ফেইল মাৰিলে পাকিস্তানে! সাগৰলৈ নিক্ষেপ কৰা মিছাইল আহি পৰিলহি নিজৰ দেশত...

ডিজিটেল ডেস্কঃ  ভাৰতৰ সৈতে  প্ৰতিটো কথাতে ফেপেৰি পাতি থকা পাকিস্তান দৰাচলতে কিমান দুৰ্বল, সেই কথা পুনৰ এবাৰ প্ৰমাণ হ'ল। যিসময়ত ভাৰতে ইটোৰ পিছত সিটো অত্যাধুনিক মিছাইল সফলভাৱে পৰীক্ষণ কৰিছে তেনে সময়ত পাকিস্তানত এটা মিছাইল পৰীক্ষণ কৰোতেই সংঘটিত হ'ল প্ৰচণ্ড বিস্ফোৰণ।

ৰাষ্ট্ৰীয় সংবাদ মাধ্যমত প্ৰকাশিত খবৰ অনুসৰি, পাকিস্তান বায়ু সেনাই শেহতীয়াকৈ আৰৱ সাগৰত শ্বাহিন-৩মানৰ মিছাইলৰ পৰীক্ষণ কৰিছিল। কিন্তু এই পৰীক্ষণৰ সময়তে মিছাইলৰ নিৰ্ধাৰিত লক্ষ্যৰ সলনি পৰেগৈ পাকিস্তানৰে গাজী খানত স্থিত পৰমাণু কেন্দ্ৰৰ সমীপত।

এই ঘটনাত কোনো লোক হতাহত হোৱা নাই যদিও মিছাইল পৰা প্ৰায় ৫০০মিটাৰ দুৰত্বত আছিল ঘন জনবসতি। এই ঘটনাৰ পাছতে পাকিস্তানে উক্ত অঞ্চলটোত ইন্টাৰনেট সেৱা বন্ধ কৰি দিয়ে। উক্ত অঞ্চলটো পাকিস্তান সেনাই ঘেৰি ধৰি সকলো লোকৰ প্ৰৱেশ নিষিদ্ধ কৰিছে।

এই ঘটনা সংঘটিত হোৱাৰ পাছতে এতিয়া পাকিস্তান সেনাৰ সক্ষমতাৰ ওপৰত প্ৰশ্ন উত্থাপিত হৈছে। ভাৰতৰ সৈতে যুঁজ দিয়াৰ বাবে প্ৰতিটো সময়তে হুংকাৰ প্ৰদান কৰি থকা পাকিস্তানে এটা মিছাইলকে সফল পৰীক্ষণ কৰিব নোৱাৰাক লৈ এতিয়া কটাক্ষ কৰিছে বহুজনে। 

উল্লেখ কৰা প্ৰয়োজন যে, শ্বাহিন-৩ৰ প্ৰস্তুতকৰণৰ কাম চীনৰ সহযোগত ২০০০চনৰ পৰাই আৰম্ভ কৰিছিল পাকিস্তানে। কিন্তু অৱশেষত পাকিস্তানৰ এই চেষ্টাও ব্যৰ্থ হয়।