নগাঁৱৰ শংকৰ মিছন সাৰ্বজনীন পূজা সমিতিৰ সোণালী জয়ন্তী বৰ্ষ উদযাপনৰ প্ৰস্তুতি...

ডিজিটেল সংবাদ, নগাঁও : নগাঁও চহৰৰ মাজমজিয়াৰ শংকৰ মিছন পথস্থিত সাৰ্বজনীন পূজা সমিতিয়ে এইবাৰ পঞ্চাছ বছৰত ভৰি দিয়া উপলক্ষে সোণালী জয়ন্তী উৎসৱ বৰ্ষটি উদযাপন কৰিবলৈ মনস্থ কৰিছে ৷ ১৯৭৬ চনত স্থাপিত সাৰ্বজনীন পূজা সমিতিয়ে দূৰ্গা পূজা প্ৰতি বছৰে উদযাপন কৰাৰ উপৰি বিভিন্ন ধৰণৰ সামাজিক আৰু সাংস্কৃতিক অনুষ্ঠান পালন কৰি আহিছে ৷ 

স্থানীয় নৰ্মাল স্কুলৰ প্ৰাঙ্গণত ২০০১ চনৰ পৰা টাইটানিক জাহাজ, দিল্লীৰ লালকিল্লা, পঞ্জাৱৰ স্বৰ্ণ মন্দিৰ, সাংসদ ভৱন, ৰাম মন্দিৰ আদিৰ আৰ্হিৰে প্ৰস্তুত কৰা পেণ্ডেল আৰু আলোকসজ্জাই নগাঁওবাসী তথা অসমবাসীক মোহিত কৰিছে ৷  এইবাৰ সাৰ্বজনীন পূজা সমিতিয়ে বৃহৎ পৰিমাণৰ বাজেটেৰে সোণালী জয়ন্তী উৎসৱ উদযাপন কৰিবলৈ থিৰাং কৰিছে৷ 

সোণালী জয়ন্তীৰ লগত সংগতি ৰাখি এইবাৰ বিভিন্ন সামাজিক কামও হাতত লোৱা হৈছে ৷ যোৱা ১৫ এপ্ৰিলত গণেশ পূজাৰে আৰম্ভণি কৰা আৰু দেওবাৰে সমিতিৰ কাৰ্যালয়ৰ সভাকক্ষত ৰক্তদান শিবিৰৰ আয়োজন কৰা হয় ৷ শিবিৰটো আনুষ্ঠানিকভাৱে উদ্বোধন কৰে স্হানীয় বিধায়ক ৰূপক শৰ্মাই ৷ 

অনুষ্ঠানটোত নগাঁও পৌৰসভাৰ উপ-সভাপতি সীমান্ত বৰা, ১৭ নং ৱাৰ্ডৰ কমিচনাৰ স্বপ্না লোধ প্ৰমুখ্যে সমিতিৰ সদস্যসকল উপস্থিত থাকে ৷ বিধায়ক ৰূপক শৰ্মাই শিবিৰটো উদ্বোধন কৰি কয় যে সোনালী জয়ন্তী বৰ্ষপূৰ্তিৰ ৰক্তদান শিবিৰ মানৱ জগতৰ এক জীৱনদান ৷ 

মুঠ ৩৮ গৰাকীয়ে ৰক্তদান কৰা শিবিৰটো সামাজিক কামৰ এক উল্লেখনীয় বুলি উল্লেখ কৰে ৷ তদুপৰি সোনালী জয়ন্তী বৰ্ষটোৰ পিছত কোনো দৰিদ্ৰ অঞ্চলত স্বাস্থ্য শিবিৰ আয়োজন কৰা, বানাক্ৰান্ত লোকক সাহায্য প্ৰদান কৰা,  বিভিন্ন স্থানত গছপুলি ৰোপণ আঁচনি, স্বচ্ছ ভাৰত অভিযান  আদিৰ কাৰ্যসূচী  আয়োজন কৰা হ’ব৷