শ্ৰীৰামপুৰ আন্তঃৰাজ্যিক তালাচী চকীত আৰক্ষীয়ে আবদ্ধ কৰিছে মালবাহী ট্ৰাক

ডিজিটেল সংবাদ, ধুবুৰীঃ গোসাইগাঁও মহকুমাৰ শিমুলটাপু আৰক্ষী চকীৰ অন্তৰ্গত শ্ৰীৰামপুৰ আন্তঃৰাজ্যিক তালাচী চকীত কেইবা শতাধিক মালবাহী ট্ৰাক আবদ্ধ কৰি ৰাখিছে আৰক্ষীয়ে। অসমৰ বিভিন্ন প্ৰান্তৰ পৰা পুৰণি ভঙা-চিঙা লোৰ সামগ্ৰী কঢ়িয়াই অনা শতাধিক ট্ৰাক ৫ৰ পৰা ৭ দিন ধৰি আবদ্ধ কৰি ৰখা হৈছে।

ইফালে ট্ৰাকৰ চালক সকলে সদৰি কৰা অনুসৰি, কঢ়িয়াই অনা সামগ্ৰীৰ প্ৰয়োজনীয় নথি-পত্ৰ থকাৰ পিছতো নথি-পত্ৰ পৰ্যবেক্ষণৰ নামত আবদ্ধ কৰি ৰাখিছে ট্ৰাকসমূহ। আবদ্ধ কৰি ৰখা ঠাইত শৌচালয়ৰ সুবিধা নথকাৰ বাবে চালক সকলে সমস্যাৰ সন্মুখীন হৈছে। লগতে খাদ্য সামগ্ৰীৰ অভাৱতো হাহাকাৰ পৰিস্থিতিৰ সৃষ্টি হৈছে তালাচী চকীত। সামগ্ৰী প্ৰেৰণ কৰা মালিক পক্ষই প্ৰয়োজনীয় নথি আৰু জিএছটি দিয়া আছে বুলি চালক সকলক জনাইছে। কিন্তু বিগত প্ৰায় এসপ্তাহ ধৰি আবদ্ধ কৰি ৰখাৰ অন্তৰালত কি ৰহস্য আছে তাক লৈ সৃষ্টি হৈছে প্ৰশ্নচিহ্নৰ।