/asomiyapratidin/media/media_files/2025/07/10/362-2025-07-10-09-38-27.jpg)
ডিজিটেল ডেস্ক : এখন, দুখন নহয়, একেৰাহে ৫খন দেশৰ ভ্ৰমণ সমাপ্ত কৰি অৱশেষত নতুন দিল্লীলৈ ৰাওনা হৈছে ভাৰতৰ প্ৰধানমন্ত্ৰী নৰেন্দ্ৰ মোডী। বিভিন্ন চৰকাৰী কাৰ্যসূচীৰ উপৰি কেতবোৰ আলোচনাৰ বাবে প্ৰধানমন্ত্ৰী মোডীয়ে ঘানা, ট্ৰিনিদাদ আৰু ট’বাগো, আৰ্জেণ্টিনা, ব্ৰাজিল আৰু নামিবিয়া ভ্ৰমণলৈ গৈছিল।
অৱশেষত সকলো কাৰ্যসূচী সুচাৰুৰূপে সম্পন্ন কৰি বুধবাৰে নিশা নামিবিয়াৰ পৰা নতুন দিল্লীলৈ ৰাওনা হয় মোডী। প্ৰধানমন্ত্ৰীগৰাকীৰ এই ৫ দেশ ভ্ৰমণ সম্পৰ্কত বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছৱালে সামাজিক মাধ্যম এক্সযোগে ভাৰতলৈ উভতনি যাত্ৰাৰ কথা উল্লেখ কৰে।
উল্লেখযোগ্য যে, প্ৰধানমন্ত্ৰীগৰাকীয়ে যোৱা ২ জুলাইত ঘানা অভিমুখে যাত্ৰা কৰিছিল। ইয়াৰ পাছত তেওঁ ঘানাকে ধৰি ৫খন দেশ ভ্ৰমণ কৰি ৯ জুলাইত এই ভ্ৰমণ সমাপ্ত কৰে।
এইখনিতে এটা কথা উল্লেখ কৰিব পাৰি যে, প্ৰধানমন্ত্ৰী নৰেন্দ্ৰ মোদীয়ে দুদিনীয়া ব্ৰাজিল ভ্ৰমণ সামৰি মঙলবাৰে উৰা মাৰিছিল নামিবিয়া অভিমুখে ৷ ৰিঅ’ ডি জেনেৰিঅ’ত অনুষ্ঠিত ১৭ সংখ্যক ব্ৰিকছ সন্মিলনত অংশগ্ৰহণ কৰি ৰাষ্ট্ৰপতি লুইজ ইনাচিঅ’ লুলা দা ছিলভাৰ সৈতে বাণিজ্য আৰু সন্ত্ৰাসবাদকে ধৰি বিভিন্ন বিষয়ত আলোচনা কৰিছিল প্ৰধানমন্ত্ৰী মোডীয়ে ।
তাৰোপৰি মোডীয়ে ব্ৰাজিলিয়াত ৰাষ্ট্ৰপতি লুলাৰ সৈতে ইতিবাচক আলোচনাত অংশগ্ৰহণ কৰিছিল। এই আলোচনাত বাণিজ্যিক সম্পৰ্কৰ বৈচিত্ৰ্যৰ লগতে পৰিকল্পিত আঁচনি, বহনক্ষম উন্নয়ন আৰু জলবায়ু পৰিৱৰ্তনৰ সৈতে মোকাবিলা কৰাৰ ক্ষেত্ৰত সহযোগিতা বৃদ্ধিৰ ওপৰত গুৰুত্ব আৰোপ কৰিছিল ।
উক্ত ভ্ৰমণৰ সময়ছোৱাত ভাৰত আৰু ব্ৰাজিলে কেইবাটাও ক্ষেত্ৰত সহযোগিতা বৃদ্ধিৰ বাবে চুক্তি স্বাক্ষৰ কৰে । মঙলবাৰে প্ৰধানমন্ত্ৰীগৰাকীক ব্ৰাজিলৰ সৰ্বোচ্চ অসামৰিক বঁটা ‘‘গ্ৰেণ্ড কলাৰ অৱ দ্য নেশ্যনেল অৰ্ডাৰ অৱ দ্য চাউডাৰ্ণ ক্ৰছ’’ সন্মান প্ৰদান কৰা হৈছিল ।