সন্দেহযুক্ত লোকে অসমখন লৈ লোৱাটো বিচাৰে অখিল গগৈয়েঃ পীযুষ হাজৰীকা

ডিজিটেল ডেস্কঃ "অখিল গগৈয়ে সন্দেহযুক্ত লোকে অসমখন লৈ লোৱাটো বিচাৰে, অসমৰ ভূমি লৈ যোৱাটো বিচাৰে। সন্দেহযুক্ত লোকে নামনি অসমখন লোৱাৰ পিছতো অখিল গগৈৰ গা শাত পৰা নাই। কিন্তু মুখ্যমন্ত্ৰী ড০ হিমন্ত বিশ্ব শৰ্মাই এয়া কেতিয়াও হ'বলৈ নিদিয়ে। স্বাভিমানী অসমীয়া ৰাইজ আজি সন্দেহযুক্ত অবৈধ বেদখলকাৰীৰ বিৰুদ্ধে ঐক্যবদ্ধভাৱে ওলাই আহিছে।"- এই মন্তব্য মন্ত্ৰী পীযুষ হাজৰীকাৰ। শনিবাৰে ওদালগুৰি জিলাৰ কলাইগাঁৱত সংবাদ মাধ্যমৰ আগত এইদৰে মন্তব্য কৰি মন্ত্ৰীগৰাকীয়ে বিধায়ক অখিল গগৈক তীব্ৰ কটাক্ষ কৰে। 

উল্লেখযোগ্য যে, অখিল গগৈয়ে টংলালৈ আহি উচ্ছেদ অভিযানটোক বিজেপি দলৰ হাথিয়াৰ বুলি কৈ বিজেপিয়ে মানুহৰ আৱেগক লৈ খেলা খেলিছে বুলি মন্তব্য কৰিছিল। এই সন্দৰ্ভত সাংবাদিকে মন্ত্ৰীগৰাকীৰ পৰা প্ৰতিক্ৰিয়া জানিবলৈ বিচৰাত মন্ত্ৰী হাজৰীকাই অখিল গগৈক উভতি ধৰি তীব্ৰ সমালোচনা কৰে।

মন্ত্ৰীগৰাকীয়ে সদৰি কৰে যে, "সন্দেহযুক্ত মানুহে ইতিমধ্যে নামনি অসমখন লৈ ল’লে, মধ্য অসমখন লৈ ল’লে। অখিল গগৈৰ মতে সন্দেহযুক্ত লোকে উজনি অসমখনো ল’ব লাগে। কিন্তু আমি সেইটো হ’বলৈ নিদিওঁ। মন্ত্ৰীগৰাকীয়ে আৰু কয় যে অখিল গগৈৰ মতে সন্দেহযুক্ত মানুহে অসমখন লৈ ল’ব লাগে। অসমীয়া মানুহৰ মাটি-বাৰী কাঢ়ি ল’ব লাগে সন্দেহযুক্ত লোকে। কিন্তু মুখ্যমন্ত্ৰী ড০ হিমন্ত বিশ্ব শৰ্মা ডাঙৰীয়াই সেই কামটো হ’বলৈ নিদিয়ে। আমি সেই কামটো হ’বলৈ নিদিওঁ" বুলি মন্তব্য কৰে মন্ত্ৰীগৰাকীয়ে। 

আনহাতে, বিজেপিয়ে বিটিচিত শাসন কৰিলে বিটিচি পুনৰ ৰক্তাক্ত হ’ব বুলি অখিল গগৈয়ে কৰা মন্তব্য সন্দৰ্ভতো প্ৰতিক্ৰিয়া ব্যক্ত কৰি মন্ত্ৰীগৰাকীয়ে কয় যে, "আমি আগৰ পৰাই কৈ আহিছো যে আমি বহুত শক্তিশালী নহয়। ইয়াৰ স্থানীয় দল বিলাকৰ লগত লগ লাগি বা তেওঁলোকক সন্মান প্ৰদৰ্শন কৰিহে চৰকাৰ গঠন কৰিম বুলিহে মই প্ৰত্যক দিনাই কৈ আহিছো। ৰক্তাক্ত হোৱাতো প্ৰশ্নই নাহে।"

