বৰ পৰা সেউজ সংকেত লাভ কৰা বুলিও সদৰী কৰিছে। প্রাক্তন মন্ত্রীজনে আজি সাংবাদিকৰ আগত এই কথা সদৰী কৰিছে। ছিদ্দেক আহমেদে কয়-কেৱল অসমতেই নহয়, সমগ্র দেশতে কংগ্ৰেছৰ গ্রহণযোগ্যতা লোপ পালে।

গৌৰৱ গগৈ নেতৃত্বলৈ আহিলেও কংগ্ৰেছক পুনৰুজ্জীৱিত কৰিব পৰা যাব বুলি তেওঁ বিশ্বাস নকৰে। গৌৰৱ গগৈৰ ব্যৰ্থতা পঞ্চায়ত নিৰ্বাচনৰ ফলাফলে স্পষ্ট কৰিলে বুলি তেওঁ মন্তব্য কৰে। অর্থাৎ তেওঁৰ মতে গৌৰৱ গগৈৰ নেতৃত্বত অসমত কংগ্রেছৰ উত্তৰণ সম্ভৱ নহয়।

তেওঁ লগতে কয় যে তেওঁ বহুদিন ধৰি কংগ্ৰেছৰ সৈতে জড়িত নাছিল। কিন্তু শেহতীয়াভাৱে তেওঁক পুনৰ কংগ্ৰেছত যোগদান কৰাবলৈ গৌৰৱ গগৈয়ে তেওঁৰ ওচৰলৈ প্রতিনিধি পঠিয়াইছিল। অৱশ্যে এই প্রস্তাৱত তেওঁ সম্মত হোৱা নাছিল বুলি জনায়।

 মুখ্যমন্ত্রী ড° হিমন্তবিশ্ব শৰ্মাৰ সৈতে ভাল সম্পর্ক থকা সত্ত্বেও কিয় তেওঁ বিজেপিত যোগ দিয়া নাই বুলি সোধা প্রশ্নৰ উত্তৰত ছিদ্দেক আহমেদে কয়- দক্ষিণ কৰিমগঞ্জ সমষ্টি এটা সংখ্যালঘু বসতিপ্রধান এলেকা। মুছলমানসকলৰ বিজেপিৰ ওপৰত পূর্ণ বিশ্বাস নাই। সেয়ে বিজেপিত থাকি ৰাজনৈতিক ভৱিষ্যৎ নির্ধাৰণ কৰা কঠিন। সেইকাৰণে তেওঁ অগপকে সঠিক বুলি বিবেচনা কৰিছে। তেওঁ ডিচেম্বৰত বা জানুৱাৰীত যোগদান কৰিব বুলি জনায়।