শুৱালকুছি বুদৰাম মাধৱ সত্ৰাধিকাৰ মহাবিদ্যালয়ৰ প্ৰতিষ্ঠা দিৱস উদযাপন

ডিজিটেল সংবাদ, শুৱালকুছিঃ শুকুৰবাৰে শুৱালকুছিৰ বুদৰাম মাধৱ সত্ৰাধিকাৰ মহাবিদ্যালয়ৰ ত্ৰয়ঃষষ্ঠিতম প্ৰতিষ্ঠা দিৱসটি ঈশ্বৰ শ্ৰীশ্ৰী হাটীসত্ৰ, শুৱালকুছিৰ যৌথ উদ্যোগত দিনজোৰা কাৰ্যসূচীৰে সম্পন্ন হয়। প্ৰথম কাৰ্যসূচী হিচাপে মহাবিদ্যালয়ৰ অধ্যক্ষ ড° নিহাৰ ৰঞ্জন কলিতাই মহাবিদ্যালয়ৰ  পতাকা উত্তোলন কৰাৰ পিছত উপাধ্যক্ষ ড° যোগেশ ডেকাই শ্বহীদ স্মৃতি তৰ্পণ অনুষ্ঠানটি শুভাৰম্ভ কৰে। সহযোগিতা আগবঢ়াই ছাত্ৰ একতা সভাৰ সভাপতি সৌৰভ বৰ্মনে।

তাৰপাছতে, মহাবিদ্যালয়খনৰ প্ৰতিষ্ঠাৰ আঁৰত থকা শুৱালকুছিৰ দুগৰাকী বিশিষ্ট ব্যক্তি বুদৰাম মহন্ত আৰু মাধৱ মহন্ত বাপদ্বয়ৰ প্ৰতিচ্ছবিত বন্তি প্ৰজ্বলন আৰু মাল্যাৰ্পণ কৰে ঈশ্বৰ শ্ৰীশ্ৰী হাটী সত্ৰ, শুৱালকুছিৰ সত্ৰাধিকাৰ শ্ৰীযুত ৰাজিৱ লোচন সন্তই। উল্লেখ্য যে, সত্ৰাধিকাৰ ৰাজিৱ লোচন সন্তদেৱৰ পৰিচালনাত মহাবিদ্যায়লৰ প্ৰাংগণত আয়োজিত নাম প্ৰসংগ আৰু খোলবাদনৰ পিছতেই দিনৰ ১১ বজাৰ পৰা অনুষ্ঠিত হয় আলোচনা সত্ৰ। ঈশ্বৰ শ্ৰীশ্ৰীহাটী সত্ৰৰ ডেকা সত্ৰীয়া শ্ৰীযুত উজ্বল মহন্তৰ বন্তি প্ৰজ্বলন আৰু সমূহীয়া প্ৰাৰ্থনাৰে আৰম্ভ হোৱা আলোচনা সত্ৰখন অধ্যক্ষ ড° নিহাৰ ৰঞ্জন কলিতাই সঞ্চালনা কৰে আৰু উদ্বোধন কৰে মহাবিদ্যালয় পৰিচালনা সমিতিৰ সভাপতি বিৰাজ কুমাৰ দাসে। আনহাতে প্ৰতিষ্ঠা দিৱসৰ আদৰণী ভাষণ প্ৰদান কৰে উপাধ্যক্ষ ড° যোগেশ ডেকাই।

'মহাপুৰুষ শ্ৰীমন্ত শংকৰদেৱৰ দৰ্শনত বিশ্বজনীনতা' শীৰ্ষক বি]ষয়ত তত্ত্বগধুৰ অথচ সাৱলীল ভাষণ আগবঢ়াই সত্ৰাধিকাৰ শ্ৰীযুত ৰাজিৱ লোচন সন্তই। তেখেতে বিষয়ৰ লগত সংগতি ৰাখি সাম্প্ৰতিক সময়ত গীতাৰ প্ৰাসংগিকতা, বেদান্ত দৰ্শনৰ গূঢ়াৰ্থ আৰু ইয়াৰ ধাৰা তথা ক্ৰমবিকাশ, দৰ্শনৰ প্ৰকাৰ আৰু তত্ত্ব, শংকৰদেৱৰ চিন্তা আৰু কৰ্মাদৰ্শত বিশ্বজনীন চেতনা, শংকৰদেৱৰ দৰ্শনত পাৰিপাৰ্শ্বিক চেতনা আদি দিশৰ ওপৰত এক পুংখানুপুংখ বিশ্লেষণ আগবঢ়ায়। তেখেতে আৰু কয় যে, "শংকৰদেৱে সমগ্ৰ মানৱ জাতিৰ মংগলৰ হকে চিন্তা কৰিছিল। শংকৰদেৱৰ দৰ্শনৰ প্ৰভাৱ আমাৰ সমাজত যুগে যুগে বিয়পি আছে আৰু থাকিব। সেয়ে লক্ষ্মীনাথ বেজবৰুৱা, জ্যোতিপ্ৰসাদ আগৰৱালা, বিষ্ণুপ্ৰসাদ ৰাভা, ড° ভূপেন হাজৰিকা আদিৰ দৰে মহান অসমীয়া ব্যক্তিয়েও শংকৰদেৱৰ আদৰ্শ মনে প্ৰাণে গ্ৰহণ কৰিছিল।  গতিকে আজিৰ একবিংশ শতিকাত আমিও শংকৰদেৱৰ দৰ্শন আৰু কৰ্মৰাজিক অধ্যয়ন কৰিব লাগে" বুলি তেখেতে কয়।

