কানাডাৰ 'উভচৰী বিমান'ৰ প্ৰদৰ্শনীমূলক উৰণত অংশগ্ৰহণ জয়ন্ত মল্লবৰুৱাৰ

ডিজিটেল ডেস্কঃ  মেছাৰ্ছ ডি হেভিলেণ্ড কানাডা আৰু অসামৰিক বিমান পৰিবহণ মন্ত্ৰালয়ৰ যৌথ উদ্যোগত আজি আয়োজিত পৰীক্ষামূলক 'উভচৰী বিমান' (SEAPLANE)ৰ উৰণ প্ৰদৰ্শনীত পৰ্যটন মন্ত্ৰী জয়ন্ত মল্লবৰুৱাই অংশগ্ৰহণ কৰে। অসমৰ যাতায়ত তথা পৰ্যটনৰ ক্ষেত্ৰত যুগান্তকাৰী সংযোজন ঘটা সামুদ্ৰিক বিমানখনে লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰৰ পৰা পুৱা উৰণ আৰম্ভ কৰে।

আকাশত কিছু সময় থকাৰ অন্তত গুৱাহাটী পাণ্ডু ঘাটত সফল অৱতৰণ কৰে। SEAPLANEৰ সফল পৰীক্ষণৰ অন্তত তেওঁ এই সন্দৰ্ভত নিজৰ অনুভৱ ব্যক্ত কৰি কয় যে আজি অসমৰ কাৰণে এটা বিশেষ দিন। অসমত পোন প্ৰথমবাৰৰ বাবে SEAPLANE নামিছে। এয়া আমাৰ কাৰণে অত্যন্ত আনন্দৰ দিন। পৰীক্ষামূলকভাৱে আজি SEAPLANE বৰঝাৰ বিমানবন্দৰৰ পৰা পাণ্ডু ঘাটলৈকে চলাই আমি নামিছো।

তেওঁ পুনৰ কয় যে এই SEAPLANE কিমান সোনকালে অপাৰেচনেল পৰ্যায়লৈ আনিব পৰা যায়, তাৰ বাবে আমাৰ প্ৰচেষ্টা থাকিব। মন্ত্ৰীগৰাকীয়ে লগতে জনাই যে, সাধাৰণতে ভাৰতবৰ্ষত সামুদ্ৰিক বিমান আজিলৈকে সাগৰতহে ব্যৱহাৰ কৰা হৈছিল। আজি প্ৰথমবাৰৰ বাবে অসমত ব্ৰহ্মপুত্ৰ নদীত সামুদ্ৰিক বিমানৰ উৰণ পৰীক্ষণ কৰাটো এক অন্যতম ঐতিহাসিক মূহুৰ্ত।

সংবাদ মাধ্যমক উদ্দেশ্যি তেওঁ কয় যে আপোনালোকে জানি আনন্দিত হ’ব যে ভাৰতবৰ্ষত SEAPLANE প্ৰথমবাৰৰ কাৰণে নদীত নামিছে। ইয়াৰ আগতে সাগৰত নামিছে বা অন্যান্য বেকৱাৰ্ডত নামিছে, কিন্তু আজি SEAPLANE প্ৰথমবাৰৰ কাৰণে নদীত নামিছে। গতিকে এইটো আমাৰ কাৰণে আনন্দৰ কথা। এই SEAPLANE অসমৰ যোগাযোগ ব্যৱস্থা আৰু পৰ্যটন ক্ষেত্ৰতখনত এটা ডাঙৰ সংযোজন।

এই SEAPLANE যদি আমি অসমৰ কাজিৰঙা, উমৰাংচু, মাজুলী, ডিব্ৰুগড় ইত্যাদিলৈ চলাব পাৰো- অসমৰ গোটেই যাতায়াত ব্যৱস্থাটো বা পৰ্যটন ক্ষেত্ৰখন বহুখিনি একেলগে আগবাঢ়ি যাব।

মন্ত্ৰীগৰাকীয়ে এই SEAPLANEৰ সফল পৰীক্ষণত অত্যন্ত আনন্দ অনুভৱ কৰা বুলি ব্যক্ত কৰে। তেওঁ পৰিবহণ বিভাগ আৰু পৰ্যটন বিভাগক ইয়াৰ বাবে ধন্যবাদ জ্ঞাপন কৰে। 

উৰণৰ অভিজ্ঞতা বৰ্ণনা কৰি মন্ত্ৰীগৰাকীয়ে কয় যে, সামুদ্ৰিক বিমানৰ এই উৰণ অতিকৈ চমকপ্ৰদ আছিল। এই বিমানৰ সংযোজন অসমৰ পৰিবহণ তথা পৰ্যটনৰ ক্ষেত্ৰত এক যুগান্তকাৰী সংযোজন হিচাপে পৰিগণিত হ'ব। আমি আশাবাদী যে, অহা ছয় মাহৰ পৰা এবছৰৰ ভিতৰত আমি ছিপ্লেন অসমৰ পৰিবহণ তথা পৰ্যটনৰ ক্ষেত্ৰত কাৰ্যকৰী কৰাৰ বাবে সকলো কাৰ্য সম্পন্ন কৰিব পাৰিম।

মন্ত্ৰী জয়ন্ত মল্লবৰুৱাই অসমৰ বৰ্দ্ধিত পৰ্যটন উদ্যোগৰ সম্ভাৱনাৰ কথা উল্লেখ কৰি কয় যে অসম নদী, জলাশয়েৰে ভৰপূৰ গতিকে প্ৰতিখন পৰ্যটনস্থলী যেনে কাজিৰঙা, উমৰাংছ’, পবিতৰা আদি স্থানসমূহত ছিপ্লেনৰ সংযোজনে বিভিন্ন পৰ্যটকৰ বাবে পৰিবহণ সুচল কৰিব আৰু কম পৰিচিত পৰ্যটনস্থলীসমূহো উদঘাটন কৰাত সহায়ক হিচাপে বিবেচিত হ'ব। মন্ত্ৰীগৰাকীয়ে পৰৱৰ্তী সময়ত কাজিৰঙা, মাজুলী বা উমৰাংছটো ইয়াৰ পৰীক্ষণ কৰা হ’ব বুলি জানিবলৈ দিয়ে।