ডিজিটেল সংবাদ ,বেবেজীয়াঃ নগাঁও জিলাৰ বেবেজীয়াৰ সমীপৰ বৰজহাৰ ধৰ্মপ্ৰাণা মহিলা ৰেণু শইকীয়া বৰুৱা (৬৮)ৰ বৃহস্পতিবাৰে পুৱা গুৱাহাটীৰ এখন ব্যক্তিগত চিকিৎসালয়ত মৃত্যু হয় । বিগত ৯ অক্টোবৰত লক্ষ্মী পূৰ্ণিমাৰ দিনাই ঘৰৰ সমীপতে সন্ধিয়া নাম গাই থকা অৱস্থাত হঠাৎ অসুস্থ হৈ পৰিছিল মহিলাগৰাকী ।
উচ্চ ৰক্তচাপজনিত কাৰণত অসুস্থ হৈ পৰা মহিলাগৰাকী এপষেকৰো অধিক দিন গুৱাহাটীৰ এখন ব্যক্তিগত চিকিৎসালয়ত সংকটজনক অৱস্থাত চিকিৎসাধীন হৈ থকাৰ পিছত আজি পুৱা ৮-২৫ বজাত চিকিৎসালয়তে শেষ নিশ্বাস ত্যাগ কৰে । অতি সৰলমনা আৰু বিনয়ী মহিলা গৰাকীয়ে মৃত্যুৰ সময়ত স্বামী তথা কুজিদাঁহ উচ্চতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ দূৰ্লভ বৰুৱাৰ লগতে দুই পুত্ৰ, জীয়ৰী, বোৱাৰী, নাতি-নাতিনী আদিক এৰি থৈ যায় ।
সৰবৰহী মহিলাগৰাকীৰ মৃত্যত সামাজিক-সাংস্কৃতিক অনুষ্ঠান সৃষ্টি, অৰুণোদয় পুথিভঁৰাল, নগাঁও ইলেক্ট্ৰ'নিক মিডিয়া এচ'ছিয়েশ্বন, বেবেজীয়া প্ৰেছ ক্লাব, সমন্বয় সংগীত বিদ্যালয় আদিকে ধৰি বিভিন্ন দল-সংগঠনে শোক প্ৰকাশ কৰাৰ লগতে শেষ শ্ৰদ্ধা জ্ঞাপন কৰে । আনহাতে সামাজিকভাৱে অগ্ৰণী ৰেণু শইকীয়া বৰুৱাৰ মৃত্যৰ বাতৰি বিয়পি পৰাৰ লগে লগে শতাধিক লোক তেওঁৰ বাসগৃহত উপস্থিত হৈ অন্তিম যাত্ৰাৰ সাক্ষী হয় ।