আনহাতে, আলোচনা সত্ৰৰ আন এগৰাকী আলোচক বিশিষ্ট শিক্ষাবিদ তথা প্ৰাক্তন অধ্যক্ষ প্ৰাগজ্যোতি মহাবিদ্যালয় আৰু পঞ্জাৱ বিশ্ববিদ্যালয়ৰ শংকৰদেৱ আসনৰ ভিজিটিং প্ৰফেচাৰ ড° দয়ানন্দ পাঠকে 'শ্ৰীমন্ত শংকৰদেৱৰ সাম্য আৰু মানৱতাৰ ভিত্তিত সমাজ গঠন আৰু সাম্প্ৰতিক সময়ত ইয়াৰ প্ৰাসংগিকতা' শীৰ্ষক বিষয়ত গৱেষণালব্ধ আলোচনা আগবঢ়ায়। তেখেতে শংকৰদেৱৰ ব্যক্তিত্ব আৰু জীৱনাদৰ্শৰ গুণ-গৰিমা সম্পৰ্কে ক'বলৈ গৈ  মাধৱদেৱৰ আপ্তবাক্য "জয় গুৰু শংকৰ  সৰ্ব গুণাকৰ যাকেৰি নাহিকে উপাম…"ৰ প্ৰসংগ টানি আনে। মাধৱদেৱে তাহানিতে শংকৰদেৱৰ বিষয়ে কৈ থৈ যোৱা এই কেইটামান শব্দতেই শংকৰদেৱৰ সমগ্ৰ সত্তাটোক তুলি ধৰিবলৈ সক্ষম হৈছে। শংকৰদেৱৰ সমগ্ৰ দৃষ্টি আৰু সৃষ্টিত লুকাই থকা সাম্য আৰু মানৱীয় চেতনা সমগ্ৰ বিশ্বতেই বিৰল। 

ইফালে, বৰ্তমান ৰাষ্ট্ৰীয় শিক্ষানীতি-২০২০ৰ প্ৰসংগ টানি তেখেতে গুৰুত্বপূৰ্ণ মন্তব্য আগবঢ়াই যে, "শংকৰদেৱে আজিৰ পৰা পাঁচশ বছৰৰ পূৰ্বেই সকলো বিষয়ৰ জ্ঞান-বুদ্ধি চৰ্চাৰ পোষকতা কৰিছিল। আমি কেৱল এটা বিষয় বা এক নিৰ্দিষ্ট ক্ষেত্ৰতেই সোমাই নাথাকি ব্যৱহাৰিক জ্ঞানৰ হাতত হাত ধৰি আগুৱাই যোৱাৰ সদিচ্ছা প্ৰকাশ কৰিব লাগে। শংকৰদেৱৰ এই চিন্তা আজিৰ নতুন শিক্ষাব্যৱস্থাত খুবেই প্ৰাসংগিক। আধুনিক মনৰ অধিকাৰী শংকৰদেৱেৰ চিন্তা-চেতনা ইউৰোপৰ মহান মনীষীসকলতকৈও অধিক দূৰদৰ্শী আছিল" বুলি তেখেতে তেখেতৰ ভাষণৰ শেষত তাৎপৰ্যপূৰ্ণ মন্তব্য আগবঢ়ায়। মহাবিদ্যালয়ৰ সহযোগী অধ্যাপক অতুল চন্দ্ৰ দাসে আঁত ধৰা অনুষ্ঠানটিৰ শেষত শলাগৰ শৰাই আগবঢ়াই ঈশ্বৰ শ্ৰীশ্ৰী হাটী সত্ৰৰ হৈ কিশোৰ দাসে।