মন্ত্ৰীগৰাকীয়ে লগতে কয় যে, "বিটিচিলৈ শান্তি আনিছে প্ৰধানমন্ত্ৰী নৰেন্দ্ৰ মোদীয়ে, শান্তি আনিছে অমিত শ্বাহ, মুখ্যমন্ত্ৰী ড০ হিমন্ত বিশ্ব শৰ্মাই। আমি শান্তি আনো আৰু অখিল গগৈয়ে আবোল-তাবোল বকে। সন্দেহযুক্ত মানুহক যিকোনো ঠাইৰ পৰা খেদিবলৈ অসমীয়া মানুহ জাগ্ৰত হৈছে। আনকি অখিল গগৈৰ সমষ্টিতো সন্দেহযুক্ত মানুহক খেদিবলৈ অসমীয়া মানুহে উঠিপৰি লাগিছে। আচলতে এইবোৰ দেখি-শুনি অখিল গগৈৰ অলপ কষ্ট হৈছে বুলি অখিল গগৈক মন্ত্ৰীগৰাকীয়ে কটাক্ষ কৰে। অখিল গগৈৰ মনটো এইকেদিন অলপ বেয়া হৈ আছে, সেয়ে তেওঁ উল্টা-পুল্টা কথা কৈ আছে" বুলি মন্ত্ৰীগৰাকীয়ে মন্তব্য কৰে।

উল্লেখ্য যে, দলীয় কাৰ্যসূচীৰে ওদালগুৰি জিলাৰ কলাইগাঁৱত উপস্থিত হোৱা মন্ত্ৰীগৰাকীয়ে মুদৈবড়ী মণ্ডল বিজেপিৰ এখন বিশেষ সাংগঠনিক সভাত অংশ লয়। সভাত ভাষণ প্ৰসংগত তেওঁ কয় যে "বড়োসকলক আমি সন্মান জনাবই লাগিব। বড়োৰ বাহিৰে ইয়াত যিসকল অসমীয়া ভাষী আছে, বেংগলী ভাষী আছে, আদিবাসী আছে, চাহ-জনগোষ্ঠীৰ লোক আছে, গৌৰ্খা লোক আছে- আমি সকলোৱে মিলি এখন সৰ্বাংগসুন্দৰ বিটিআৰ বা বিটিচি গঢ়িব লাগিব।"

বিটিচিৰ সৌন্দৰ্যত মুগ্ধ হোৱা মন্ত্ৰীগৰাকীয়ে কয় যে, 'বিটিচিখন ইমান ধুনীয়া, ইয়ালৈ আহিলেই মনটো ভাল লাগি যায়। এই ধুনীয়া বিটিচিখনত কিছু বছৰ আগতে হত্যালীলা আছিল, হিংসা আছিল এতিয়া সেইবোৰ নাইকিয়া হ’ল' বুলি তেওঁ কয়। 'মানুহে এতিয়া ইয়ালৈ আহিবলৈ ভাল পায়, থাকিবলৈ ভাল পায়' বুলি তেওঁ উল্লেখ কৰে। এই ভালপোৱা থাকিবলৈ বিটিআৰখন আৰু ভাল কৰিব লাগিব বুলি উল্লেখ কৰি তাৰ কাৰণে বিজেপিয়ে দায়িত্ব ল’বই লাগিব তেওঁ মন্তব্য কৰে। কাৰণ দিছপুৰত বিজেপিৰ চৰকাৰ, দিল্লীত বিজেপিৰ চৰকাৰ। গতিকে কোকৰাঝাৰতো বিজেপিয়ে এই চৰকাৰত অংশগ্ৰহণ কৰিবই লাগিব তেওঁ ভাষণত উল্লেখ কৰে। 

কলাইগাঁৱৰ শ্বহীদ সুজিত নাৰ্জাৰী প্ৰেক্ষাগৃহত অনুষ্ঠিত উক্ত সভাত মন্ত্ৰীগৰাকীয়ে আগন্তুক বিটিআৰ নিৰ্বাচন সন্দৰ্ভত দলৰ কাৰ্যকৰ্তাসকলৰ সৈতে আলোচনা কৰে। মন্ত্ৰীগৰাকীয়ে সকলোকে নিৰ্বাচনৰ প্ৰতি লক্ষ্য ৰাখি দলীয় কামসমূহ নিষ্ঠাসহকাৰে কৰি যাবলৈ আহ্বান জনায়। তদুপৰি, ২ আগষ্টত মুখ্যমন্ত্ৰী ড০ হিমন্ত বিশ্ব শৰ্মাই সম্বোধন কৰিবলগীয়া কাৰ্যকৰ্তা সন্মিলন সন্দৰ্ভতো আলোচনা কৰে।