মিকিৰ বামুণীৰ ভূমি কেলেংকাৰী তদন্তৰ দাবীত নগাঁৱত বিক্ষোভ প্ৰদৰ্শন

ডিজিটেল সংবাদ, বঢ়মপুৰ : নগাঁও জিলা আয়ুক্ত কাৰ্যালয়ৰ সমীপৰ মতিৰাম বৰা উদ্যানত মঙলবাৰে ভাৰতৰ কমিউনিষ্ট পাৰ্টিৰ সদস্যসকলে  মিকিৰ বামুণীত আজুৰ পাৱাৰ ফৌৰটি প্ৰা: লি: কোম্পানীয়ে সংঘটিত কৰা ৰাজ্যখনৰ বিয়াগোম ভূমি কেলেংকাৰীৰ উচ্চ পৰ্যায়ৰ তদন্তৰ দাবীত ডেৰ ঘন্টাৰ ধৰি বিক্ষোভ প্ৰদৰ্শন কৰে ।  প্ৰায় অৰ্ধ শতাধিক লোকে অংশগ্ৰহণ কৰা এই বিক্ষোভত মিকিৰ বামুণীৰ প্ৰসংগৰ লগতে নিত্য ব্যৱহাৰ্য সামগ্ৰীৰ অস্বাভাৱিক মূল্যবৃদ্ধি ৰোধ কৰা , নিবনুৱা যুৱক-যুৱতীৰ কৰ্মসংস্থাপনৰ ব্যৱস্থা কৰা , মনিপুৰত সামৰিক বাহিনীৰ বিশেষ ক্ষমতা আইন প্ৰত্যাহাৰ কৰাৰ আদিৰ দাবীৰ সন্দৰ্ভতো বিক্ষোভ প্ৰদৰ্শন কৰা হয়।

তদুপৰি আজুৰ পাৱাৰ আৰু আদানী গ্ৰুপৰ কেলেংকাৰীৰ যথোচিত তদন্তৰ বাবে যৌথ সংসদীয় সমিতি গঠন কৰাৰ দাবীত মতিৰাম বৰা উদ্যান উত্ৰাৱল কৰি তোলে বিক্ষোভকাৰীসকলে । বিক্ষোভকাৰীসকলৰ সন্মুখত বক্তব্য দাঙি ধৰে চি পি আইৰ নগাঁও জিলা সম্পাদক ৰাতুল বৰা, সহকাৰী সম্পাদক জিতু কুমাৰ নাথ আৰু জিলা পৰিষদৰ সদস্য চিকাৰী ৰংপীয়ে  ।

বক্তাসকলে বৰ্তমানৰ কেন্দ্ৰ আৰু ৰাজ্য চৰকাৰ দুখন সকলো ক্ষেত্ৰতে বিফল হৈ দৰিদ্ৰ মেহনতী জনতাৰ ভূমি কাঢ়ি নি কৰ্প'ৰেটক গতাই দিয়াত উঠি-পৰি লাগিছে গতিকে এই জন বিৰোধী নীতিৰ বিৰুদ্ধে জনগণ ৰাজপথলৈ ওলাই আহি তীব্ৰ গণতান্ত্ৰিক গণ-আন্দোলন গঢ়ি তোলাৰ আহ্বান জনায়। লগতে ইয়াৰ বিকল্প নাই বুলি উল্লেখ কৰে ।