ঢকুৱাখনাত 'চুতীয়া যুৱ সন্মিলন অসম'ৰ শপত গ্ৰহণ অনুষ্ঠান

ডিজিটেল সংবাদ, ঢকুৱাখনাঃ চুতীয়া জনগোষ্ঠীৰ অন্যতম এক সংগ্ৰামী সত্বা হৈছে চুতীয়া যুৱ সন্মিলন অসম (চাইচা )। বৰ অসমৰ ভেটি গঢ়োতা খিলঞ্জীয়া জাতি সমূহৰ অন্যতম চুতীয়া জাতিৰ জাতীয় অধিকাৰৰ হকে গণতান্ত্ৰিক নিৰবিচ্ছিন্ন সংগ্ৰামী ধাৰা অব্যাহত ৰখা চুতীয়া যুৱ সন্মিলন অসমৰ নৱগঠিত কেন্দ্ৰীয় সমিতিয়ে দেওবাৰে আনুষ্ঠানিকভাৱে কাৰ্যভাৰ গ্ৰহণ কৰে।

চুতীয়া জাতিৰ অন্যতম নমস্য জাগ্ৰত আৰু ইতিহাস প্ৰসিদ্ধ শক্তি পীঠ ঢকুৱাখনাৰ শ্ৰী শ্ৰী ঈশ্বৰী হাৰ্হি দেৱালয় প্ৰাঙ্গনত দেওবাৰে অনুষ্ঠিত এক গাম্ভীৰ্য পূৰ্ণ সভাত নব নিৰ্বাচিত কেন্দ্ৰীয় সমিতিয়ে কাৰ্যভাৰ গ্ৰহণ কৰাৰ লগতে শপত গ্ৰহণ কৰে। পুৱা শক্তি পীঠত উপস্থিত কেন্দ্ৰীয় সমিতিৰ নৱনিৰ্বাচিত সভাপতি কৌস্তভ কিশোৰ চুতীয়া, সাধাৰণ সম্পাদক পলাশ শইকীয়াৰ লগতে অন্যান্য কেন্দ্ৰীয় নেতৃবৰ্গ, ঢকুৱাখনা জিলা সমিতি আৰু অন্য সমিতিৰ বিষয়ববীয়াৰ উপস্থিতিত প্ৰাৰম্ভিক কাৰ্যসূচী অনুষ্ঠিত কৰে। 

পৰৱৰ্তী সময়ত ঐতিহাসিক গোসাঁনী থান প্ৰাঙ্গনত অনুষ্ঠিত কাৰ্যভাৰ গ্ৰহণ অনুষ্ঠানত সভাপতিত্ব কৰে তদানীন্তন সভাপতি তথা নবগঠিত সমিতিৰ মুখ্য উপদেষ্টা মোহন চন্দ্ৰ শইকীয়াই। চুতীয়া জাতিৰ সাংস্কৃতিক কাৰ্যসূচীৰে জীপাল হোৱা অনুষ্ঠানত চুতীয়া জাতিৰ গৰিষ্ঠ সংখ্যক বিশিষ্ট ব্যক্তি, জ্যেষ্ঠ নাগৰিক, প্ৰবীণ শিক্ষাবিদৰ উপৰিও চুতীয়া জাতিৰ ৰাইজ উপস্থিত থাকে। অনুষ্ঠানত উপস্থিত থাকে প্ৰবীণ শিক্ষাবিদ সেৱক চুতীয়া, প্ৰফুল্ল চুতীয়া, সুনেপুৰ চুতীয়া ,দিব্য চুতীয়া , গৌৰৱ বৰুৱা আদিও। লগতে ৰাজ্যৰ মুঠ ২১খন জিলাৰ ৪১গৰাকী প্ৰতিনিধি আৰু সন্মিলনৰ সকলো নৱনিৰ্বাচিত বিষয়ববীয়া আৰু সদস্যৰ উপস্থিত থাকে এই সভাত।

গাম্ভীৰ্যপূৰ্ণ অনুষ্ঠানত পূৰ্বৰ সভাপতি তথা নবগঠিত সমিতিৰ মুখ্য উপদেষ্টা মোহন চন্দ্ৰ শইকীয়াই কৌস্তভ কিশোৰ চুতীয়া নেতৃত্বাধীন নতুন কেন্দ্ৰীয় সমিতিখন কাৰ্যভাৰ প্ৰদান কৰাৰ লগতে নতুন সমিতিখনৰ সকলো বিষয়ববিয়া আৰু সদস্যক শপত বাক্য পাঠ কৰাই। আদিম ভূমিপুত্ৰ চুতীয়া সকলৰ সংবিধান প্ৰদত্ত নাৰ্য অধিকাৰ আজুৰি অনা গণ সংগ্ৰামৰ সন্মুখৰ পৰা নেতৃত্ব দিবলৈ শপত লয় সভাপতি কৌস্তভ কিশোৰ চুতীয়া নেতৃত্বাধীন সমিতিখনে। 

ইফালে, নতুন কেন্দ্ৰীয় সমিতিৰ হৈ সাধাৰণ সম্পাদক পলাশ শইকীয়াই চমু বক্তব্যৰে অনাগত সময়ত স্বজাতিৰ হকে কৰণীয় দায়িত্ব কৰ্তব্যৰ অৱলোকন কৰি জ্ঞাতি বৰ্গৰ অকুণ্ঠ সহযোগিতা কামনা কৰে। চুতীয়া ছাত্ৰ সন্থা, মহিলা সন্মিলনৰো গৰিষ্ঠ সংখ্যক কৰ্মকর্তা উপস্থিত থকা জনাকীৰ্ণ অনুষ্ঠানত সভাপতি কৌস্তভ কিশোৰ চুতীয়ায়ো উদাক্ত বক্তব্যৰে চুতীয়া জনগোষ্ঠীৰ কেইবা দশক জোৰা অধিকাৰ বিচৰা সংগ্ৰামৰ লগতে ভূমি অধিকাৰ সাব্যস্ত কৰাৰ প্ৰাসংগিকতা দোহাৰী পূৰ্বতকৈ এই সংগ্ৰাম অধিক তৰান্বিত কৰাৰ  সংকল্প ব্যক্ত কৰি ইয়াৰ বাবে জ্ঞাতি সংগঠন আৰু ৰাইজৰ সহযোগিতা কামনা কৰে ।